الإدمان مرض مش ضعف إيمان أو خطيئه .. يعني محتاج علاج

فا لما حضرتك تقابل شخص مدمن ابقى ادعيله او صليله، و اعرف انه محتاج يقعد مع حد متخصص ولو لزم الامر أدوية.. و اه ملوش لازمة خالص انك تفحمه بالكام اية اللي حضرتك حافظهم او نصايح التنمية البشرية اللي شوفتهم في فيديو تشجيعي عاليوتيوب، او تسمّعلُه الكلمتين اللي قريتهم في بوست على النت!

وبرضو بلاش تقوله الكلمة دي بتاعة "أنا لو مكانك كنت عملت كذا وكذا... " 

صدقني أنت لو عشت جوه دماغه وبطريقة تفكيره دي ما هاتقدر تكمل يومين،.

الخلاصة يعني ان الشخص المدمن ده مش عايش حياة عادية وبيحب المخدرات أو بيستسهل وخلاص، ولا اللي جواه هو احساس الزهق وتقلب المود اللي بيجيلك اوقات فبيروح ياخد مخدرات. لا ده شخص حرفياً فقد الاحساس بأي متعة بشكل مستمر ومبقاش يحوق فيه اي مؤثرات .. يعني ممكن تكون ظروفه وحياته من برا عنده حلوة جداً بس دماغه مش قادرة تستمتع او تفرح بدا، كأنه شخص جعان وقدامه اكل كتير بس مش قادر ياكل عشان جسمه مبقاش بيهضم الاكل.. 

المدمن حرفياً حد "دماغه مبقتش بتاعته"، بيصارع جوا دماغه الضلمة قبل ما يصارع في الواقع اللي براه.. 

وفكرة أنه يكمل كل الوقت بكم الصراع الداخلي ده من غير انتكاسة (محاولة انتحار) ده معناه انه "بطل" بيعافر حتى ضد دماغه عشان يقدر يعيش نص الحياة اللي حضرتك عايشها. 

المدمن عشان يكمل للنقطة اللي هو فيها خاض كم حروب و رد على كمية اصوات جواه تهد جبل.. 

فا رجاء محبة عزيزي المؤمن المتحمس، لما تقابل حد مدمن.. اسكت مش لازم تغرقه نصايح ووعظ..

اسكت ووصله بحد متخصص (مش رجل دين)، ودي برضو هاتُعتبر خدمة..

الإدمان مرض مش ضعف إيمان 

              المدمن مش مجرم المدمن مريض !!