التسمم عند القطط والكلاب، واللي تايكون غالبا بسبب امور اللي الواحد ماكاينتابهش ليها اصلا.

القطط والكلاب تاتسمم عن طريق الأدوية البشرية بحال :

الباراسيتامول Paracetamol (دوليبران مثلا)

الايبوبروفين Ibuprofen (بروفين مثلا)

الأسبرين Aspirin (اسبرو ولا اسبيجيك مثلا)

هاذو كاملين قادرين يقتلو الحيوان مسكين واخا مولاه غايسحابليه راه غير باغي يعاونو.

والتسمم تايكون عن طريق الاكل، مثلا :

الثوم

البصلة

بذور التفاح

الشوكولا

المشروبات الكحولية

وغيرها الكثير

وطبعا مواد التنظيف وسموم الحشرات بحال بايجون مثلا وسموم القوارض بحال كينة الفار مثلا راه كلهم سامين بالنسبة للحيوانات.

دابا عرفنا شنو هوما السموم دابا خاص العلاج طبعا

الشيء الأول اللي غاديرو ايلا لقيتي كلب ولا قط مسمم هو تهزو للبيطري بالزربة باش يضرب ليه ليبرة ديال الاتروبين atropine ويدير ليه السيروم ويدفيه بشكل كافي ويعطيه جميع الامور اللي خاصاه.

وايلا ماكانش الطبيب غاتشوف شي متخصص فالرعاية الصحية يوفرهاليك ويديرها للقط ولا الكلب سوا تحت الجلد ولا فالعضلات ولا فالعرق ديريكت. ماعمرك تحاول تديرها لراسك بدون إرشادات شخص متخصص سواء كان منقذ حيوانات من فريقنا ولا طبيب بيطري عن بعد ولا شيواحد خبير فالمجال.

سينون ايلا ماكانش غاتجيب Eucarbon من الفرماسيان ولا شيواحد بحالو، غاتذوب 2 حبات لكل كيلو من الوزن ديالو فربع كاس ديال الما وتعطي للقط 1 ميليلتر لكل كيلو من الوزن ديالو كل نصف ساعة حتا تسالي الكمية. يعني يلا القط فيه 3 كيلو غاتذوب 6 حبات وغاتعطيه 3 ميليلتر كل نص ساعة حتا تسالي الكمية

ايلا القط فيه 1 كيلو ولا اقل غاتذوب 2 حبات وغاتعطيه 1 ميليلتر كل نص ساعه حتا تسالي الكمية.

ايلا ماكانش متوفر اوكاربون غاتطحن الفاخر مزيان شي 50 جرام منو مع كاس كبير ديال الما وتزيد فيه 5 ملاعق كبيرة ديال زيت الزيتون وتعطيه بنفس طريقة اوكاربون. 

وماتنساش بلي فحالات التسمم كل دقيقة تاتفوت تاتكون فارق بين الحياة والموت. ماتتعطلش وهاهو التريتمون بالتفصيل عندك دابا ضونك تاواحد ماعندو شي حجة باش يتهرب من المسؤولية.