ك عادتنا في صيدليات المجتمع بننبه لمسألة تداخلات الادوية مع الادوية او الاطعمه،او الامراض،او الاطعمه مع الاطعمه وهكذا:

بمعنى انو في (تشابك) عديل كده بين الدواء والدواء الفلاني بيكون ليهو اثر على صحة المريض،ي تقليل فعالية،ي ظهور اثر جانبي وخيم، ي موت...وركز معاي في موت ددي ،لانو موت حرفيا وعديييل كده. 

طيلة دراستنا في بكلاريوس الصيدلة بناخد اي معلومات فيما يخص الدواء،وكذلك الامراض،وعندنا القدر الكافي من الذخيرة اللي بتخلينا ك صيادلة نفتي في امر الدواء دون غيرنا،فما من حق زول يتكلم عن الدواء في وجودنا ابدا".

عندنا مواقع علمية،او مصادر زي الكتب،او خطط علاجية محدثة بناخد منها معلوماتنا بخصوص التداخلات دي،وبتتحدث.دوريا،وكل مرة بيظهر تداخل جديد.

التداخلات دي مصنفة ك التالي:

أ: ده بيعني انو ماف اي تدخل

ب:بيعني انو في تداخل بس مالدرجه الضرر.

ج: بيعني انو في تداخل وبيحتاج(ضبط) ومتابعه لصيقه للمريض في المستشفى

س: ممنوع منعا باتا" استخدام الدوائين ديل مع بعض لانو (ممكن يتسببن بي موت) حرفيا كده،وضرر بالغ للمريض. 

ودي مثال ليها استخدام (دوائي) الفلاجيل (علميا بنسميهو ميترونيدازول) ودواء(الديدان الدبوسيه) علميا بنسميهو (ميبنداوزول). 

للاسف نحن السودانيين عندنا ثقافه خاطئه في استخدام المضادات الحيوية زي الفلاجيل والادوية عموما،وعايزين دور مكثف للتوعية في الناحية دي وده شغل جميل حاليا بقومو بيهو ناس صفحة التلات حبات ما علاج للنزله.

الاستخدام العشوائي للادوية ده،جاي بسبب تهاون مثير من الصيادلة في الصرف للادوية اللي ما بتصرف الا عن طريق الروشتة الطبية.

وكذلك لوجود دخلاء المهنه زي ناس التلت شهور والست شهور ديل.

ف بتلقى اي واحد عندو وجع بطن بمشي الصيدلية بقول داير فلاجيل بدوهو ليهو،غالبا اللي بيدي فلاجيل من غير فحص.ده ي زول ست شهور ساي،ي صيدلي مافاهم شغلو كويس .

لانو حتى الاسهالات اسبابها كتيرة وعلاجاتها بتختلف من زول لي زول...

وللاسف ناس الست شهور ديل ما بياخدو وقت زاتو عشان ينصحوك انك تمشي افحص،همهم الاول والاخير هو الايراد،وماعندهم شغلة بي تداخلات ادوية ولا بعرفوها اسااسا،وكل البعرفوهو عنها هو مجرد ثقافه ليس الا.

اها انا مشيت صيدلية من الصيدليات وقلت اعمل ليهم(جس نبض) ،جيت سلمت عليهم، ازيكم،انا داير فلاجيل..ادوني ليهو من غير سؤال اساسا، قلت ليهم ادوني ميبنيدازولميبنيدازول(حق الديدان الدبوسية).

شالوهو وادوني ليهن سريع سريع.

التصرفين ديل خاطئات تماما،الاول انو صرف المضادات الحيوية الصح ما يتم الا بي فحص مهما تعددت الاسباب.

التاني انو في تداخل مميت ومصنف(س) زي ما قلت ليكم فوق انو مميت حرفيا،بين الميبندازول دواء الديدان الدبوسية والفلاجيل (ميترونيدازول).

البنات اللي كانن واقفات في الصيدلية غير صيدلانياات(البتة)،دارسات كورسات كذا شهور،بيتعاملن مع الصيدلية زيها وزي اي بوتيك، اكيد اتسببن بي ضرر لفئات كتيرة وما جايبات خبر للاسف،ودي امانه ربنا بسألهم منها يوم القيامه. 

النوعية دي من التداخل بتعمل نوع من انواع الحساسية بسموهو علميا" SJS ود قاتل جدا،وبحتاج عناية مكثفه لحالة المريض،عشان مايروح فيها.

ومن هنا بنصح اي زول بيمشي الصيدلية وبقول عايز الدواء الفلاني من غير روشتة،انو ده تصرف خاطيء.

ولو جيت بي روشتة والصيدلي سألك هل بتستخدم ادوية تانية او لأ،اديهو الجواب،لانو فعلا في ادوية بتتداخل مع بعض وكتيرة جدا"،وهو عندو العلم الكافي البخليهو يفتي ليك في المسألة دي.

للاسف ناس الست شهور ديل ياما اتسببو في تداخلات ادوية مع ادوية،ومع امراض،واطعمه،يبيعو ويشترو،ويتعاملو مع الدواء زيو وزي الحلاوة، ما حاسين بمعاناة الناس،واللي بشغلوهم استغلالييين جدا للاسف. 

الصورة ب الاسفل لمتلازمة (ستيفن چونوسن) اللي بسببها تداخل دوائيي الفلاجيل ودواء الديدان الدبوسية.