السرطان

السرطان عبارة عن نمو للانسجة غير متحكم به. يعني خلايا بتضل تنمو ما بتوقف. هاي هي بكل بساطة. مثلا سرطان بالكبد عبارة عن خلايا كبد "خربانة" ما بتوقف عن النمو و بتضلها تكبر. و بتسير تخرب على الخلايا الكويسة. و بتضل تكبر لحد ما الكبد كله يخرب و يبطل يشتغل. هيك فكرة عمل معظم السرطانات. مثال اخر: سرطان الدم عبارة عن خاليا جذعية بالنخاع العظم بتنمو و بتخرب عمل الخلايا الكويسة. فالانسان ببطل عنده مناعة و لا خلايا دم كويسة. طيب السؤال هو: ليش لما نكتشف السرطان ما نشيله و خلص؟ الجواب بسيط. السرطان بالمراحل المتاخرة بنتشر لكل محل. مثل سرطان القولون بروح للكبد و الراتين. و ما بنقدر نشيل الراتين و الكبد و القولون. طيب السؤال الثاني: ليش ما نشيله قبل ما ينتشر؟ الجواب: لانه لما يكون صغير و ما انتشر عادة ما بكون اله اعراض. يعني الانسان ما بحس فيه. اكبر مثال : سرطان البنكرياس. ما اله اي اعراض الا لما ينتشر و يسير كبير كثير. يعني ما بنلحقه بالمراحل الاولية. السؤال الثالث: ليش هاي الخلايا صارت خربانة من الاول؟ الجواب: عدة عوامل و كل ورم اله اسباب تساعد انه الخلايا تخرب. مثلا الدخان بساعد خلايا الراتين تخرب. و الدهون بتساعد خلايا القولون تخرب. و مرات كثير بتخرب لحالها بدون اي سبب. لهاد السبب اي انسان معرض للسرطان. السؤال الرابع: في علاج اله؟ اه. في انواع سرطانات مثل سرطان الدم ALL بسير عند الاطفال و في ادوية اله و فعالة جدا. و مثلا سرطان الثدي صار اله دوا. بس طبعا لازم يكون بالمراحل الاولية و هو نساته صغير. عشان هيك في برامج توعية للنساء فوق الاربعين. عشان لو مسكناه على البدري، بنقدر نعالجه بدوا. بس في اورام ما بتستجيب للادوية كويس. مثل اورام الراتين و الجلد. و لذلك تعتبر خطيرة جدا.
الخلاصة: في اهمال مرات من الطبيب. ولكن في كثير من الحالات التشخيص بكون صعب للسرطان بالمراحل الاولى. لانه ما في اي اعراض. او في اعراض بس كثير خفيفة. مثل الم بطن خفيف. ممكن الدكتور يفكره اشياء كثير قبل ما يفكر بالورم.