التهاب الحلق عند الاطفال ...

 التهاب الحلق نوعين ..

 النوع الاول ( التهاب الحلق الفيروسي )....

- طبعا هادا يصير هلباااا .. يعني نسبة 85 ل 90 %  من حالات التهاب الحلق تكون فيروس .

- وطالما فيروس معناها مش حنعطو مضاد حيوي للعيل .. لانه الفيروس مايموتش بالمضاد الحيوي .. ( مفروض تتعلق لافتة في الشوارع )

- اهم حاجات ف العيل ونعرف بيهم انه التهاب الحلق فيروسي ( وباش مانعطوش مضاد حيوي ) 

1 - غالبا الكحة وسيلان الانف يكون السبب فيروس ..

2 -  غالبا احمرار العيون وتلقاهم يدمعو هادا فيروس  ..

3  - غالبا تلقى الحلق احمر ومحتقن وماتلقاش بقع بيضاء ف الحلق ولا صديد ...

4 - التهاب الحلق الفيروسي مايفوتش اسبوع .. ويمشي بروحه بدون اي علاج ..

* النوع الثاني ( التهاب الحلق البكتيري ).. 

- هادا مايصيرش هلبا .. يعني النسبة من 5 ل 10 % من حالات التهاب الحلق تكون بسبب بكتيريا ( العقدية بالذات ) ..

- الحاجات هادم لو لقيتهم ف الطفل معناها السبب بكتيريا ومرات نعطو مضاد حيوي ...

1 - حرارة عالية هلبا .. توصل لل 40 مرات .

2 - غالبا يحس الطفل بوجع في الحلق ..

2 - تلقى طبقة بيضاء ع الحلق ومرات صديد ..

3 - مرات يصير تضخم للعقد الليمفاوية في الرقبة ..

4 - مرات يصير طفح جلدي على الجسم ..

- طبعا الالتهاب اللي يصير بسبب بكتيريا لازم يتعالج لانه مرات يسبب مشاكل اكبر وتوصل حتى للحمى الروماتزمية ومشاكل ف صمامات القلب ..

* باهي كيف نعالجو التهاب الحلق ..

* اول شي مفروض انه نعرفو التهاب الحلق اللي عندنا هل هو صار بسبب فيروس او بسبب بكتيريا .. ونقدرو نعرفو هالشي بطريقتين ..

- يا اما ناخدو مسحة طول من الحلق ونبعتوها للمعمل وهو يطلعها بكتيريا او لا ..

- يا اما الدكتور لما يكشف ع الحلق ومن المنظر متاع الحلق حيعرف بكتيري او فيروسي .. 

- ( باهي لو طلع الالتهاب فيروسي ... )

- لو طلع بسبب فيروس اهم شي مانعطوش مضاد حيوي .. 

ولكن حنعطو ..

- سوائل دافية باش تخفف الاحتقان . 

- غرغرة بمية دافية وملح ..

- لازم نهتم بالحرارة وندير كمادات ونعطي شروبو الحرارة و نصبر اسبوع ع العيل لين يبرا .

- في بخاخات للحلق تنقص الالم وتنحي الاحتقان .. 

- حبوب الحلوى الحارة .. طبعا للكبار مش للاطفال ..

- ( باهي لو طلع الالتهاب بكتيريا ..)

- لو العيل اول مرة ممكن نبدا مضاد حيوي طول ونعطي خافض حرارة .. 

- لو العيل ديما يشكي من التهاب الحلق البكتيري مفروض ناخدو مسحة من الحلق ونبعتوها مزرعة باش نعرفو نوع البكتيريا بالذات ونعطوها المضاد اللي يمشي معاها بالضبط ..

وطبعا حنعطو العلاجات العادية زي السوائل الدافئة والغرغرة والبخاخات للحلق ..

في بخاخ ممتاز للحالات المتكررة ..

- يعني لما يمرض طفلك بالتهاب الحلق .. استعملي البخاخ هدا 

- ميزته فيتامين سي وشمع نحل وهلبا حاجات مفيدة وتزيد المناعة ..

- وميزته يمشي حتى مع الكحة اللي تصير ف التهاب الحلق وينحي بحة الصوت ..

- وميزته يمشي مع الصغار اللي مايتقبلوش ف الدواء ويرجعو فيه .. 

- البخاخ ينعطى بعد عمر 6 شهور ..

بختين مع بعض 3 مرات ف اليوم مدة 5 ايام ..

* الشروبو ينعطى بعد عمر السنة ..

5ملي مرتين في اليوم لمدة 5 ايام وكويس للاحتقان والكحة