ذكريات الاطباء: 123
أنا اترفدت من مستشفي دار الفؤاد بسبب الموضوع ده
إنتوا عارفين دار الفؤاد دايماً بتشتغل V.I.P وأنا كنت لسه واخد ماجستير فريش والنباطشيات في العناية المركزه اللي بيمسكها في دار الفؤاد علي الأقل دكتور يكون معاه ماجستير وخبره كام سنه
المهم يعني كنت نباطشي و فيه حالة جت جابها أستاذ باطنة من أساتذتنا التُقال في القصر العيني ( اللي هما فضلهم على دماغنا يعني ) وكانت حالة تسمم كيتوني لمريضه سكر DKA
والحالة دي كانت متوصي عليها من ناس تقيله جدا very v.i.p
المهم المريضه دي كانت كبيرة في السن وأستاذ الباطنة جايبها وجاي وقالي : إعملها كذا وكذا وكذا وكذا
- فبقوله : يا بيه مش عايز تعملها CT skull " أشعه مقطعيه علي المخ " ؟
= بصي لي وقالي : إيه الهبل اللي إنت بتقوله ده !؟؟ CT skull إنت عبيط ؟؟!!
- قولتله : أصل يا بيه ..
= قالي : ولا أصل ولا فصل هي عشان جاية دار الفؤاد و عشان تعرف تدفع فأي كلام وخلاص ؟! إيه الزفت ده ؟!؟؟ متعملش CT وسابني ومشي
أول ما نزل بَعتها تعمل CT عادي جداً ولا كأني سمعت حاجه
حظي الأغبر إن دكتور حاتم الجبلي صاحب المستشفى كان موجود ساعتها وبعدين إتفقوا إنهم يطلعوا يبصوا على المريضه قبل ما الدكتور يمشي لما طلعوا سألوا فين المريضه ؟؟
= قالولهم مش موجودة
- أمال فين ؟؟
= قالوا : بتعمل CT
- مين قالها تعمل CT ؟؟
قالوا : دكتور محمد الشافعي
= هاتوا الشافعي
- فأستاذ الباطنة بيقولي : مش أنا قولتلك يا ابني متعملش CT ؟!
= فسكت
- فدكتور حاتم الجبلي قال : مش البيه قالك متعملش CT ؟!
= قولتله : أه
- قالي : وإنت بعتها تعمل CT skull ؟!
- قولتله : أه
= قالي : متشكرين على الفترة اللي إنت قضيتها عندنا يا محمد ..بالنص كده
- قولتله : طيب يا بيه سلام عليكم ، و إتصلت بمدير الرعاية كان ساعتها دكتور أحمد غالي قولتله : يا بيه أنا هروح إبعت حد يستلم مني النباطشية و حكتله اللي حصل
- قالي : إهدى أنا جاي
= قولتله : لا إتصل بحد يجي يستلم النباطشية وإلا همشي من غير ما أسلم وطبعا مينفعش تمشي وتسيب العنايه بالمرضي اللي فيها ومفيش دكتور موجود
المهم بعتلي دكتور وسلمته الحالات ونزلت وركبت عربيتي وطالع من باب المستشفى راحوا قافلين عليا البوابه
- فيه إيه يا رجالة ؟؟
= قالوا : الدكتور حاتم قال متخرجش
- قولت : يا نهار أسووووود هيلبسني تهمة وحاتم الجبلي قادر على إنه يعملها
= وقولتلهم : ليه كده ؟؟
- قالوا : هو قال كده لما تيجي خارج ممنوع تخرج وتروح مكتبه
= قولتلهم : بلغوا الدكتور حاتم إن الدكتور محمد الشافعي خلاص ماشي و إنتهينا بتاع الأمن يعرفني كويس لقيته قالي :
- يا دكتور محمد هو قالي هو هيقولك كده وقالي لو قالك كده جيبهولي حتى لو هتشيله
= قولتله : هتعملها ؟؟
- قالي : هعملها يا كده يا أترفد ومعلش يا دكتور محمد دا أكل عيشي وأنا مش هترفد فاركن عربيتك وخليك ببريستيجك وإنزل روح على رجليك بدل ما تروح متشال
كان بيكلمني كده بالظبط روحت راكن ورايح للدكتور حاتم دخلت لقيت أستاذ الباطنة قاعد ولقيت دكتور حاتم الجبلي بيقولي :
- إنت طلبت CT ليه ؟؟
= قولتله : خلاص يا بيه الموضوع خلص وفيه حد إستلم العناية وأنا ماشي انتهينا
- قالي: إحترم نفسك ولما أسألك ترد زي ما بسألك
بصتله بزهق كده و مردتش
= قالي: أنا أستاذك في القصر العيني إنسى إني مدير مستشفى دار الفؤاد أنا أستاذك وبسألك فإحترم نفسك وتقف عِدل ولما أساتذك يسألك ترد عِدِل
- قولتله : يا بيه بتكلمني بصفة أستاذ ؟؟
= قالي : أه
-قولتله : طلبت CT عشان كنت بدور على "mucormycosis "
دي عدوي فطرية بتطلع في الجيوب الأنفيه "nasal sinuses "
الفطر ده مشهور جدا جدا في مرضي السكر عشان نقص المناعه
إسمه المشهور بيه " الفطر الإسود " أكيد حضراتكم سمعتم عنه الفتره اللي فاتت كتير اللي إشتهر إن في سلاله من كورونا في الهند بتسبب الإصابه بالفطر الإسود
مشكلته الحقيقة إنه مع حالات تسمم السكر الكيتوني DKA بيحصله إنتشار وبيطلع من الجيوب الأنفيه و بيوصل للعين و الفص الأمامي من المخ وللأسف الحل إنك تعمله إزاله للعين بالكامل مع الفص الامامي من المخ
" enucleation and frontal lobectomy with a mortality of 60 % after surgery , Before surgery it is100 %"
- فقولتله : أنا بدور على mucormycosis " الفطر الإسود "
= قالي : بتدور عليها ليه ؟؟
- قولتله : حضرتك العيانة كان عندها إحمرار وتورم في عين واحده "unilateral eye echomosis and edema "مع إحتقان في الملتحمه "بياض العين " لنفس العين conjunctival injection
الأشعه المقطعيه CT كانت جات علي مكتبه فهو بص عليها
= فقالي : فيه fungus ball " فطر " موجود في ال maxilla وتشخيصك طلع صح
- قولتله : بجد ؟؟!
= قالي : إتفضل روح العناية
- قولتله : أسف حضرتك دلوقتي مدير المستشفى مش أستاذي في القصر العيني أنا أسف يا بيه الموضوع خلص
= قالي : كده ؟؟
- قولتله : أه
= قال لأستاذ الباطنة اللي قاعد قصاده : بعد إذنك عايز أقعد مع محمد لوحدينا شوية ( يعني بيأخد حقي منه قدامي بشياكه يعني بيقوله أطلع بره وأنا قاعد ) وبالفعل الراجل خرج وقفل الباب
- قالي : خلاص أنا خدتلك حقك
= قولتله : خدته منه بس مش منك أنا مخدتش حقي منك حضرتك مسمعتنيش ومسمعتش أنا عايز إيه وعملت كده ليه ؟؟ فأنا مخدتش حقي منك
- فبصلي وقالي : عايز تأخد حقك مني ؟؟
= قولتله : أه يا بيه
- قالي : عايز إيه ؟؟
= فسَكِت ..
- قالي : نضرب في أربعة
= قولتله : لا في ستة
قالي : خلااااص حصل
أبجني تجدني
هي الفكرة في حاجة متمداش بقى يعني متزودهاش خلاص أستاذك و حس إنه عمل حاجة غلط ، وأنا عندي 32 وتلاتين سنة بعد ما أخدت ال MDحاتم الجبلي مسكني عنايه الباطنه بالكامل في دار الفؤاد " بقيت رئيس القسم وأنا عندي 32سنة "
هي الفكرة إرادتك مهمة جداً ولازم تدافع عنها لكن فيه حاجة اسمها أستاذك في الكلية كبير عنك عَلِمَك ,غلط ورضاك هيعملي إيه أكتر من كده يعني ؟؟ هيبوس إيدك يعني ؟؟!
عايز أقولكم على حاجة إن معلومة صغيرة مذاكرها صح ممكن تنطرك معلومة صغيرة ممكن ناس كتيرة متعرفهاش فتنطرك نطرة جامدة في حياتك و كاريرك
ال Mucormycosis " الفطر الإسود" فيه ناس كتيرة أوووي ميعرفهاش وعلى فكرة مشهوره ودلوقتي بقت مشهوره أكتر
ومفتاحها مريض سكر جاي ب DKA وعنده عين واحده حمره و مورمه يبقي لازم تعمل اشعه مقطعيه علي المخ
وطبعاً أنا معرفتهاش من نفسي ولا قريت في كتاب لا ده من أستاذي الدكتور شريف مختار هو اللي كان بيمسك القلم ويحطه على ودانا كده ويقول عيان ال DKA عملتله ECG "رسم قلب "؟؟
تقوله : أه يا بيه
-يقولك بصيت على عينيه ؟؟
تقوله : أه يا بيه
لو مقولتش : أه يروح دايس بالقلم وشادك لغاية العيان اللي بعده
بصيت على عينيها عشان ال Mucormycosis فإحنا حافظين كده
عملت ECG عشان ال MI "جلطه القلب " في العيان ده بتكون silent يعني مبحسش بأعراض وفجأه قلبه يتوقف
إحنا حافظينها كده شريف مختار محفظنا كده القلم لغاية دلوقتي وداني بتوجعني منه
هو اللي علمنا الحاجات دي فلازم تدور على معلم تقيل لازم تبقى صبي لمعلم تقيل
Comments
Post a Comment
اكتب تعليق حول الموضوع