علاقة البيبي بالفراولة بالالفا فيتو بروتين

بالنسبة لهذا البروتين العجيب المحير أبو ضحكة مميتة

انه ال AFP ياسادة

ألفا فيتو بروتين

وممكن تقول عليه

AFP 

Total AFP 

AFP-L3%

Alpha-fetoprotein (Total) Alpha-fetoprotein-L3 Percent

انتظاركم لبوستاتي اللي بتلخص الحوار الطبي المعقد ف كلمتين شرف كبير ليا ودافع قوي إني اقدم اكتر

لو سألت أغلب الزملا تعرف اي عن المنطق، عفوا تعرف اي عن ال AFP؟

هيقولي دا بروتين بيزيد مع سرطان الكبد

قشطة تمام

ارجعلي بقا وقبل ما أقولك هو ايه تعالى اقولك هو فايدتو ايه

هو لتشخيص ومتابعة علاج أورام متعددة زي

اورام الكبد والخصيتين والمبايض

وه وه وه وه وه

يعني مش كبد بس

اه مش كبد بس

لما الطبيب المعالج يشك في

 وجود أورام بالكبد او الخصيتين او المبايض

او هو مريض اورام بالفعل وبياخد دوا وعايز اتابع الورم

او مريض عادي خالص بس عنده مشكلة ممكن تدخله ف اورام من دي زي واحد عنده إلتهاب الكبد مزمن يعني مريض كبد من زمان او تشمع كبدي فدا يعني خلاص بيجهز ورقة عشان يقدم ع ورم بالكبد للاسف

ومن هنا بقا تعالى اقولك ايه هو اصلا ال

Alpha-fetoprotein (AFP) 

هو بروتين عادي خالص بينتج بشكل أساسي من خلايا الكبد بتاع الجنين ولذلك سموه فيتو فيتو يعني جنيني

ولذلك لما العيل بيتولد لو جيت حللت ليه AFP هلاقيه عااااالي ويبدأ يقل يقل يقل يقل

 وبتفضل خلايا الكبد مع البالغين تنتج AFP بحنيه ومعدل بسيط اووووووووووووووي، معدل بيساوي معدل تجديدها وتطورها ونموها

 كل ما الخلية الكبدية تتجدد تنتج حبه AFP صغيرين

وعلى هذا الوضع ع طول

بنلاقي بقى لما الكبد يتعب تعب مزمن او تشمع، الكبد عايز يعوض المصايب دي فيحاول يزود معدل التجديد فيه وبالتالي نسبة AFP ممكن تزيد

اما لو نسبة AFP زادت اوووي هنا ممكن أشك في حاجه بتخلي الخلايا تنمو وتتكاثر بشكل هيستيري زي اي يابطل

برافو الأورام

لذلك ممكن استخدمو كدليل اورام tumor marker لاورام الكبد

 hepatocellular carcinoma 

واحيانا لورم في الخصيتين او المبايض مثلا

اوبا طب اعرف منين انه تبع أنهي عضو

بص هو ال AFP موجود ع هيئات كتيرة مجموعهم

 total AFP

وفي نوع منه اسمه L3 ونسبة مقارنته بالمجموع الكلي بيزيد مع الكبد اكتر

لذلك هو لواحدو مش كاف لتشخيص الاورام، ولكن خلينا نكون ادق ونقول بيساعد في التشخيص

وانما بقا لو مريض سرطان وبياخد دوا وعايز اتابع فهوا مهم طبعا

الخلاصة الالفا فيتو بروتين لو طبيعي لا ينفي الأورام ولو عالي لا يثبتها

الأورام كلمه كبيرة وعايزة imaging studies وليلة كبيرة، فلو لاقيته عالي قول المريض اه للاسف هو مرتفع بس مع دكتورك وفحوصات اكتر يطمنا ع حضرتك

دا شرح بيسط، استنى الشرح المفصل ع قناتي باليوتيوب 

واخيرا العلاقة بين البيبي والفراولة والالفا فيتو

علاقة البيبي بالالفا فيتو قولتها فوق اما علاقة الفراولة بالبيبي

ان مستحيل علميا وتاريخيا تلاقي عيل بينطق فراولة صح

اما يقول

لاوله فاوله / آولا / العيل الشاطر اوي بيقول فلاوله