خرافات عن المرض النفسي و الطب النفسي

أنا مش مجنون 

اروح لدكتور نفسي ليه ،الناس هيقولو ايه ،مريض نفسي = مجنون لأ انا مش مجنون.

يعني أروح لواحد وادفعله فلوس عشان افضفض ما انا أعزم نفسي واصحابي عزومة حلوة وافضفض. 

ياعم مين ده اللي اديله كل أسراري .. اضمنه منين .

طب نفسي ايه و علاج نفسي ايه وانا كل مشاكلي سببها العين والحسد .

ده قرين ، ده جني ، انا قريت وسألت كتير ، دي كلها علامات المس ،انا ملموس .

رحت لكام( شيخ) وكلهم قالولي اني مسحور ،دوا ايه ده اللي هيفك السحر ودكتور مين ده اللي هيعالجني .

ياعم دول ناس بتوع قعدة عالشيزلونج وكلام كلام كله كلام .

الدكتور هيديك ايه يعني ؟! شوية مهدئات، طب وبعدين وبعد ما اهدا وانام ،مشاكلي هتتحل ازاي ؟!

دي مخدرات ياعم ،انا عارف كذا واحد خدوا ادوية ومن وقتها مش بيبطلوا دوا ،ادمنوها. 

كل الادوية دي مخدرة ،يعني أنا رايح اتعالج والا اتورط في مصيبة مالهاش حل ،لا ياعم خلينا بعيد .

دي ادوية بتلعب في الدماغ وتخللي الواحد ميعرفش يستغنى عنها .

لأ يا عم لأ ،اوعى تخليه ياخد الدوا ده ،الأدوية دي بتدمر المخ .

ماشفتش واحد راح لدكتور وخد علاج وبطله لازم تستعمله مدى الحياة .

أدوية ايه بس يا عم ،كفاية الرقية والعلاج بالقرآن، شفاء لكل داء .

واروح بقى اختلط بالمجانين، ده انا لو معنديش حاجة هتعدي منهم واتجن. 

وبعدين بعد كده لا حد هيحب يعرفني ولا يتعامل معايا ،كلهم هيخافوا مني ،معروف إن المريض النفسي خطير وعنيف. 

ياعم دكتور ايه ودوا ايه ، ده شوية زعل بيروحوا ،ده ضعف ايمان .

مريض نفسي يعني مجنون يعني مستشفى ودوائر ما تخلصش .

مريض نفسي يبقى خلاص عليه العوض في المستقبل والدراسة والشغل والجواز، عليه العوض في الحياة كلها .

إيه، كفاية والا نقول كمان؟

دي طبعا بعض الأفكار الشائعة للأسف عن المرض النفسي والمريض النفسي والعلاج والطب النفسي ، وعايز اقول انها وبرضه للأسف مش مرتبطة بمجتمعنا بس ولا بتحرم ناسنا احنا بس من فرص العلاج والحياة الأفضل . صحيح هيا متحورة شوية وزيادة عندنا شوية خصوصا في قرانا ومناطقنها الشعبية ، بس صدقوني حتى الناس اللي في أعلى المناصب والدرجات العلمية كتير منهم عنده شوية من المعتقدات دي إن مكانش كلها. دي كمان منتشرة والله في اوروبا والدول المتقدمة ، أي والله زي ما بقولك كده .

طيب يا عم الدكتور وبعدين معاك يعني انتا عايز تقوللي ايه

مبدئيا كده لازم نعرف إن عدد كبير من الناس اللي بيزوروا طوارىء أي مستشفى بيكونوا بيشتكوا من أعراض نفسية أو أعراض عضوية ذات منشأ ( سبب ) نفسي ومتستغربش لو عرفت ان بعض الإحصائيات بتوصل الرقم ده لتلت الحالات نفسية والا لأ التاني عضوية مرتبطة او ذات منشأ نفسي وتلت واحد بس اللي عضوي صرف . دول هما اللي بيقولوا والله مش أنا. 

ثانيا ومتتخضش برضه الإحصاءات العالمية ( مش عندنا بس والله) ، بتقول ان واحد من كل أربعة بيننا ممكن يعاني ف مرحلة من حياته من مرض نفسي ، ايوه زي ما بقولك كده واحد من كل أربعة one in four وده كان عنوان حملة من أكبر الحملات للقضاء على وصمة المرض النفسي . يعني وببساطة كده وعالمفتشر مافيش تقريبا أسرة أو بيت الا ف لحظة ما هيكون فيه حد عنده مشكلة نفسية أو بيشتكي من أعراض نفسية و كتير قوي من دول بيبقوا محتاجين المساعدة من طبيب نفسي او معالج نفسي ، لكن بتمنعهم الوصمة وكتير من الأفكار اللي عددنا بعضها في الأول دي من إنهم يدوروا عالمساعدة او يلجأوا لحد متخصص عشان يخفف من معاناتهم .