كل واحد ماشي في حياته وهو مكون جواه نظرة عن نفسه العلم بيسميها self theory او self concept

والمقصود ببها مجموع معتقدات الشخص عن نفسه 

هو كويس ولا وحش يقدر يعمل ايه وما يعملش ايه يستاهل ايه وما يستاهلش ايه

وبالتالي نظرة الشخص لنفسه ممكن تكون ايجابية او سلبية 

العلماء لقو ان حاجة الانسان لإنه يحس بالاتساق بين العالم بتاعه وبين نظرته لنفسه أهم من حاجته لانه يحس باحاسيس ايجابيه تجاه نفسه او تجاه العالم 

كمان حاجة الانسان لتوكيد نظرته لنفسه اهم من انه يغير نظرته دي لحاجة أفضل 

وهنا يجي دور ال negotiation of reality

او التفاوض على الحقيقة 

وده بقى عبارة عن أليات بيستخدمها الانسان عشان يشوه الواقع بحيث انه يحافظ على نظرته لنفسه ثابتة مهما اختلف الواقع 

يعني مثلا في الية اسمها نمط العزو والمقصود بيها كيفية تفسير الاحداث اللي بتحصل في حياتنا 

فمثلا لو واحد نظرته عن نفسه سلبية هتلاقيه بيرجع (بيعزو) أي حدث سلبي يحصله ليه هو ويحس انه هو المسؤول عن كل حاجة وحشة بتحصله في حياته وانه ميستحقش غير كدة  ولو حاجة ايجابية حصلت بيرجعها لأسباب خارجة عن ارادته زي الحظ والصدفة 

وده اسمه العزو السلبي 

أما الشخص اللي نظرته عن نفسه ايجابية بيعتبر أي حاجة سلبية تحصله انها حاجة طارئة وخارجة عن ارادته وممكن ينكر تماما مسؤوليته عنها وأي حاجة ايجابية بتكون ناتجة عن مجهوده وتخطيطه 

وده اسمه العزو الايجابي 

عيب العزو السلبي انه بيخلي الشخص قليل الحيلة كسول مش شايف نفسه يقدر يغير حاجة من الواقع بتاعه ومفيش اي حاجة هيعملها هتفرق وأحيانا بيكون فيه هدف نفسي خفي ورا العزو السلبي وهو ان الشخص يدي لنفسه عذر انه ما يبذلش مجهود عشان يغير الواقع بتاعه من غير ما يحس بالذنب 

عيب العزو الإيجابي انه بيكون خادع للشخص لأنه بيخليه ديما شايف نفسه افضل مما هي عليه في الحقيقة ومش بيخليه شايف نقاط التقصير في أداؤه وبالتالي ممكن تفوته حاجات محتاجة فعلا تتغير او تتحسن 

كمان من ضمن أليات تشويه الواقع هي ألية تحيز الإنتباه 

يعني مثلا لو حد بيتكلم عني وعن شخصيتي مش هنتبه غير للمعلومات اللي تدعم نظرتي عن نفسي

عشان كدة اللي نظرته سلبية عن نفسه مش بينتبه للمدح واللي نظرته ايجابية مش بيلتفت للنقد 

حتى في اختيار شريك الحياة بنختار اللي يأكدلنا نظرتنا عن نفسنا 

وده يفسرلنا ليه ناس بتختار انها تكمل مع حد بينتقدها وبيقلل منها من غير ما تحاول تعمل أي حاجة تغير الوضع ده 

وليه واحد بيسعى لانه يحاوط نفسه بالمطبلاتية والمعجبين 

وأحيانا بنجبر الأخرين انهم يأكدولنا فكرتنا عن نفسنا زي اللي بيتعمد انه يرتكب أخطاء عشان يتقال عليه وحش

أو اللي بيدعي مميزات مش فيه عشان يتقال عليه حلو 

قولي بقى بتعمل ايه عشان تشوه الواقع بتاعك؟