ألتهاب وحساسية القصيبات الهوائية عند الأطفال الرضع.

 

,,,,,,,اروح للمستشفى الأطفال الرضع الي اقل من سنتين كلها أتگح،ارجع للعيادة الاطفال كلها أتگح،ارجع للبيت ابني ايگح، افتح الصفحة الگه عشرات الاستشارات اطفالنه اتگح.

شنو السالفة؟ راح اشرحلكم.

,,,,,,,,كل سنة بالشتاء وبداية الربيع اكو مرض ينتشر بصورة كبيرة جداً، اسمه التهاب القصيبات الهوائية. (bronchiolitis )،وهو عبارة عن التهاب فايروسي يصيب القصيبات الهوائية الشعرية الموجودة داخل الرئة، سببه فايروس، والفايروس الاكثر شيوعاً هو فايروس اسمه الفايروس المخلاوي التنفسي RSV، يتكاثر هذا الفايروس وينتشر بسرعة بين الأطفال الرضع وخاصة تحت عمر السنة،وهو شديد العدوى يعني بسرعة ينتقل من طفل للآخر, عن طريق الرذاذ المتطاير بالگحة والعطاس وعن بعد حتى ثلاثة أمتار ، او عن طريق لمس الأغشية المخاطية للعين والأنف والفم باﻷيادي الملوثة .

,,,,,,,,الأعراض:

تبدي الاعراض ب نشلة خفيفة وگحة بسيطة وارتفاع خفيف بالحرارة  بعدها بيومين أو ثلاثة تبدي الگحة ازيد تدريجياً والطفل يصير نحس وبس يبچي وتقل رضاعته ونومته ويتسارع ويضيف نفسه ويريد يتنفس ما يگدر  ، تزداد هاي الاعراض باليل، وتختلف هاي الاعراض بالشدة  من طفل لآخر ،وكل ما قل العمر  زادت الاعراض( خاصة الأطفال تحت ال ٦ أشهر)، واذا كان اكو تحسس عند الطفل ايظا راح ازيد الاعراض.

,,,,,,,,,زين دكتور طفلي ايصير زين لا؟؟

تستمر الأعراض عادة اسبوعين اتكون قوية اول اسبوع ثم تبدي اتقل شوية شوية واتروح، حوالي ٩٩% من هاي الحالات تتماثل للشفاء، يعني صح تشوفون الطفل متأذي واعراضه اطول بس أن شاء الله ايصير زين  ولا داعي للقلق.

,,,,,,,,,,التشخيص : 

دائماً ما ايكون سريرياً يعني عن طريق الفحص،وبعض الأحيان يحتاج الطبيب إلى أخذ الرقائق الشعاعية،واجراء بعض التحاليل المختبرية.

,,,,,زين اشلون ممكن انعالجه:

,,,,,,,,أولا: تنظيف الانف عن طريق القطرات التي تحتوي على نورمال سلاين حتى يتنفس الطفل براحته.

,,,,,,,,ثانياً: الأوكسجين،مهم جدا للاطفال الي يعانون من ضيق وتسارع في التنفس وخاصة الي تحت ال ٣ أشهر. 

,,,,,,,,,ثالثاً :تبخير الفنتولين، كلش مهم يساعد على توسيع القصيبات الهوائية، واذا كانت أعراضه مو قوية يمكن نكتفي بالفنتولين شراب (نفسه ال بيوتادين). اما خرافات الحجيات الي اتگول يتعود عليه وما أريد أعلمه فمالها وجود بالطب.

,,,,,رابعاً: إعطاء المحاليل الوريدية (المغذي الوريدي) للاطفال الي ما يگدرون يرضعون والي يعانون من تسارع في التنفس والي يعانون من تقئ، لمنع أصابتهم بالجفاف.

,,,,,,,خامساً: الستيرويدات مثل ال هايدرو كارتيزون وال ديكادرون لا فائدة منها إلا إذا كان هناك وجود تحسس أو ربو قصبي عند الطفل.

,,,,,,,,,,,سادسا: المضادات الحيوية لا فائدة منها،لان اغلب الإصابات فايروسية، ولا تحتاج إلى مضاد حيوي ،الا اذا كان هناك التهاب جرثومي ثانوي وهاي يحددها الطبيب المختص.

,,,,,,,,,سابعاً: الابتعاد عن مضادات السعال لان السعال هو طريقة دفاعية تفيد الجسم للتخلص من المواد المخاطية والفايروسات الموجودة داخل القصيبات الهوائية وطرحها للخارج.

,,,,,,,,,هل التهاب القصيبات الشعرية هو نفسه تحسس أو ربو الأطفال؟

لا طبعاً،اكو فرق بين المرضين، فالتحسس يشخص بكل الاعمار ودائماً ما يسبب بنوبات من الصفير أو ألازيز  المتكرر بالصدر،ربما التهاب القصيبات الهوائية نادراً ما يحدث بعد عمر السنتين ودائماً ايكون وياه سيلان بالانف  واصخونة خفيفة.

ولكن الأطفال الي عدهم تاريخ مرضي بالإصابة بالتحسس أو الربو القصبي أو عندهم حساسية بالانف أو اكزيما بالجلد أو سعال متكرر بين فترة وأخرى هيچ اطفال دائما ايكون التهاب القصيبات مهيج للحساسية مالتهم، واكو بعض الدراسات اتگول الأطفال الي ينصابون بالتهاب القصيبات الهوائية أكثر عرضة للإصابة بالربو القصبي مستقبلا.

,,,,,,الوقاية

,,,,,,,,,أولا عزل المريض المصاب ،والابتعاد عن ملامسته.

,,,,,,,ثانياً الإكثار من الرضاعة والسوائل الدافئة واعطاء البرتقال ، والعسل (للاطفال فوق عمر السنة).

,,,,,,ثالثاً غسل اليدين ثم غسل اليدين ثم غسل اليدين بصورة جيدة.

,,,,,,,,رابعاً:اذا كان هناك تحسس أو ربو قصبي عند الطفل فننصح بالابتعاد عن التدخين .

دكتور مو ابوه يدخن بره مو يم الطفل ،اي امي بس الريحة مال الجگاير تبقى بالملابس مالته ومن ايشيل الطفل راح يشتمها،يعني لازم الأب المدخن ايبدل ملابسه وياخذ حمام يالا ايشيل الطفل. وكذلك الابتعاد عن العطور والبخور والمنظفات والتراب ولقاح النباتات والوبر والصوف .

,,,,,,,خامساً:اذا ابنك مريض لا تطلعين بي ترى جاية موجة برد قاسية، والهواء الجاف البارد ممكن ايزيد من أعراض وشدة المرض.