مرض شائع جدا في طب الفم

بل هو الأكثر شيوعا في امراض الغلاف المبطن للفم 

وبنقابله يوميا في عياداتنا 

وهو ال aphthous ulcers 

تقرحات الفم 

المرض ده معروف بحدوث تقرحات في الفم 

بتتقسم ل تقرحات كبيرة وصغيرة ( major and minor) 

وبيظهر في مختلف الانسجه المبطنه للفم 

من الخد الداخلي ... اسفل اللسان ... سقف الحلق ... اللثة 

دراسات إحصائية كتير جدا ... اتعملت عليه ما بين ٢٠ ل ٥٠ ف المئه من سكان العالم عندهم التقرحات دي بتحصل بشكل ( متكرر) 

الحقيقه ... أن المرض ده منتشر جدا .. ولكن عدم المعرفه بيه ف مصر منتشر اكتر واكتر 

المرض بينشأ نتيجه لحدوث تفاعل ( مناعي) يعني هو مرض مناعي 

وليس المقصود بيه نقص مناعه المصاب 

المقصود بيه ... أن خلايا الجسم 

بتهاجم خلايا الفم نفسها 

يعني ما فيش عدوى أو اصابه لا ب ( بكتيريا او طفيل او فايرس او فطريات) 

والسبب الحقيقي وراء حدوث التفاعل والهجوم المناعي ده غير معلوم لحد الان 

المرض سخيف جدا مزعج وخصوصا لما بيكون حجم التقرحات كبيره او متعدده ...بتوصل أن الإنسان ما بيقدرش يأكل أو يشرب ابسط الاكلات 

بس من نعمه ربنا ... أنه self limiting disease 

يعني ... المرض ده بدون تدخل ... بيخف ويختفي بدون ندبات لوحده وتلقائيا

مابين اسبوع ل اسبوعين 

والأطباء لاحظوا ..أنه العوامل اللى بتشارك في تكرار القرح دي 

( اوقات الضغط العصبي ... زي الطلبه وقت الامتحانات ..

وأوقات التوتر .. وفي بعض الأحيان عقب بعض الإجراءات في عيادة الأسنان )

طيب ليه انا بكتب عن الموضوع ده ؟ 

بصراحه دي اكتر استشارات بتجيلي اونلاين ... عن الموضوع ده 

وده اكتر مرض بشوف الصيادلة بيصرفوا عليه ادويه غير مناسبه نهائي له 

واغلبيتها Daktarin gel ومضادات الفطريات بمختلف أشكالها 

وانا هنا لا اعيب في الصيادلة ... كثيرا في أطباء بيكتبوا ادويه غير مناسبه للحاله 

ولكن هنا إقرار للواقع 

أن تقريبا شركات الادويه بتكسب على المنتجات دي 

في غير موضعها 

يعني المنتج مسوق نفسه بنفسه بالغلط 

احنا لسه كاتبين فوق أنه مرض مناعي وبيخف نفسه بنفسه 

وانه مش مرض فطريات اطلاقا

يبقي حضرتك كصيدلي لو مش عندك المعلومه ودلوقتي عرفتها .. وفضلت تصرفه 

ف هنا حرام تربحك .. منه بعد ما المريض وثق فيك 

فى حاجه هى بتخف لوحدها ... والمريض يتوهم أن الجل ده او الكريم هو السحر ! 

حاجه اخيره.... الناس العامه ... لو تقرحات الفم ظهرت عندك 

راجع طبيب الفم والاسنان 

علشان نقف على السبب 

فى تقرحات .. من نوع آخر بتحتاج أخذ عينات وفحصها باثولوجى لخطورتها 

وفى تقرحات بتنتج من اصابات ضروس مكسورة 

وكل نوع بيحتاج تكنيك وأسلوب مختلف فى السيطرة على مسار التقرحات 

والتقرحات الكبيرة منها .. بنحتاج حقن كورتيزون مش مجرد دهانات موضعيه فقط 

وفى أدوية بتقلل فترة الشكوى .. وبتخليك تعرف تاكل 

ولكن بعيدا تمامااااا عن ( مضاد الفطريات ) العجيبة دي