لا تعتمد اعتماد كلي علي جهاز قياس السكر المنزلي أياً كان نوعه أو ماركته !
الجهاز ده أياً كان بيقيس الدم في البلازما مش في الوريد ( زي المعمل) وإللي ممكن تكون نتيجته تفرق عن المعمل فوق أو تحت لحد 15 درجة ويمكن أكتر!
طريقة بسيطة تخليك في أمان مع جهازك:
لما تقيس سكرك بجهازك .. إضرب الناتج في 1.12
وناتج الضرب ده هيبقي سكرك محصور بينه وبين الرقم إللي طلع في الأول من جهازك!
مثال: قست سكرك وطلع 120 بعد الأكل
هنضرب 120X 1.12= 134.4
يبقي نعمل حسابنا:
إن النتيجة الحقيقية محصورة بين الرقمين دول( 120-134)
وبكده هتبقي دايماً عارف إنته ماشي إزاي وخلينا دايماً سابقين بكذا خطوة!
يعني دايماً يكون هدفك نتيجة أقل من إللي بتشوفها علي شاشة جهازك !
يعني لما تلاقيها 120 زي المثال السابق قول لا أنا عاوزها أقل من كده وتشوف إيه إللي غالباً بيزود السكر في أكلك وتقلله!
يعني لو كنت في الوجبة دي مثلاً أكلت طبق سلطة فيه خضروات وحبتن طماطم وخيارة .. هنخليهم واحدة طماطم ونص خيارة.
لو أكلت رغيف عيش ( وده لا أفضله) يبقي هنخليه ربع رغيف وهكذا !
المهم دايماً يكون هدفك نتيجة أقل من نتيجة الجهاز !
متستهلكش فلوسك ونفسيتك وتشكشك نفسك علي الفاضي وفر فلوس الشرايط دي والشكشكة وبتمن علبة شرائط واحدة ممكن تعمل تحليلين بالمعمل كل شهر !
( علشان مترجعش تقول تكاليف التحاليل والفحوصات غالية .. وفر .. هتلاقي في مصاريفك ألف بند وبند ... صحتك أمانة ليك ولغيرك وأهم ما تملك)
استخدمه في حالة واحدة:
لو عكيت وعاوز تعرف بعد أكلة معينة سكرك أخباره إيه!
غالباً ثبت كميات أكك خصوصاً الكارب حتي لو كارب معقد وعلي حسب قراءة جهازك بتحاول تكون أقل منها فتقلل من الكارب ده .. وقارن !
استخدمه لو بتمر بأزمة صحية معينة زي نزلات البرد وارتفاع درجة الحرارة ووجود التهابات مختلفة لأنه هنا هينفعك كتير !
الأزمات المرضية بترفع السكر غالباً وكمان بعض الأدوية زي أدوية البرد.
الجهاز هينفعك هنا علشان تبقي عارف حتي تاكل إيه والعك هيبقي لحد فين !
لكن متركنش عليه ولا تثق فيه لأنه من أسباب ضياع ناس كثيرين !
شكلك اتفاجئت !!
قبل ما أشرحلك وجهة نظري أحب أعرفك إن جهاز قياس السكر المنزلي في المقام الأول أساسي لمريض النوع الأول أو لمريض نوع ثاني حالته دوماً غير مستقرة ما بين ارتفاعات وهبوط متكرر ... بالرغم إن حتي الحالة دي في الغالب بتحصل من نظام غذائي ودوائي غلط !
نرجع بقا لنقطة إنك اتفاجئت من شوية:
آه لأنه حتي لو بيعطيك نتيجة مظبوطة برضو قياس السكر في الدم مش هوه المؤشر الوحيد الصح وفيه حاجات تانية لمتابعة حالتك: واقف فين ورايح علي فين !
السكر منظومة كبيرة ودواير متداخلة ... لكن اهتمامك بمتابعة حالتك عن طريق المعمل وإنك مش كل مرة تروح تقيس صايم وفاطر وتراكمي وترجع هيكون هوه ده الصح!
لكن فيه الأهم وهوه:
إنك تعرف مستوي الأنسولين في جسمك صايم وفاطر قد إيه علشان ده أهم نقطة وإللي المفروض علي أساسها بيتم تقرير نوع العلاج وجرعاته وكمان التعديل فيهم حسب ما وصلت إليه!
ممكن أنسولينك يبقي تمام وبنكرياس شغال لكن ممكن يبقي عندك مقاومة أنسولين ودي مشكلة سهل حلها بدون حتي أدوية أو بمعدل بسيط من الدواء وده في حالة إنك شخص صعب يلتزم بنظام غذائي مع إنه أهم وأفضل من أي أدوية وأول خيط النجاة ... تخيل !!
ممكن يكون عندك مشاكل في الكبد وهي السبب في ارتفاع سكرك مش بنكرياسك .. تخيل !
حاجات كتير ملخبطة وبتحتاج تشخيص سليم مش مجرد روشتة ولا رقم بيطلع علي شاشة جهازك في البيت وتفتكر إن كله تمام!
ممكن تتطمن علي نفسك وتقيم حالتك من جميع النواحي مش بسكر صايم وفاطر بس أو حتي تراكمي بتمن علبتين شرايط وتروح تعمل تشيك آب كل ستة أشهر أو ثلاثة !!
ويا سيدي لو حابب الجهاز قيس في صيدلية جنب البيت بتكون بتثق فيها وفي أجهزتها ونضافتها ومدي اهتمامهم بتحقيق شروط الخدمات من الناحية الصحية منتا مش مريض نوع أول محتاج تتابع كل لحظة !
لكن لما تروح تقيس في صيدلية متنساش تاخد قلم الوخز بتاعك معاك يعني متسخدمش قلم الوخز إللي في الصيدلية !
وفي النهاية: لو عندك جهاز استخدمه مرتين فقط في الأسبوع أو كل عشرة ايام مرة صيامي ومرة فاطر لكن اهتم أكتر بالمعمل وتحاليل تانية أفضل زي:
1- تحليل C-Peptide السي بيبتايد علشان تعرف قدرة بنكرياس واقفة فين وبتتحسن ولا لأ!
جهازك المنزلي مش هيقولك ده ولا هيقولك حالتك بتتحسن ولا لا
2- تحليل Homa-ir هوما آي آر وده هتعرف منه عندك مقاومة للأنسولين قد إيه وكمان هتعرف منه علاجك وغذائك ملخبطين ولا إيه !!
آه .. ما هي ( المقاومة يعني ) المفروض تقل لو حضرتك ملتزم بنظام غذائي مع أو بدون دوا صح ولا إيه؟!
طب بالذمة الجهاز هيقول لك ده؟!
ممكن سكرك يتظبط في القراية علي جهازك بسبب دوا أو تقليل نشويات مثلاً لكن مش شرط تكون المقاومة اختفت أو قلت بنسب معقولة !
وجهازك مش هيقول لك ده !
جهازك المنزلي مش هيقولك مقاومة الأنسولين حالتها إيه ولا وصلت لفين!!
3- متابعة حالة الكبد والكلي: التمثيل الغذائي للكربوهيدرات بيتم في الكبد وهوه إللي بيحوله لجلوكوز ووجود خلل في الكبد بيأثر في العملية دي!
الكلي كمان بتطرح الجلوكوز في البول ( عن طريق أنابيب التصفية والفلترة) وبيرجع برضه للدم عن طريقها عن طريق أنابيب خاصة باعادة امتصاصه!
وأمراض الكلي سواء بسبب السكر العالي أو مرض بالكلي نفسها ممكن يأثر علي العملية دي !
4- تحليل الدم الشامل CBC علشان تشوف:
نسبة الهيموجلوبين قد إيه وعندك أنيميا ولا لا
وكمان بيعرفك عندك نسبة التهابات ولا لا( من عد كرات الدم البيضاء).
تخيل كل دي حاجات ممكن تلخبط سكرك وممكن تديك قراءات سكر تراكمي علي غير الحقيقة !
مش التراكمي ده عبارة عن سكر بيلزق في الهيموجلوبين ؟!
طيب لو عندنا سكر في الدم وهيموجلوبين قليل .. هتبقي النتيجة إيه؟!
إللي هيلزق يكون أكتر وبالتالي رقم تراكمي أكبر لكنه لا يعبر عن الحقيقة !
جهازك المنزلي مؤشر فقط لنقطة واحدة من نقاط كثيرة تشملها خطة وعلاج السكري قبل أن يتفاقم والنجاة من مضاعفاته إن حدث.
جهاز السكر المنزلي للمتابعة فقط وليس للتشخيص أو التقرير بما وصلت إليه الحالة!
خذ بالأسباب فهذا أمر وليس رفاهية !!
الموضوع كبير لكنه مش صعب وعاوز شوية اهتمام من حضرتك ودكتور يتقي ربنا في مرضاه وصدقني لن يعالجك أحد قبل نفسك ولكن أكون مبالغاً أنك الشخص الوحيد علي علاج نفسك بعد الطبيب وفي بعض الأحيان قبله !
Comments
Post a Comment
اكتب تعليق حول الموضوع