هل شرب الماء أثناء الأكل مُضر بالهضم ؟
🔹 الإجابة لا .. ومش بيضر أبداً وبالعكس ده بيساعد الهضم.
❓بس أنا سمعت ان المية بتخفف عصارات المعدة وده غلط.
🔹 مفيش أى بحث علمى بيقول أن شرب الميه بيقلل أو يخفف إفراز العصارات الهاضمة أو يسبب عسر هضم ولازم نعرف أن إفراز العصارات فى المعدة تفاعُلى يعنى Interactive بيزيد ويقل مع كمية الأكل ونوعية الأكل إلخ .. فالماء ملوش أى علاقة.
❓طيب أنا سمعت أن شرب الميه كتير بيزحلق الأكل بسرعة من المعدة وده بيخلى الواحد يجوع بسرعة.
🔹 كلام غلط تماما والمية مهمة جداً للهضم لأن المعدة زى خلاط الأسمنت محتاجة مياه تخيل بتخلط 5 كيلو أسمنت بكوباية مياه.. طبعاً غلط المعدة محتاجة مياه عشان تهضم.
❓متشربش مياه أثناء الأكل عشان بتطلع كرش.
🔹 كلام غير علمى ومفيش علاقة بين شرب الماء والكرش.
❓ طيب هل فيه فوائد لشرب المياه مع الأكل؟
🔹 طبعا ... لو عايز تخس بجد حاول تشرب مياه كتير ده هيدى إحساس بالشبع وبالتالى معدتك هتشبع بسرعة مع كمية أقل من الأكل.. إلا إذا كنت بتحب الأكل وعاوز تأكل .. لو انت فى مطعم وطالب وجبة جامدة ومش هاين عليك تشرب مياه كتير عشان مش هاين عليك تسيب لقمة فى الطبق فنصيحة اشرب بقين مياه كل شوية أثناء الأكل .. هتخس برده ... شرب الماء أثناء الأكل بيساعد عملية الهضم وتحريك الأكل فى الأمعاء مما يقلل الإصابة بالبقللة اللى بتسمعها فى بطنك وتقليل حدوث الانتفاخات .. شرب الماء قبل أو أثناء الأكل يقلل الإمساك ويسبب يعنى أن الدنيا تبقى ماشية حلو ... شرب الماء كتير قبل وأثناء الأكل منصوح به لأى حد بيعانى من بواسير أو شرخ أو إمساك شديد.
No comments:
Post a Comment
اكتب تعليق حول الموضوع