ألم كعب الرجل

 هكلمكم انهاردة عن شكوي متكررة في العيادة وهي (ألم كعب الرجل) أو بيسموها أحيانا (الشوكة العظمية)

المرض ده اسمه العلمى ..إلتهاب اللفافة الأخمصية 

وهو ببساطة عبارة عن نسيج ليفي بيحمي باطن القدم من كعب الرجل لأصابع القدم ...وهو مهم لانه بيمتص الصدمات أثناء الجري والمشي 

لكن بعض المرضي لما بيحصل حمل زيادة أو جري أو مشي كتير ...بيحصل فيه تمزقات وإلتهابات..وهو ده الألم اللي المريض بيشتكي منه ...وبيكون مميز جدا بإنه أكثر ما يكون و المريض بيقوم من النوم ..أو يقف بعد فترة قعاد كبيرة  

طب فين الشوكة في الموضوع؟ 

الحقيقة ان الشوكة دي موجودة في كل واحد من عشر أشخاص طبيعية

ومن الأشخاص اللي عندهم الشوكة واحد فقط من كل عشرين هو اللي عنده ألم الكعب

  يعني طلع إن الشوكة دي مش هي مصدر الألم زي مكان معروف زمان ...وكمان ثبت أن الألم  ناتج من الالتهابات والتمزقات في اللفافة الأخمصية ومش بسبب الشوكة  

   عشان كده مبقاش حد بيعمل عمليه إنه يشيلها

  طب إيه سبب الالتهاب ده؟

1  زيادة الحمل علي الغشاء ده بزيادة الوزن

 2 المبلغ في أداء تمارين الوثب والجري 

3 وجود تيبس في عضلات السمانه الموجودة ورا عضمة الساق🦵

  أما بالنسبة لتشخيصها بيكون بالفحص عند الطبيب ومش بيحتاج المريض إنه يعمل أشعة الا لو الطبيب شك في سبب تاني للألم غير إلتهاب اللفافة الأخمصية 

  نيجي لأهم حاجة وهي العلاج  

أولا .....كتير جدا من المرضي بيستجيبوا للعلاج التحفظي وهو إيه

1 تقليل الوزن ... الراحة و تقليل الوقوف والمشي لفترات طويلة أو الجري

2 عمل تمارين لعضلات السمانة وتقويتها ...وتمارين شد لباطن القدم (ودي ممكن تلاقوها في فيديوهات علي اليوتيوب

3  كمادات الثلج مرتين لثلاثة يوميا ..وطريقتها انك تيجب زجاجة ماء صغيرة مثلجة وتمشي القدم عليها رايح جاي

4 لبس وسادة سليكون أثناء المشي

5 أدوية مضادة للالتهاب

6 العلاج الطبيعي ...ومؤخرا في نوع من العلاج اسمه (الموجات التصادمية)

وده بقي يجيب نتيجة رائعة مع ناس كتير بعد جلستين أو ثلاثة 

7 لو كووول ده مجابش نتيجة ..أحيانا يلجأ الطبيب لحقن موضعي لكعب الرجل بحقنة الكورتيزون ...ومؤخرا بقي فيه كمان الحقن بالبلازما

   لازم نعرف حاجة مهمة 

إن العلاج في الحالة دي أحيانا كتير بيطول لمدة تصل لشهور ..وأحيانا لسنة كمان