مصر فيها 8 مليون مريض سكر ، ممكن يكون والداك أو والدتك أو جارك أو صديق عندك ع الفيس المهم البوست دا عاوزين يعرفه كل مريض سكر في مصر
كلمتين هياخدوا من وقتك دقيقه قرآءه بالظبط :
للأسف بقينا نشوف شباب 19 سنه وفقد قدمه وهو عائل أسرة هيعمل إيه ! و بنت عروسة قمر بقت مقعدة على كرسى متحرك بسبب إهمال من نفسها أو إن ماحدش قالها الصح
و الكلام دا لأي حد ملوش علاقه بالطب أو طالب أو دكتور سكر ولو واحد بس إستفاد من الكلام دا فدا مكسب كبير لينا وليك عند ربنا لو أفدت حد مش عارفه ماتحرمش نفسك من ثوابه.... بسم الله
- إزاى أمنع مريض سكر إنه يجيله قدم السكرى ولا قدر الله يحصل غرغرينه و بتر ؟!
1- أي مريض سكر لازم يفهم أهمية متابعة السكر سواء بعمل جداول تحاليل بإستخدام جهاز قياس السكر العادى اللى لازم يبقى متوفر مع أى مريض سكر وخصوصا لو على أنسولين ولازم جدول التحاليل يحتوى على 7 تحاليل قبل الوجبات وبعدها بساعتين وقياس قبل النوم كل 3 أسابيع على أقصى تقدير لمدة 3 أيام متتالية وفى اللى ماشيين على أقراص بنعمل كل إسبوعين صايم وبعد الوجبة الرئيسية اللى هى بعد الغدا بساعتين.
2- لازم أي مريض سكر يعمل تحليل سكر تراكمى كل 3 شهور و الطبيعي يكون بين( 6.5 الى 7 % ) وممكن نوصل ل 7.5 في المية في الناس المعرضين لهبوط السكري وكبار السن ومرضي القلب.
3- لازم يعمل تحليل دهون كل سنه علي الأقل خصوصا تحليل الكوليسترول والأهم الدهون منخفضة الكثافة LDL والدهون الثلاثية TG
4- كل التوصيات العالمية أجمعت إن أى مريض سكر فوق ال 40 سنة لازم يمشى على دواء مخفض للدهون وخصوصا سكر النوع التانى بجرعة 20 مجم فى ال atorvastatin دا زي ال ator أو 10 مجم فى ال rosuvastatin زي ال crestor.
5- أي مريض سكر لازم يتعلم يفحص بطن رجله قبل النوم بمراية ويشوف أى جرح أو خدش لأنه دا ممكن يبقى بداية آفة القدم السكرى.
6- لازم يخصص فوطة نضيفة لتنشيف بين أصابع القدم بعد الوضوء أو غسل القدم ولو فيه فطريات بينهم لازم يعالجها لانها بتهرى الجلد وبتبقى مدخل للجراثيم وياريت مانستهونش بموضوع الفطر اللي بين أصابع القدم دا لأنه في معظم الأحيان للأسف بيبقي بداية القدم السكري.
7- لازم مريض السكر يرطب رجله بفازلين أو كريم مرطب عشان القدم الناشفة المشققة مدخل للجراثيم.
8- لما يقص ضوافره لازم مقص أطفال ويقص بالطول بلاش يعمل إنحناءات منعاً لاى خدش بسيط ممكن يبقى مدخل للبكتيريا.
9- فقدان الإحساس من أسوء الحاجات لمريض السكر فعشان كدا لو المريض مش حاسس برجله أو الشبشب بيتخلع منه بدون إحساس منه أو حاسس إنه ماشى على قطن لازم يشوف دكتور ماينفعش يستنى حدوث الكارثة.
10- ممنوع منعا باتاً إن المريض يمشى حافى حتى لو داخل البيت لأن دا ممكن يعرضه لأى شوكة أو عضمة أو أى حاجة هايفة تدخل رجله وتكون بداية لآفة القدم السكرى ودكاتره الأوعية الدمويه يحكوليكم عن حاجات لا تتخيلوها لقوها داخل أقدام المرضى فى الأشاعات بتاعتهم .
11- ممنوع لبس الشرابات اللى من ألياف صناعية لأنها بتكتم الرجل وبتعمل عرق وإحتكاكات ممكن تبقى مدخل البكتيريا.
ولما تشترى جذمه لازم تكون أوسع من رجلك نمره عشان رجليك بتورم
12- لازم المريض يقارن رجله ببعض لو لقى شعر رجل فيهم بيقع أو الجلد ناشف أو درجة حرارتها أقل من التانية لازم يشوف دكتور أوعية دموية بسرعة مايتاخرش.
طبيب الاوعية بيفحص النبض فى الشرايين وبيطلب اشعة على الاوعية الدمويه و يتأكد من سريان الدم بصوره طبيعيه في القدم
13- لازم قبل المريض ماياخد شاور وخصوصا لو بمياه سخنة حد يحس حرارة المياه او هو يحسها بكوعه ( الكوع مابيفقدش الاحساس ابدا) عشان نتجنب الحروق اللى بتحصل لكبار السن لفقد الاحساس بحرارة المياه.
14- فى حالة وجود التهابات أعصاب طرفية سواء شكشكة أو تنميل أو كهربا فى الرجل محتاج فيتامين ب المركب بس الأهم منه دواء alpha lipoic acid لأنه بيعيد تكوين غشاء العصب.
15- لو فى ألم أو وجع للرجل الأول نظبط السكر وبعد كدا عنده اختيارات قوية لعلاج الألم بترتيب التوصيات العالمية الاقوى والافضل والاغلى زي ال cymbalta وبدايله المصري وراه pregablin زي ال lyrica ولها بدايل كتيير وبعده gabapentin لمدة شهر أو شهر ونص وبنزود الجرعة تدريجيا.
16- البنات الآنسات بلاش الكعب العالى فى مريضات السكر لأنه بيركز ضغط الساق على كعب القدم وبيحمل عليها ودى الدم الواصل لها قليل أصلا فبيعمل قرح بتبقى مدخل للقدم السكرى neuropathic ulcer..
17- كل مرة تشوف مريض سكر إفحص قدمه وإستحمل ياعم ريحة الشراب وإعمله فحص اعصاب ممكن تبقي سبب في إنقاذ رجله من البتر بفضل الله
Comments
Post a Comment
اكتب تعليق حول الموضوع