فرق بين مساعد صيدلاني و صيدلاني و دكتور صيدلاني

 

المساعد الصيدلاني، لا يجوز له أن يقوم بصرف الروشتة، لأنه ما درس عقاقير، صيدلانيات، علم الدواء ... إلخ 

الصيدلاني، يجوز له صرف الروشتة، لأنه هو اللي دارس كل ما يتعلق بالصيدلة و فنونها، عارف شو الصحيح و شو الخطأ، لكن الخبرة تختلف من صيدلاني لآخر ... 

الصيدلاني، من حقه يصرف الأدوية التي لها علاقة بال OTC لأنه مش من المنطق كل الحالات تروح للدكتور، و لا من المنطق تكون حالة بسيطة حاجزة موعد عند الدكتور، بينما الحالة الخطيرة تكون بعدها، و بهيك يزيد الخطر على المريض كل ما تأخر التشخيص ...

الدكتور الصيدلاني، هو اللي له الأحقية بأنه الطبيب يرافقه، لأنه اسمه دكتور صيدلاني، مش مرافق طبيب، لأنه دارس 6 سنوات من علوم صيدلانية و مواد طب بشري، هو اللي بيعرف أكثر من الدكتور شو الجرعات المناسبة للمريض، هو اللي بيعرف شو التفاعلات الجانبية اللي راح تصير للمريض إذا أخذ دواء معين ...

مساعد الصيدلاني، وظيفته تختلف عن الصيدلاني، عن الدكتور الصيدلاني ..

ما تحكي ليش أتعب حالي و ادرس 5 أو 6 سنوات ما أدرس سنتين و خلص ما هيك هيك أنا بأكون صيدلاني .. لا كله بيختلف عن كله ... 

ما تحكي كلهم واحد، و أنهم فقط بائعين، في اختلاف كبير بينهم، و الاختلاف الأكبر بين الصيدلاني و البائع ...

إذا أنتم شايفين أنه الصيدلاني و البائع واحد، فهذا فكركم و أنتم حرين في أفكاركم، أنا معكم الصيدلاني بائع آه بائع بس هو بائع لمعلومةٍ يمكن أن تنقذ حياة إنسان، بائع لابتسامةٍ يهديها لكل مريض فيفرح، بائع لوصفِ الدواء للفقير، بائع إرشادات كفيلة أن تُريح مريض و تُغيّر نظام حياته،  لمعلومةٍ طبيّة كفيلة أن تُغيّر مزاج حزين، بائع للطبطبة على المريض و تهدئته، الصيدلاني بائع، بائع الفرحة، بائع السعادة ...

الصيدلاني ما في عنده صلصلة تجي أنت تحكيله بدي صلصلة لأنه عاملين معكرونة، الصيدلاني عنده مسكن للحرارة أنت ما بتعرف قديش الجرعة اللي أنت لازم تأخذها، الصيدلاني هو أول شخص بيخطر ع بالك لما تمرض، فكرة أنه يكون في صيدلية في منطقتك، بتختلف تماماً عن فكرة أنه في عندك دكان تشتري مستلزماتك منه، أنت ما بتروح للصيدلاني لتقوله والله بأشكي من هيك و هيك مثل ما بتروح على السوبر ماركت و تقول لصاحبه والله زوجتي ناقصها هيك و هيك و هو ببدأ بيحط لك الغراض الناقصة، لا الصيدلاني لما تكون حالتك خطيرة و تروح ع الدكتور بيقولك لازم تصرف هذا الدواء ساعتها أنت بتروح ع الصيدلاني و بتأخذ دوائك، بس استنى شوية ياللي بتقول أنه الصيدلاني بائع والله هو ما قتل حاله كل هذه السنوات لتقول أنه بائع، بعدين الدواء اللي أنت اشتريته من الصيدلاني اللي بتقول أنه بائع، مين اللي صنعه، أنت ليكون؟! ... لا بالله مين اللي صنعه؟! و لا هو نزل هيك من السماء مثل ما أنت نزلت من بطن أمك، الدواء اللي أنت بتأخذه لأي مرض هذا قبل ما ينصنع احتاج أكثر من مئة بحث، و احتاج لأكثر من عالم لحتى يعرفه شو التشخيص المناسب للحالة و يعرفوا شو المادة الفعالة اللي لازم تنعطى لهذا المرض، و بعد هيك أخذ وقت كبير في الحسابات و الجرعات اللي لازم تكون، بعدين راح لدائرة الإنتاج في المصنع، الدواء لما انصنع عمليته احتاجت وقت كبير أكبر مما أنت متخيل، الدواء اللي أنتم مستقلين فيه و مستصغرين دور الصيدلاني اللي وارء هذا الدواء تنساش أنه منقذ حياتك و تنساش أنه قبل ما الدكتور ينقذك الصيدلاني هو اللي أنقذك لأنه لولا هذا الدواء كان الطبيب ما عرف شو يكتب لك بالروشتة و كان أنت الآن في عداد الموتى ...

فهمت شو يعني الصيدلاني، أنت بدون الصيدلاني ميت يا شاطر ...

يمكن أنتم بتفكروا الصيدلاني بائع لأنكم شايفين كل اللي بيتخرجوا من كلية الصيدلة بيفتحوا صيدليات، هم صحيح بيفتحوا صيدليات، بس هذا لأنه ما في مصانع و لا في مختبرات كافية، تعطي للصيدلاني مجال في أنه يستخدم مهنته و يبدع فيها ...