ذكريات الاطباء 635

  تعالوا أحكيلكم عن أغرب حاجه هتسمعوا عنها في حياتكم 

استقبال طوارئ الأطفال ده عالم تانى ، أطفال بتكشف من كل مكان ، ناس تعبانة بجد وناس بتتدلع ما هو تذكرة الاستقبال ببلاش ومش هتخسر حاجة ، الدنيا زحمة وكأننا في مولد ، وفى هذه الاثناء قطع الضوضاء صوت صراااااخ شدييييد و قوى جدا ، 

كانت ست باين من ملابسها إنها ريفية ،جايه شايلة عيل حوالي 4 سنين كدا وبتجرى بيه وبتصرخ. الواد مرجع دم كميته كبيرة جدا والدم مغرق هدومها وهدوم ابنها .

- الحقوووونى ابنى بيموت ، وصريخ كتير.

- توتر شديد بين الأطباء حتى بين الأهالى اللى فى الإستقبال 

لدرجة إن بعض الناس أغمى عليهم من منظر الدم اصلا.

- بسرعة جبنا الواد من على دراعها ، كانيولا بسرعة يا مس 

الواضح إننا هننقل دم كتير وهنسند ب بمحاليل ringer أو ملح على مايجى الدم 

- الاول نسحب معامل كاملة ونحط على مونيتور نقيس نبض وضغط وتنفس ونسبة تشبع الدم بالاكسجين  SPO2℅ بعد كدا نحطه على ماسك اكسجين وندى كميه shock من الringer الرينحرز على 20 مل لكل كيلو على نص ساعة كبداية ونتابع العلامات الحيوية.

- النقاش بين الدكاترة الموجودين طبعا هنحجز الحالة دى ايا كان السبب فى القئ الدموى دى حالة hematemesis وكمية الدم فظيعة يلا جهزولنا المعامل بسرعة صورة دم ونسبة تكسير retics واملاح دم صوديوم وبوتاسيوم ووظائف كبد وكلى ونسبة صفرا وغازات دم وقيسنا سكر كمان.

-كدا كدا الحالة طبعا هتتحجز فى القسم وبكره الاستاف هيتجمع و كبار الاطباء هيحضروا وكلهم اسامى كبيرة فى كل التخصصات وهنعرض عليهم الحالة بملابساتها ونوصل لتشخيص ان شاء الله.

 الموشرات الحيوية للطفل كويسة جداا ودرجة حرارته زى الفل . 

مافيش غير شوية هلع على وشه من اللى بيحصل.

- الحالة طلعت فوق وكان اتعلقلها الرينجر فى الاستقبال.

- واتحطلها كوناكيون و فيتامين K و Dicynone عشان النزيف وزانتاك وريدى خوفا من ان يكون دا سببه التهاب شديد بالمعدة 

- بالكشف الاكلينيكى الولد كويس  والبطن كويسه و مافيش اى وجع او تخشب تحت ايدى ولا اى تضخم فى الكبد او الطحال !

الولد كويس بشكل مرعب !! لكن علي اي حال بدانا نحجزله سونار بطن وحوض  و نحجز له منظار للجزء العلوى من الجهاز الهضمى

ومنه يبقى منظار تشخيصى و علاجى لو اقتضت الحاجة لحقن مادة او شئ لو فيه دوالى مرئ او معدة.

- جاءت نتايج التحاليل والمفاجاة كلها كانت سليمة حتى الهموجلوبين حوالى 11.5 ودا رقم معقول جدا 

- عرضنا الحالة فى الاستاف راوند ..

- احد الاساتذة : هتفكروا فى ايه يا اولاد ؟

= حضرتك اول حاجة جات فى دماغنا هى دوالى مرئ ومعدة وارتفاع ضغط الوريد البابى

 portal hypertension and varices

بس بالفحص مافيش اى اعراض ولا علامات ولا فيه تضخم كبد ولا طحال ولا استسقاء ascites 

ونسبة الصفراء كمان كويسة ووظائف الكبد كويسة وبرضه حجزنا لها سونار ومنظار للتأكيد.

- طيب ممكن تفكروا فى ايه تانى..؟

= احتمال القرحة بالمعدة هنا مش قليل وخصوصا اننا سألنا الام عن استخدام المسكنات زى البروفين ولبوس الدولفين فقالت لى انها بتستخدمه كتير جدا .كمان فكرنا حضرتك فى ميكروب المعده ال H.PYLORI انها تكون عاملة التهاب شديد بالمعدة gastritis اللى ممكن يسبب قرحة بالمعدة.وطلبنا لها تحليل ميكروب المعده الحلزوني في البراز h.pylori antigen in stool 

وحجزنالها موعد تحليل يوريا في التنفس دا أدق شويه يظهر الميكروب الحلزوني  carbon urea breath test

فكرنا كمان فى الـ GERD اللي هو ارتجاع المرئ لانه احيانا بيعمل التهاب شديدة فى المعدة ممكن يسبب قئ دموى .

وبنحاول نحجزله موعد يعمل impedance PH monitoring test ودا من ادق التحاليل اللى بيقيس ارتجاع احماض المعدة او غيرها وبيشخص الارتجاع.

-برافو عليكوا اعملوا كل حاجة والاسبوع اللى جاى نشوف النتايج.

=طول الاسبوع اتشغلنا فى حالات تانية بس حالة الطفل دى كانت محور الاحداث بيننا كلنا .كل يوم فى نبطشية الليل ، النايب يسمع صوت صويت من الاوضة اللى فيها الحالة والام بتجرى بهدوم الواد متغرقة دم وتقول انه رجع دم وغرقها ! وتقعد تشتم وتدعى على النايب وعلينا كلنا واننا مهملين ومابنعرفش حاجة وهنضيع ابنها والولد بيموت منها والنايب يحاول يهديها ويفحص الواد ويسحب صورة دم ويبعت يحجز له دم ويعلق محلول ،، 

وفى الاخر تطلع صورة الدم كويسة ! شكينا فى المعمل  بقينا نعملها بره وتطلع برضه كويسة...؟! كل التحاليل طلعت والاختبارات اتعملت باستثناء المنظار ميعاده لسه ماجاش والغريب ان كله سليم !حتى الان استبعدنا مشاكل الوريد البابى والكبد  والبكتيريا الحلزونية  وارتجاع المرئ فاضل المنظار يعرفنا موقع التهابات المعدة وقرحة المعدة من الاعراب وبدأنا نخاف يكون فيه ورم لاقدر الله عامل قرحة بالمعدة بس ازاى وهو اصلا كل الاشعات والتحاليل تمام.

 فعرضنا الحالة فى الاستاف راوند فى المتابعة.

- الاستاذ : طيب لحد نتيجة المنظار ماتطلع ممكن نفكر  فى ايه ياشباب.

= ممكن ياافندم حاجة نادرة زى Mallory Weiss syndrome ودى تهتكات وتقرحات فى المنطقة الواصلة بين المعدة والمرئ 

بسبب الترجيع الشديد وممكن المنظار يوضحها.

او حاجة بعيدة اوى زى zollinger ellison syndrome 

ودا ورم بيطلع من خلايا دلتا فى البنكرياس وبيطلع هرمون حموضة اسمه gastrin وممكن يعمل كدا 

ودا محتاج نقيس نسبة الهرمون الصايم fasting gastrin level او نحجز رنين مغناطيسى علي البطن ودا هياخد وقت.

- تمام ياولاد go on استمروا 

- جاء موعد المنظار والام عملت فيلم يومها وقعدت تجرى بالواد لانه بيرجع دم ولخمت النايب النوباتشى وضاع موعد المنظار.

 الحجز اللى بعده لسه عليه فترة.فى خلال الفترة دى  الام كانت كابوس على نوباتشى القسم ومع ان فيه حالات اصعب من الحالة دى محجوزة بس دايما النوبتشى كان بيبقى كاره نفسه بسببها .

- موعد المنظار التانى جه وكلنا كنا مركزين معاها وقعدناها فى اوضة لوحدها بعيد عن العنبر ،،

وخلينا واحدة زميلتنا من الصبح تقعد معاها علطول عشان نجهز الواد للمنظار ،،اخدنا الولد للمنظار وأخيرا عمله.

 استلام النتيجة كان يوم الاستاف راوند وكان بيبقى دايما يوم التلات الدكتور الامتياز راح استلم النتيجةو جابها الاستاف راوند 

 فتحنا النتيجة بشغف غير طبيعي.

- المفاجأة !  المنظار بتاع الطفل طبيعى جدااا مافهيوش ولا شئ ......!!

- هنا بقى تكلم الاستاذ وقال : يا ولاد الحالة دى حالة

Munchausen by proxy

= احنا : نعم ؟ 😳😳 مين دا. 

 كله طلع موبايله بتاعه يشوف مين مانشاوسن دا ! لما دورنا لقيناها حالة مرضية بيقوم فيها ال care giver يعنى اللى بيهتم بالطفل وخصوصا الام بتلفيق ادعاءات باطلة بإصابة الطفل بمرض معين 

واحيانا بتبقى عارفة اعراض المرض واحيانا مصطلحات طبية  وبتحاول تقنع الدكتور بصحة كلامها  علشان تكسب اكبر تعاطف معاها او تاخد فلوس من جوزها او تشحت عليه واحيانا ممكن تسبب ضرر للطفل عشان تقنع الناس و ده بأنها ممكن تضربة او تخنقه او حتي تسممه وتموته فى بعض الاحيان  ده معني الحالة ،،

-طيب والعمل ...؟ نفتش دولابها واوضتها حالا 👉

 خرج 2 نواب ومعاهم ممرضة وراحوا فتشوا الدولاب مالقوش حاجة ، الست بدات تاخد بالها اننا بدأنا نشك فيها !كان رد فعلها عنيف جدا وشتايم وحشة مع ان كان لبسها واسلوبها فى الاول فيه مظهر تدين.وانا هاوديكم فى داهية لانكم مش عارفين تعالجوا ابنى وهتموتوه يا كفرة.

انا كنت هادئ جدا ومادخلتش فى الحوار دا ، الست دى عاوزة تكتيك مختلف قلتلهم انا هاروح اكلمها واثبتها.

- معلش ياماما.

- ينفع كدا يادكتور عمرو ! انت رجل محترم ، شوف ولاد ال..... بيعملوا ايه ومش عارفين يعالجوا الواد و لا يشخصوه.

= لا ماتقلقيش يا ماما فى اشعة نازلة جديد ، هنعملها وهنوديه لدكتور كبير قوى متخصص في الحالات دي  طبعا دا كان كله كلام كده بثبتها بيه.

 اتفقنا مع رئيسة التمريض انها هى اللى هتفتش سريرها وهدومها بالتفصيل وانا هابعدها فى اليوم دا عن القسم خالص فى الموعد المحدد قولتلها هاتى الواد بقي وتعالى علشان فيه دكتور كبير طالب يشوفه بس عاوز ياخد تاريخ مرضى مفصل ويكشف كشف دقيق.

واخدتها لفيت بها شوية و رجعت

-رئيسة التمريض نفضت الدولاب مافيش حاجة ! السرير والمرتبة مافيش برضه ! لدرجة العمال فى الاخر شالوا المرتبة وبصوا ع القوائم بتاعة السرير ...  وكانت المفاجاة !!

- كيسين دم محشورين بين القوائم بتاعت السرير بطريقة عجيبة .

الهانم كانت بتجيب دم حقيقى وتدخل بالواد الحمام تكبه عليه وعلى هدومها وتطلع تجرى بيه و ترقع بالصوت تفكير ما ييخطرش حتي ع بال الشيطان كلمونى طلعت جرى ،، واجهناها ،،، انكرت فى الاول بعد كدا انهارت واعترفت .

استدعينا الشرطة وعملنالها محضر وتم عمل اللازم معها وطلبنالها عرض لعياده النفسيه و طلعت مصابه بإضطراب نفسي وبتعمل كدا لجذب الإنتباه 

-ودى كانت قصة ال Munchausen by proxy 

و اعتقد دى كانت اسوء حالة اتعاملت معاها فى حياتي.