الفيروس الغُدِّي Adenovirus
هنتكلم النهارده عن ميكروب فيروسي اسمه الفيروس الغُدِّي Adenovirus
* ده فيروس موجود من زمان وبينتشر كل سنه في فصل الشتاء والربيع.
* بيصيب اي طفل في اي سن بس الاكتر قبل سن المدرسه.
* بيصيب كذا جهاز في الجسم زي :
••• الجهاز التنفسي : وده الاكثر ( يعمل احتقان في الحلق ونزلات برد، وسيلان انف، والتهاب الغدد الليمفاوية في الرقبه، ونزله شعبيه وشعيبيه، وبحه في الصوت مع الكحه croup وممكن يتطور لالتهاب رئوي).
••• العين : يعمل احمرار واحتقان في العين ملحوظ.
•••الجهاز الهضمي : بيعمل نزله معويه مفاجأه غالبا ومعاها وجع بالبطن وترجيع وسخونيه.
اعراض الجهاز الهضمي ممكن تحصل لوحدها أو بعد الاصابه بالجهاز التنفسي.
* يعني السيناريو بيبقى ازاي : اقولك:
الطفل بعد ماياخد العدوى بكذا يوم يبدأ شهيته للاكل تقل وعنيه تبقى حمرا ومحتقنه ومناخيره تسيب ويعطس ويكح وتلاقيه مكتوم كده وبعدها بكذا يوم فجأه تلاقيه بيسهل ميه وبيرجع وبطنه توجعه وممكن يسخن.
* مضاعفاته : بعض الأنواع أو السلالات من الفيروس ممكن تعمل مضاعفات زي :
••• الانغلاف المعوي intussusception
وده بيعمل انسداد معوي (المصارين أو الأمعاء راكبه أو داخله في بعض) ودم في البراز وقئ مستمر وبيكون اكتر في الاطفال الرضع ، وده شوفت منه حالتين الفتره اللي فاتت وعملوا عمليه وبقوا تمام الحمد لله.
••• التهاب عالمخ meningoencephalitis
وده اكتر في الاطفال اللي مناعتهم ضعيفه.
••• التهاب في المثانه Hemorrhagic Cystitis والكلى ويعمل بول مدمم.
* الوقايه :
•••التثقيف الصحي : لازم نكون عارفين الأمراض ونقرأ عنها
••• غسل الأيدي باستمرار
•••عدم ملامسة الأنف والعين والفم بايدي غير مغسوله جيدا
•••عدم الاختلاط بأفراد مصابين.
Comments
Post a Comment
اكتب تعليق حول الموضوع