الاوميغا 3

 الاوميغا 3 هي شحوم دسمة غير مشبعة الها ٣ انواع شهيرة ، EPA - DHA - ALA .

الفائدة لجهاز الدوران و القلب ما زالت قيد الدراسة و مافي دلائل حاسمة انو اعطاء جرعة يومية من اوميغا ٣ بحسن من كفاءة الجهاز الدوران او بيقي بشكل قطعي من اصابات قلبية. ولكن المعروف انو ال EPA و DHA الهن دور كبير بتخفيض نسبة الشحوم الثلاثية بالدم.

اما للحالات العصبية، يستخدم الاوميغا ٣ بشكل يومي و الو دور مساعد بالوقاية من داء الزهايمر و العته الشيخي، و حتى بهالحالات يفضل استخدام المنتجات يلي فيها نسبة DHA اكثر من EPA بحوالي الضعف.

طبعا فوائد الاوميغا ٣ كبيرة كتير (بحالات الالتهابية كمان)  و خصوصا انها غير ممكن تصنيعها بالجسم.

  هااام  

- الجسم ما بيقدر يصنع اي شحوم اوميغا ٣، و لكن ال ALA اذا تم تناوله، بيستخدمه الجسم و بحوله ل EPA و بعدين DHA.

- الاوميغا ٣، و تحديدا ال EPA , و ال DHA موجودين بكثرة بزيت السمك بينما ال ALA بيتواجد اكثر بعدد من الزيوت و البذور .

الاوميغا ٦ بتواجد بالزيوت و المكسرات (زيت دوار الشمس، لوز) و الاوميغا ٩ بالزيوت (زيت زيتون).

- الاوميغا ٩ لا يعتبر مهم، لان الجسم قادر عتصنيعه و هو اكتر اوميغا متوافر بالجسم

- نظامنا الغذائي غني بالاوميغا ٦-٩ و فقير بالاوميغا ٣، لهيك الافضل تناول الاوميغا ٣ كمتمم غذائي لحاله، عوض ال ٣-٦-٩ سوا. لان التوازن بين هالحموض هو اساس الفعالية 

و حابب احكي عن موضوع توافره بالسوق:

-متل ما قرينا سابقا، ينصح بتناول الاوميغا ٣ لوحده، بسبب النظام الغذائي المشبع بالاوميغا ٦ و ٩.

- متل ما منعرف ، بالسوق موجود شي اسمو زيت سمك، و يلي بينباع من مختلف الشركات المحلية و العالمية و المهرب و الصيني كمان ، بس لازم ننتبه لشي. انو كلمة زيت سمك رنانة و عريضة و ما بتعبر ابدا عن مضمون الحبة ، يعني فرضا زيت سمك عيار ١٠٠٠ ملغ، ما بعيني انو فيو اوميغا ٣ ١٠٠٠ ملغ، لانو زيت السمك فيو كتير شغلات غير الاوميغا.

لهيك منروح عجدول المكونات و منقرا شو محتواه من اوميغا ٣ , ممكن يكون ٥٠ - ١٠٠ - ١٥٠ - ٣٠٠ - ٦٠٠ ملغ و هون الفرق بين الشركات، و تحت محتوى اوميغا ٣ بينكتب كمان تفصيله ، قديش EPA DHA فيو.