الدايت و ادوية التخسيس بقي موضوع مهم و بيمس كل الناس

 

عارف ان المريض اللي بيعاني من السمنة اكثر عرضة للإصابة بأمراض القلب و الأوعية الدموية و الضغط و السكر و خشونة المفاصل.

وتقريبا مفيش مريض بيخش اي عيادة من اللي فاتو دول الا و الدكتور لازم يقول لو سمحت نزل وزنك و زبط اكلك. 

طرق تخسيس الوزن بيكون عن طريق

1-الدايت و تنظيم الاكل و ممارسة الرياضة.

2-الادوية اللي بتساعد في تخفيف الوزن.

3-العمليات الجراحية المختلفة زي تحويل المسار و بالونة المعدة و غيرها كتير . 

كلامنا انهاردة عن رقم 2 الادوية اللي بتساعد في تخفيف الوزن لان للاسف الناس بقت بتستسهل و عاوزة تخس من غير مجهود ولا تخفيف اكل حتي من غير ما تعرف الاثار الجانبية لادوية التخسيس و خطورتها.

عشان اي دواء يبقي مسموح استخدامه لغرض معين لازم الدواء ده يتم عمل تجارب عليه و ابحاث ودراسات و مقارنات وتجارب علي الحيوان وبعدين تجارب علي مجموعة صغيرة من البشر .

من التجارب والابحاث دي بنقدر نعرف الاثار الجانبيه و تفاعل الدواء مع الأدوية التانية.

بعد كدة الدواء ده لازم ياخد موافقة FDA هيئة الدواء والغذاء الأمريكية عشان يبقي مسموح استخدامه. 

يعني الموضوع بياخد سنين عشان يتم الاعتراف بدواء معين و يسمح باستخدامه.

في خمس مجموعات من الأدوية بس اللي مسموح ومعترف باستخدامها في انقاص الوزن طبعا بعد ما عدت كل المراحل اللي فاتت.مش هنكتب اساميهم بالعربي عشان برضه منشجعش الناس تستخدمهم بدون رقيب او متابعة لان حتي دول ليهم اعراض جانبية

1-liraglutide وده دواء سكر ومن الأعراض الجانبية بتاعته انقاص الوزن لكن استخدامه الاساسي بيكون لمرضي السكر.

2-orlistat وده دواء تخسيس من الاساس

3-phentermine/topiramate.

4-naltrexone/bupropion

5-lorcaserin.

واخر 3ادوية دول مش موجودين في مصر وبيتم استيرادها او تم ايقاف استخدامهم.

يعني في الغالب الموجود في مصر 2-3ادوية فقط اللي تم الموافقة على استخدامها لتخفيف الوزن صراحة كدة.

امال ايه بقي الأدوية اللي الغالبية من الناس بتستخدمها بدون تحارب ولا رقيب .???

غالبا الأدوية دي المكون الأساسي فيها بيبقي مادة الكافيين اللي موجوده في السجاير و الشيكولاته والشاي و القهوة لكن بيتبقي بكميات عنيفة وممكن كمية اقرب من الي مصرح باستخدامها في اليوم الواحد .

مادة الكافيين بتزود معدل الحرق و بتسد النفس و فعلا بتؤدي الي خفض الوزن بسرعه.

لكن تخيل انك شربت علبة سجاير او 5اكواب قهوة مرة واحدة ده بيعمل اعراض جانبية عنيفة زي

1-ارتفاع ضغط الدم

2-سرعة شديدة و اضطرابات في ضربات القلب

3-اضطراب في الحالة المزاجية زي الاكتئاب و العياط بدون سبب والصداع.

4-ارتفاع ضغط الشريان الرئوي ونهجان

5-جفاف شديد في حالة عدم شرب مياه و سواءل كافية .

6-ارتفاع سكر الدم وممكن تعمل غيبوبة سكرية في مرضي السكر الغير منتظمين ف العلاج.

في مجموعات تانية من الأعشاب و المواد المصنعة اللي بتشتغل عن طريق منع مركز الجوع في المخ او تحفيز مراكز الشبع والاعشاب دي طبعا  مش بتشتغل علي المركزين دول بس دي ممكن كمان تشتغل علي مركز تانية زي مراكز النشاط و الذاكرة في المخ ومراكز النوم فتخلي المريض دايما حاسس انه تعبان و عاوز ينام ومش مركز ،(يعني هتخس وف نفس الوقت تبقي ذاكرتك ضعيفة ومش مركز.

غير طبعا ان الجسم بيتخلص من معظم الادوية و الاعشاب دي عن طريق الكلي و الكبد فممكن تعلي وظائف الكبد و الكلي او تعمل فشل فيهم.

خلاصة الكلام 

١- ما تمشيش عكس الطبيعة اللي ربنا خلقها و تستسهل كل حاجة عشان تخس.

٢- حاول علي قد ما تقدر تبعد عن الادوية اللي مش معروف اصلها و لا جاية منين .

٣- مش شرط الدواء اللي نفع مع ابن خالتك ولا صاحبك ينفع معاك فتقوم واخده بدون متابعة ولا استشارة متخصص.

٤- اعتمد دايما علي الاكل الصحي و ممارسة الرياضة لان ده هو الاساس و عمرم ما هيبقي مؤذي لجسمك.