ازاى اعرف انى حامل
علشان نعرف الحمل عندنا عدة طرق ....
الاول ،(اختبارات الحمل) ...ودى بتعتمد على وجود هورمون معين اسمه HCG.
ودا بيكون ايجابى فى الدم حتى قبل مجئ الدورة القادمة بايام
طب فى البول ....تقريبا بعد 35 يوم من اخر دورة
وفيه تحليل دم رقمى وده بيحدد مستوى الهورمون وبكده ممكن نستفيد اننا ناخد فكرة عن قوة الحمل او نموه وبيفضل يعاد بعد 48 ساعة ولو تضاعف الرقم يبقى الحمل كويس ولو الرقم عالى جدا لازم نتوقع الحمل العنقودى وهكذا ....
الفحص الثانى هو ( الاشعة التليفزيونية )
ودى نوعين
السونار المهبلى ...ودا ممكن يكتشف الحمل لغاية 35 يوم
السونار ثنائى وثلاثى ورباعى الابعاد ...دول عن طريق البطن بعد 35. يوم
غير كده فيه فحوصات اخرى بس نادرا ما نحتاجها كاشعة الرنين او اشعة x.
طب سؤال ...ممكن تحدث اخطاء ...؟
بالقطع ممكن بس نادرة
لو اختبار الحمل طلع سلبى بيعاد بعد اسبوع للتأكد
طب لو طلع موجب والاشعة مفيش حاجة فى الرحم ؟
دا سؤال مهم جدا جدا لان ممكن يكون الحمل خارج الرحم وفى الحالة دى طبيبك بيعمل فحوصات كتيرة للتاكد ...
كده يبقى الافضل الجمع بين الفحوصات حسب الحالة ودى نصيحة لشباب الاطباء ....
لو اختبار الحمل سلبى يعاد بعد اسبوع
لو موجب والرحم فاضى اياك تستبعد الحمل خارج الرحم
لو مستوى الهومون عالى جدا اياك تنسي الحمل العنقودى
لو التحليل الرقمى لا يتضاعف بعد ٤٨ ساعة توقع مشكلة اجهاض حمل خارج الرحم ...الخ
بعد كل ده يبقى فيه سؤال ملح ....؟
ما هو الفحص الوحيد للتاكد من الحمل بنسبة ١٠٠%؟
الاجابة الصحيحة
ان السيدة تلد طفل
وان كان الغالبية اعتمدوا رؤية جنين متحرك ينبض بالاشعة التليفزيونية
Comments
Post a Comment
اكتب تعليق حول الموضوع