بديل الدواء
بديل يعنى مادة فعالة مختلفة لها نفس الاستخدام العلاجى ،
انما لما يكون نفس المادة الفعالة ونفس التركيز لكن الشركات مختلفة ماينفعش نقول بديل ، بنقول " مثيل "
ببساطة المادة الفعالة الواحدة " الدوا " من حق أكثر من شركة تنتجه بتوصل لحد (١٢ شركة مختلفة ) ، وطبعا كل شركة بتنتجه باسم تجارى مختلف ، وطبعا بشكل علبة و سعر مختلف واللى يهمنا هنا فى ظل الظروف اللى احنا فيها (السعر) ده ،
مش بس بيتضحك على الناس للاسف من بعض المختصين فى المجال الطبى تحت مسمى البديل ، واعتقادا ان الدوا الموصوف هو الوحيد اللى هيعالج المرض ده وبس ! ، ده كمان ممكن يكتب لحضرتك دواء انتاج شركة مصرية سعره اغلى بكتير من انتاج شركة افضل وmultinational كمان ، وحضرتك مبسوط ومنشكح ولا انت دارى
هضربلك مثالين عشان تفهم قصدى ،
عندنا مضاد حيوى مشهور جدا اسمه (augmentin 1 gm) عبارة عن ١٤ قرص ، الدوا ده سعره النهارده ٦٤ جنيه مصرى
المحتوى بتاعه amoxicillin +clavulanic
الدوا التانى ، مضاد حيوى برده اسمه
، (Julmentin 1 gm)
عبارة عن ١٥ قرص ، الدوا ده سعره النهارده ٣٢.٤٠ جنيه مصرى و المحتوى بتاعه
Amoxicillin + clavulanic
وبالنسبة للشركات فالاتنين شركات غير مصرية و جودة المنتجين وتأثيرهم كويس جدا ، لكن بص لفرق السعر !! (يعنى الاتنين دول بنسميهم مثيل )
انت متخيل ،، فالفكرة ماتشقوش على نفسكم واسألوا بالله عليكم ، الموضوع مايستحقش كل العناء النفسى والتكلفة المادية فى اختلاف شركات المنتجة للدواء مش اكتر
انما لما اغيرلك الماده الفعاله ابقى قلى انت مديلى بديل
Comments
Post a Comment
اكتب تعليق حول الموضوع