سيستيسيركوس بوفيز

 

الصورة دي مش صورة ذبيحة مصابة بالسل، لكن ذبيحة مصابة بحاجة اسمها (cysticercus Bovis) أو بالعربي "سيستيسيركوس بوفيز" ودي معناها حويصلات الدودة الشريطية اللي بتصيب الأبقار، طيب هل دي حاجة خطيرة؟ طبعا خطيرة، لأن البويضات دي بتكمل دورة حياتها جوه جسم الإنسان اللي بيعتبر العائل الثاني لها، و لما بتفقس في الأمعاء بتطلع الدودة الشريطية اللي بتسبب مشاكل كتير جدا زي أنها بتسد الشرايين و بتوصل للقلب و الرئة ، وكمان ممكن تسبب العمى و الوفاة في بعض الحالات. طبعا لما الحيوان بيذبح في المجازر، بيتم إعدام الذبيحة علطول، لكن المشكلة بتكمن في الجزارين اللي بيدبحوا خارج المجازر، واللي في منهم مش بيعدموا الدبيحة لو مصابة مع الأسف. 

ممكن كمان لو الصورة دي للحوم أغنام، فيبقى الإصابة بحاجة اسمها "(cysticercus ovis) أو بالعربي "سيستيسيركوس أوفيز" و دي معناها حويصلات الدودة الشريطية اللي بتصيب الأغنام و الماعز، طيب هل دي حاجة خطيرة؟ طبعا هي مش بنفس خطورة لحم الأبقار لأن الانسان مش عائل ثاني لها، بمعنى إن البويضات المتحوصلة دي مش بتفقس جوه أمعاء الانسان لكن بتخرج مع البراز، لكن مع ذلك الذبيحة دي بتعدم في المجازر لو ظهرت فيها الحويصلات دي لأن اللحمة في الحالة دي بتكون ذات جودة منخفضة. طب و إيه المشكلة يعني لما آكل لحمة جودتها منخفضة، لأ طبعا فيه مشكلة، المشكلة ان اللحمة بتكون مليانة سموم من البويضات دي، و كمان البويضات دي بتمتص الأحماض الأمينية و الإنزيمات اللي موجودة في اللحمة، فأنت في الحقيقة بتاكل و لا حاجة. 

أومال إيه موضوع السل بقى؟ السل بقى ده موضوع تاني خالص مالهوش علاقة بالمرض ده، حويصلات السل بتكون زي قطع الحجارة و بتكون مبيضة و أحيانا فيها صديد و بتظهر في الغدد الليمفاوية و الرئتين و الكبد، و لو وصلت للحم أو الجلد بيكون الحيوان بيموت خلاص. ففي المجازر لما بيفحصوا الغدد الليمفاوية و الرئة و يلاقوها بردو بيعدموا الذبيحة علطول