شتا و انفلونزا و التهاب قصيبات و تحسس و ربو
فأكيد اكيد ما يفوتني اشرحلكم عن جهاز التبخير اللي احب أسميه ( المسعف) او ( المنقذ )
سموه اللي تحبون
خلي احجيلكم عنه
,,,,,دكتور شنو هو جهاز البخاخ ؟
-جهاز عظيم يختصر طريق موسع القصبات بمكان ما يفتر الجسم كله يعبر مباشر للقصبات و يفتحها
,,,,,, يعني صدك هذه الفائده العظيمه؟
-لوما عظيم ما كان شفتوه بكل الطواريء و كل الاماكن
ما كان هو الخطوه الاولى بعلاج ضيق التنفس
,,,,,,, تدري دكتور بيبتي تكول مو زين لان يتعود عليه ؟
-,,,,,,,,,,, عمي صدك جذب تحجين هاي سوالف بيبتي و بيبتك عيب نسولف بيها
احنا عايشين على أبواب ال 2022
عمي هو تره مو حبوب كبسله
عيب هالحجي
شنو يتعود عليه
وحده مثقفه مثلك دارسه تكول على بخار المي يتعود عليه
,,,,,,,,,, اوك دكتور لا تزعل لا يهمك زين هو مو نفسه البيوتادين الشراب ؟
لعد ليش البخاخ احسن من الشراب ؟
-شوفي امي الشراب يطب عن طريق المعده يفتر الجهاز الهضمي و يروح للدم وراها يروح للكبد وراها يروح للقلب وراها القلب يدزه للقصبات حتى يفتحها
في حين البخاخ يروح للقصبات يفتحها و الله وياه
و هسه منو اقل أعراض جانبيه؟
منو اسرع ؟
منو احسن ؟
,,,,,, زين دكتور شنو طريقه استخدامه؟
-للاعمار تحت ١٢ سنه تاخذين نص سيسي من ماده البخاخ تخففيها ب ١ و نص إلى ٢ سيسي ماء مقطر او مغذي مالح و تخليها بمكان بالجهاز يسموه الكوب
,,,,,,,, زين شكد ابقي لهذا الجهاز؟
-ببساطه لما يخلص هذا المي و الماده من هذا الكوب معناها خلص لان تفرق بين جهاز و آخر
,,,,, كل شكد اخليه؟
-عند الحاجه مثل من تشتد الكحه او طفلك يصير نفسه عالي او يصير عنده ضيق قوي خليه
,,,,,, يعني عادي كل ٤ ساعات؟
-اي نعم ممكن جدا كل ٤ إلى ٦ ساعات
,,,,, بيه أعراض جانبيه؟
-ماكو شي بالدنيا ما بيه أعراض جانبيه ممكن يسوي رجفه خفيفه تروح وحدها بس بالجرعه العاديه ما تسوي الا ما ندر
,,,,شكد سعره و تشوفه مناسب لاهميته؟
-لو اشتريتي و قارنتي بعدد مرات زياره الطبيب بعده تشوفين فائدته تسوه
على كل الأسعار متذبذبه لاختلاف النوعيات
اكو ب ٣٥ و اكو ب ٤٠ و اكو اغلى
عادي يعني جهاز و ماركات و كذا
, يرهم دكتور علاجات أخرى بيه؟
- طبعا و هاي طبيبك يحددها الك
,,,,,, صدك دكتور ذاك اليوم جيت و كلتلي بس مي مغذي مالح اسمه نورمال سلاين خلي حتى يرتاح ليش؟
هي الفكره امي المغذي المالح يرطب المجاري التنفسيه ليرتاح الطفل و لهذا هيجي كلتلك
,,,,,يعني حجايه ام تسواهن مال يتعود عليه جذب ؟
- طبعا كذب و هذا علاج ساهم بإنقاذ المئات حول العالم
آخر سؤال و الله دكتور
,,,,,,,ابني يبجي من اخليه ع البخاخ شاسوي؟
-بعد احسن لما يبجي يدخل أكثر للقصبات و يتحسن اسرع
Comments
Post a Comment
اكتب تعليق حول الموضوع