هو ممكن راجل يعمل اختبار حمل؟

طبعاً لو سمعنا الجملة دي معظمنا هيقول لأ، وبعض الناس ممكن تقول اه وليه لأ في الدول الغربية دلوقتي الراجل بيحمل ويولد  

وعشان نجاوب على السؤال ده لازم الأول نعرف إيه هو اختبار الحمل وبيتعمل امتى وبيدل على إيه وهل في أسباب تانية لارتفاعه غير الحمل⁉️. 

 اختبار الحمل HCG

هو اختبار بيقيس مستوى هرمون موجهة الغدد التناسلية المشيمائية البشرية Human chorionic gonadotropin، والهرمون ده في الحالات الطبيعية بيتم إفرازه من خلايا المشيمة اللي بتغذي الجنين طوال فترة الحمل. 

  أنواع اختبار الحمل:-

  اختبار الحمل في البول 

يكشف عن وجود هرمون الحمل HCG في البول،لأنه بعد مرور من 6 إلى 14 يوم من تلقيح البويضة ترتفع نسبة الهرمون في البول بنسبة كافية للكشف عنه. 

  يُفضل إجراء التحليل في الصباح لأن البول بيكون أكثر تركيزاً. 

  اختبار الحمل في الدم 

 ودة بينقسم لنوعين اختبار حمل كيفي واختبار حمل رقمي 

  اختبار الحمل الكيفي qualitative 

ودة بيكشف عن إذا كان هرمون الحمل موجود ولا لأ، ونتيجته تكون إما إيجابي أو سلبي. 

 اختبار الحمل الرقمي quantative 

دة يُعد أدق فحص لأنه بيقيس هرمون الحمل حتى لو كانت الكمية قليلة جداً، وممكن يساعد الطبيب في تحديد العمر التقريبي للجنين. 

 بيتضاعف مستوى هرمون الحمل في الدم غالباً كل 48-72 ساعة في الحمل الطبيعي. 

  لذلك ممكن نلاقي الطبيب طلب يتعمل تحليل حمل رقمي مرتين، ويحدد إجراء تاني مرة بعد مرور 48 ساعة على إجراء التحليل أول مرة ليُقارن بين النتيجتين. 

  إذا كانت النتيجة في الحمل الرقمي أقل من 5 وحدة دولية/لتر ده معناه إن النتيجة سلبية ومفيش حمل. 

 الحمل الرقمي بيطلبه الطبيب لو شك في حمل خارج الرحم أو احتمالية إجهاض الجنين. 

 الشروط اللازمة قبل اختبار الحمل 

- لا يشترط صيام قبل التحليل. 

- يُفضل إجرائه بعد غياب الدورة الشهرية من 3 أيام لأسبوع.

-الامتناع عن بعض الأدوية اللي ممكن تعطي نتيجة إيجابية أو سلبية خاطئة مثل: أدوية علاج العقم أو علاج مرض باركنسون، أو أدوية مضادات الذهان، أو تناول أدوية مدرات البول بكثرة، أو منومات. 

 أعراض ارتفاع هرمون الحمل 

-تأخر الدورة الشهرية 

- تقلصات الرحم 

-ألم الثدي 

-الغثيان

-فقدان الشهية 

-كثرة التبول 

-التعب وإلارهاق الشديد

 أسباب ارتفاع هرمون الحمل لغير الحامل 

- استخدام بعض الأدوية. 

-الحمل خارج الرحم.

- تكيسات المبايض. 

- الإجهاض من فترة قصيرة.

-خلل في الغدة النخامية. 

- فرط نشاط الغدد التناسلية.

-الإصابة ببعض أنواع السرطانات مثل سرطان المبيض والثدي.

-الإصابة بسرطان الخصية لدى الرجال.

 ومن هنا كانت الإجابة نعم من الممكن إجراء اختبار حمل للرجال، لأنه بيساعد على اكتشاف المبكر لسرطان الخصية.