القواعد المعتادة لدكتور الأطفال وحديثي الولادة :

القواعد المعتادة لدكتور الأطفال وحديثي الولادة :

1- لو الطفل عنده الصفرا و نسبتها عاليه بالنسبه لوزنه وعمره وعلى حسب تقدير الدكتور لحالته  ممكن يتحجز في الحضانة .. مفيش حاجة اسمها احطه ف الشمس وأحطه تحت لمبة نيون

2- السمك واللبن والبيض والموز والشيكولاتة مش ممنوعين للي عنده سخونية

3- المضادات الحيوية مصرح بها من قبل ال FDA لعلاج الإلتهابات المختلفة .. احنا مش بنخترعلك علاج عشان كل مرة تفضل تفاصل معانا متكتبلوش مضاد حلوي بلاش مضاد حلو

4- جلسات الإستنشاق الطفل مبيتعودش عليها

5- الطفل المولود المفروض يرضع لبن بس لمدة 6 شهور ..

6-بلاش الطفل اللي عنده سخونية تحطوله جرنال مبلول فوق صدره

7- بلاش كمان تلبسوه بلوفر صوف في الشتا فوق الجرنال الناشف اللي فوق صدره

8- جلسات الإستنشاق الطفل مبيتعودش عليها

9- لما الدكتور يفتح بق الطفل عشان يشوف زوره بلاش تعمل انت الدكتور وتدخل رأسك في بق ابنك بدل الدكتور

10- مش معنى إن طفل بيعيط يبقى ممزوق

11- لما ابنك يفضل يعيط الساعة 2 بالليل لمدة ساعتين متواصلين وانت مش عارف تنام .. مش لازم تيجي تعمل حفلة على الدكتور وتصحيه وفي الآخر يحط ابنك على السرير الساعة 4 الفجر ويلاقيه بيضحك .. نصيحة مني انت اللي محتاج تكشف مش ابنك

12- المكالمات التافهة ممكن تتأجل للصبح .. مش لازم تصحي دكتور الساعة 3 الفجر تقله أخلي الواد ياكل موز ولا لأ

13- لو ابنك عنده سخونية بلاش تجيبه في اليوم الخامس .. سيبه يوم كمان هيدخل الليفل الأخير ويلاعب الوحش

14- والله العظيم جلسات الإستنشاق الطفل مبيتعودش عليها

15- مش لازم تشيلي بامبرز ابنك المعبأ في شنطتك .. ومش لازم كمان تقنعي الدكتور إنه يشم البامبرز في العيادة .. حرام

16- مش لازم قفشات العيانين الرخيصة من نوع انت ليه مكملتش تعليمك وبقيت دكتور كبار .. كفاية شلل

17- مش لازم في الشتا تلبس الواد 7 فانلات فوق بعض

18- لو ابنك لا قدر الله عنده مرض شديد والدكتور صارحك مش معنى كدة إنه دكتور مبيفهمش .. طب اقلك لف على الدكاترة النص لبة وخليهم يطمنوك وسيبك من الفاشل اللي بيصارح أهل العيان بالمرض

19- الطفل اللي عنده حساسية صدر مش لازم تقعدوا جنبه تشربوا سجائر وتشيليه قدام حلة الطبيخ وطالع منها الدخان .. مش لازم والله تختبري قوته على تحمل الظروف الصعبة

20- لو طفل بيشتكي من عينه تكشف به رمد ولو شعره بيقع تكشف عليه جلدية ولو ودانه بتنزل صديد فيه تخصص اسمه أنف وأذن وحنجرة .. مش لازم دكتور الأطفال يقعد يفلتر في الزباين

21- مش لازم تفاصل في الكشف مع السكرتارية لأن دكتور الأطفال كشفه أرخص من أي حد .. مانت لو رحت لدكتور مخ وأعصاب أو كبد بتدفع كشف 600 جنيه واستشارة 300 جنيه وانت حاجز قبلها بأربع شهور  ... لو مش معاك فلوس قول محدش هياخد منك لكن متفاصلش

22- وزارة الصحة منعت لنا كل أدوية القئ فمضطر حضرتك آسفا تستحملنا شوية .. فيه زانتاك بيشتغل لحموضة المعدة والقئ لحد ما يجيبوا دوا قئ

23- الطفل اللي عنده 5 شهور مش بيقف ومش بيمشي فمش لازم تجيبيه العيادة وتقولي للدكتور ابن خالته نفس السن و بيقف دلوقتي .. والله ما هيصدقك لو اتتنططي

24- ممكن نحمي العيال .. أرجوكم بقى

25- الطفل اللي عنده جفاف شديد محتاج محاليل .. كون إن حضرتك هتقعدي تعيطي وهو بيتركبله كانيولا فده مش هيخليكي تصعبي عليا لأنك كنتي سايباه يسهل ويرجع لمدة 5 أيام بينما إنتي قاعدة بتقشري لب وبتتفرجي على الشيف شربيني

25- ابنك عنده مرض هياخد العلاج هيخف مش هتديله العلاج هيفضل يتعب أكتر .. دكتور الأطفال مش ساحر هيخرجلك ابنك من العيادة بيتنطط

26- يا ريت نهتم بولادنا شوية .. مش لازم الواد يجي شعره مليان قشر و ضوافره مربية أفيال أفريقية تحتها

27- والله كمان مرة جلسات الإستنشاق بالبخار الطفل مش بيتعود عليها

28- لو ابنك عنده التهاب رئوي والدكتور قالك متجادلش وتقعد تقول طب مش ممكن يكون نزلة شعبية طب مش ممكن يكون مش عارف إيه .. ريح دماغك ومتجادلش لأن فيه مواويل تانية في علاجه لو متبعتهاش صح وسبته يتعالج تحت السلم ممكن حالته تتدهور ويتحجز على جهاز تنفس صناعي

29-راعوا ربنا في ولادكم .. بلاش ضرب .. بلاش شتائم .. بلاش تحرموهم .. وبلاش تدلعوهم بزيادة .. ولو تعبوا اكشفوا عليهم وربنا يشفي كل طفل مريض ويرزقنا وإياكم بذرية صالحة 

30- لو ابنك ضوافره طويله وفيها طين  ممكن تقصهاله عادى مش هيطلع نشال ماتخافش.

31- الكحل  بضم  الكاف اللى موجود حالياً مليان رصاص  حرام عليكوا عين العيل  .

منقول مع بعض الإضافات والتعديلات  

البوست ده هديه متواضعة استاذنا الدكتور بيومي غريب أستاذ طب الأطفال بجامعة إسكندرية الذي جاب كالسندباد محافظات مصر  كلها لنشر الوعي الطبي وتعليم شباب الأطباء وسام مستحق لعالم جليل أفخر واعتز بصداقته.