نشوف في حالات هلبة نساء حوامل ياخدوا في إبر سيولة بسبب الكورونا ، البعض منهم تأخذ في جرعة 6000 مرتين وهذه جرعة قوية نعطوا فيها لحالات جلطات القلب وأوردة الساقين والرئتين ..
على سبيل المثال .. امرأة في الشهر السابع تحليل التخثر تبعها 1200 ووضعها الصحي من ناحية الكورونا وأكسجينها تمام وتتحرك وتاكل وتشرب زي الناس ،، تلقاها تأخذ في إبر سيولة ..
تخيل جرعة عالية وهى في الأساس ما تستحقش إبر سيولة نهائياً ، وسعر الحقنة حوالي 40 دينار .. وكل 3 أيام تعاود في التحليل اللي حقه حوالي 70 دينار ..
كل اللي فات ممكن يتعوض ، لكن هل تعلم زميلي الطبيب أو فني المختبر أو الصيدلاني ،، أو حتى عزيزي المواطن اللي ما شاء الله تفهم في كل شي.. لأن للأسف بعض الحالات تلقاها واصفتهولها صديقتها أو قريبتها ..
هل تعلم أن تخليل التخثر في الحمل طبيعي يرقى في بعض الحالات نتيجة الحمل نفسه ويزيد مع مرور الحمل ،، وحضرتك تزيد في الجرعة كل ما تلقاه راقي ..
والأنكى من هكي هل تعلم أن إبر السيولة اللي تعطي فيهم مرات يسببوا نزيف ما قبل أو أثناء أو ما بعد الولادة !
هذا مثال بسيط على التحليل هذا ، وفيه تحاليل تانية هلبة الناس تترجم فيها غلط ..
في الطب كل تحليل ليه خصوصيته ولازم يتقارن بالحالة نفسها والعلاج لا يتوقف على التحليل فقط ..
No comments:
Post a Comment
اكتب تعليق حول الموضوع