حقن اكتمال الرئه للجنين

“حقن اكتمال الرئه للجنين”
يمكن دي الحقنه الوحيده اللي بتطلبها الست وبتستني تاخدها وبتفضل عايشه في قلق وبتفضل تسأل
انا هاخد الحقن امتي؟ .....انت ليه ما ادتنيش حقن الرئه يا دكتور ؟ ...... ده انا هولد بكره و ما اخدتش حقن الرئه وبنت خالتي بتقولي ازاي هتولدي من غير ما الدكتور يدهالك ؟ 
عشان كده لازم نفهم شويه نقط عن الموضوع ده
 اولا: ايه هي حقن اكتمال الرئه؟؟⁦
هي عباره عن حقن تحتوي علي كورتيزون بنسبه بسيطه ،
وبتتاخد عضل واشهر نوعين منها هما الديكساميثازون والبيتاميثازون .
 ديكساميثازون 6mg >>بتتاخد 4 حقن كل 12 ساعه
 بيتاميثازون 12mg >>> بتتاخد حقنتين كل 24 ساعه ⁦
 ثانيا: امتي بتتاخد الحقن دي ؟؟؟⁦
قصه استخدام الحقن دي مش اختراع حديث ،، القصه بدأت من سنه1972 لما العلماء وجدوا فايده عظيمه للحقن دي في منع مضاعفات بتحصل للاجنه ناقصي النمو نتيجه مشاكل التنفس وعدم اكتمال قدره الرئه علي القيام بوظيفتها بشكل طبيعي ومن وقتها تتابعت الابحاث عن فوايد الحقن دي واثبتت الابحاث فوايد كتييييير
 في العموم الحقن بتدي احسن نتايج ليها لما بتتاخد ما بين  الاسبوع 24 للاسبوع 35 من الحمل 
 لو في شك او نيه اننا ننهي الحمل في الفتره دي علي ان تكون الولاده في خلال  اسبوع من بدايه اخد الحقن 
 قبل الاسبوع 24 وبعد الاسبوع 35 فوايد الحقن دي غير مؤكده وبتختلف الحاجه ليها علي حسب رؤيه الطبيب المعالج وخطه العلاج ونوع الولاده
 ثالثا : ايه الحالات اللي هتحتاج تاخد الحقن دي ؟؟؟؟⁦
 مفهوم ان الحقن دي بتتاخد لكل الحوامل مفهوم خاطئ وللاسف منتشر (مش بونبوني هو )
الحقن دي بنديها في حالات معينه ومش روتين بيتعمل وخلاص وتوقيت اعطائها واسباب اعطائها مهمه للاستفاده منها
 الحقن ليها فايده عظيمه للجنين اللي هيتولد قبل 35 اسبوع من الحمل زي
 1- حالات الولاده المبكره اللي بيجلهم طلق مبكر او يوجد اتساع في عنق الرحم
 2- حالات انفجار كيس المايه (جيب المايه اتفتح )
 3-الحالات اللي مجبرين نولدها بدري زي حالات ضغط الحمل الشديد (تسمم الحمل) ،،، ضعف نمو الجنين نتيجه ضعف الدم الواصل ليه
 4-حالات الولاده القيصريه اللي اتحدد ليهم معاد ولاده قبل مرور 21 يوم من الشهر التاسع (قبل الاسبوع 39)☑☑ في دراسات ان اعطاء الحقن دي بتقلل من مشاكل التنفس عند البيبي بعد الولاده لو اتخدت في خلال الاسبوع السابق للعمليه
 رابعا: ايه فايده الحقن؟؟⁦
1- بتقلل من المشاكل التنفسيه عند البيبي بعد الولاده والحاجه للحجز بالحضانه واستخدام التنفس الصناعي لانها بتعمل علي اسراع اكتمال الرئه وظيفيا عن طريق انها بتشجع انتاج نوعين من الخلايا داخل الرئه واللي بدورهم بيحسنو قدره الرئه علي الانتفاخ بالهواء بعد الولاده وقدره الرئه علي تبادل الغازات
2- بتقلل نسبه النزيف بالمخ الوارد حدوثها للاجنه ناقصي النمو وبنتج عنها مشاكل كتير بعد كده في النموو التطور العصبي للطفل
3- بتقلل نسبه التهاب الامعاء الوارد حدوثه للاجنه ناقصي النمو وبتقلل نسبه الاصابه بالعدوي للاجنه ناقصي النمو خلال اول يومين بعد الولاده
 خامسا: هل في اضرار للحقن دي 
 في العموم كل الدراسات اكدت ان اعطاء الحقن دي لمره واحده ( كورس علاجي واحد مش المقصود جرعه واحده) خلال الحمل امن تماما للبيبي و الام
 تكرار اعطاء الحقن دي هو اللي عليه كلام ، عشان كده بنقول اننا مش بناخدها روتين وخلاص وخصوصا ان اقصي فايده للحقن لمما تتاخد في خلال الاسبوع السابق للولاده فبنخليها لوقت ما نحتاجها عشلن ناخد اقصي فايده للجنين واقل ضرر للام والجنين ونادرا ما بنحتاج نكرر الكورس العلاجي
 كمان لازم يبقي في حظر ومتابعه جيده للحالات المصابه بالسكر و العدوي لان الحقن دي بتصعب التحكم بالسكر وبتقلل القدره المناعيه للجسم والافضل ان الحالات دي تتحجز تحت المراقبه اثناء فتره اعطاء الحقن
 اه معلومه كمان ومهم تعرفيها واتكلمنا عليها قبل كده الا وهي ان الحقن دي طبيعي تقلل حركه البيبي اثناء اعطائها ولمده 24 ساعه من اخر جرعه ولمعلومات زياده عن الموضوع ده ممكن تراجعي البوست بتاع حركه البيبي