تكبير الشفاه ، ملاحظات تفيدج قبل لا تاخذين قرار الفلر :

التجمل بكل انواعه حق مباح للجميع وحرية شخصية  _ بشرط ان يكون العمل متقن  _ وعلى طاري الاتقان ، لو تاخذ جولة بالسوشل ميديا ، وتشوف الانفلونسر بالعراق ، اغلبهن مسويات فلر ويروجن لمراكز التجميل /  واكيد ماعندي اي اعتراض على هذا الشيء 

المشكلة وين ؟  المشكلة هن نفسهن فلرهن غير متقن ، اكو بيه عيوب وواضح جدآ الشفاه Fake مو طبيعية . 

على الرغم ان غاية حقن الفلر بالاساس غاية جمالية / عمل متقن يصلح العيب ان وجد ويبرز الجمال بمظهر طبيعي .. لكن الي اشوفه ( تكبير الشفاه لمجرد تكبير الشفاه والنتيجة ما توحي للجمال والاتقان . مظهر الشفاه مصطنع غير طبيعي ) 

 

 

 المهم  عمليات تجميل الشفاه lip enhancement عديدة _ البعض منها نتائجه دائمية ، مثل تداخل جراحي لزرع او رفع او عمل تناسق بالشفاه ، والبعض الاخر مؤقت ك اضافة دهون او كولاجين والشائع هل ايام اضافة مادة الفلر والغاية الاساس من هل عمليات كلها هي اصلاح العيب ان وجد وابراز الجمال اكثر . تمام 

.

على حسب الاحتياج يتم حقن الشفاه بالفلر سواء نوع Juvéderm  او انواع اخرى بالمكان والكمية المطلوبة . الموضوع مياخذ اكثر من نصف ساعة ، استخدام الفلر أمن جدآ واعراض جانبية مجرد شيء مؤقت ويختفي . بس اذا الفلر رخيص ممكن يسبب حساسية  

.

حقنة الفلر تدوم بين ٦ شهور الى سنة . سنتين اقصى حد بعدها نحتاج حقن اخرى حتى نحافظ على الشكل المطلوب .

.

* المهم ، اذا عندج عدم تناسق بحجم وشكل الشفاه وقررتي تسوين حقن فلر . اكيد اني داعم الج بهذا القرار مدامه راح يرفع من معنوياتج وثقتج بنفسج ويبرز جمالج اكثر _ بس شنو اكو ملاحظات مهمة تفيدج اذا تردين مظهر طبيعي : 

 

 _ اول نقطة هي اختيار الطبيب  _ جراحين اختصاص التجميل هم الافضل بهذا المجال بعدهم مختصين الجلدية وجراحين الوجه والفكين والاطباء العام الي ماخذين شهادة بمجال حقن الفلر   

هذا كله مو مهم _ بگد ما مهم تختارين طبيب عنده ذوق ، الطبيب الذوق راح يرفض يشتغل اذا شاف العملية والشكل والحجم الي انتي ترديه مراح يناسب وجهج وينطي نتائج عكسية ، الطبيب الذوق ما يهتم للمال بگد ميهتم لسمعه عمله . 

.

.

  _ ثانيآ ، ابد لا تسوين حقن فلر فوگ بعض قبل لتخلص المدة ، وتذكري زيادة الوزن والهرمونات ممكن تضاعف حجم الشفاه اضافة للفلر ، والنتيجة راح تظهر الشفاه على شكل تورم _ مو طبيعية ))

وتذكري من راح تاخذين قرار الفلر بعد عقلج راح يتعود عل الشكل الجديد ، وبهل حالة راح تتعودين عل الفلر والتكلفة راح تتكرر كل فترة 

.

.

  _ ثالثآ ، دراسة علمية تم نشرها ب JAMA _ وجدوا انه كمية الفلر ونسبة تناسق الشفاه اذا زادت عن حد معين  _ راح العين تكتشف انه مظهر الشفاه غير طبيعي _ وهنا اهم نصيحة ممكن افيدج بيها . هي (( اخذي النتائج بالهداوة ، كل متزداد كمية الفلر وتغيير بشكل الشفاه كل ميزداد المظهر الاصطناعي ، وكل ميقل الفلر ويتم حقنه بالمكان الصحيح دون تغيير للشكل الاصلي ، كل متظهر الشفاه بشكل طبيعي جذاب _ ويصعب حتى علينا ك مختصين اكتشاف ذلك _ وتذكري مو مهم السعر المهم النتيجة تكون طبيعية توحي لعمل متقن ))

.

.

 _ اخيرآ (( لا تسوين فلر بس علمود صديقتج لو صور السناب تطلع احلى لو زوجج ميباوع على غيرج _ كلهم رئيهم مو مهم بهذا الجانب بگد ما هو قرارج وقناعتج ونظرتج لذاتج . متفقين ؟؟