ازاي أزود مناعتي أنا و أسرتي ؟

ده السؤال الأشهر حاليا .. بس نفهم الأول ازاي المناعة بتتكون :

•  المناعة بتبدأ تتكون من و انت جنين حتى يومك ده يعني المناعة تراكمية .. و بتتوقف على حاجات كتير أهمها : العوامل الوراثية، طريقة الولادة، نوع الرضاعة، الاكل، مدى تعرضك للعدوى و السموم، الأدوية و المضادات الحيوية اللي خدتها على مدار حياتك، درجة الضغط العصبي و الجسدي، ممارسة الرياضة، وجود أمراض مزمنة زي السكر

• طيب ايه الأكل الصحي اللي "يحافظ" على مناعتي :

  البروتين أهم حاجة للجسم عشان تجديد الخلايا التالفة وبناء أجسام المناعة و من أحسن أنواع البروتين هو البيض  .. اللي المفروض يتاكل يوميا في وجبة الفطار بجانب انه غني بعناصر تانية مهمة زي فيتامين د، ب، الفوسفور ، الكالسيوم، الزنك .. يعني مثلا لو أكلت 4 بيضات كده انت غطيت احتياجك اليومي من فيتامين ب12 

  الأكل الغني بفيتامين د (السمك والتونة، صفار البيض، اللبن، الجبن، الزبادي، المشروم) اللي الدراسات أثبتت انه مهم جدا للمناعة وتأدية كل وظايف الجسم بشكل صحيح و عشان تاخده مكمل غذائي لازم تعمل تحليل عشان بناء عليه الدكتور هايقولك نوع العلاج و الجرعة و المدة

  الفواكه و الخضار بكل أنواعهم مع عدم الإسراف في الكميات .. فيتامين سي موجود بكثرة في الفلفل الألوان و الفراولة و الجوافة .. فيتامين سي مش هايحميك من العدوى هو مجرد بينضف الجسم من نواتج الأكسدة (ناتج الخناقة بين الفيروس و مناعة الجسم) .. و الخضار الورقي زي السبانخ غنية بالبوتاسيوم و الحديد

  الكربوهيدرات و النشويات الصحية زي الرز و الشوفان و البطاطس و البقوليات الفول و العدس

  الابتعاد تماما عن السكر الأبيض المصنع و الدقيق و الحلويات الزيادة لانها بتضعف المناعة و  بتخليك تجوع أكتر 

  العسل مفيد جدا للمناعة و أحسن بديل للتحلية

  الدهون الصحية مهمة جدا لتقليل عمليات الالتهاب في الجسم و دي موجودة في زيت الزيتون و المكسرات (زي اللوز الغني بفيتامين هـ) مع الاعتدال في الكميات عشان الوزن

  الزنك موجود في اللحوم الحمرا و البيض و منتجات الالبان و المكسرات و الشكولاتة الغامقة .. يعني مثلا 200 جرام لحمة يغطي احتياجك اليومي من الزنك .. و بالمناسبة كترة الزنك بتعمل العكس و تضعف المناعة !

  الثوم مفيد للمناعة .. بس توم عادي مش عالي 

  مشروبات زي الشاي الأخضر مفيدة كمضادات أكسدة

  الفشار وجبة خفيفة (سناك) صحية بين الوجبات لما تجوع و كمان سعراته قليلة عشان تخلي بالك من الوزن

• بجانب الأكل لازم نعرف العادات الصحية اللي تحافظ على المناعة و تحمي الجسم من الإجهاد

  أولا و أخيرا شرب المية أهم حاجة لصحة جسمك و ده اللي بننساه دايما  .. على الأقل 2 لتر يوميا متقسمين على مدار اليوم

  النوم الكافي على الأقل 7 ساعات للبالغين و 10 ساعات للأطفال

   تقليل مدة التعرض للشاشات (تلفزيون، موبايل، تابلت) لساعتين في اليوم خصوصا للأطفال .. صعبة شوية بس مفيدة

  ممارسة أي نشاط بصورة يومية حتى لو المشي أو طلوع السلم أو تمارين البيت

   البعد قدر الإمكان عن الضغط النفسي و العصبي خصوصا لكبار السن

  التعرض لأشعة الشمس يوميا نص ساعة على الاقل 

   السمنة و زيادة الوزن من أهم أسباب ضعف المناعة و لازم تقليل الوزن بنظام غذائي متوازن شامل كل العناصر 

  عشان كده مش صح تروح تجيب دوا أو مكمل غذائي أو فيتامين  من غير استشارة الطبيب و بعد عمل تحليل تعرف بيه المشكلة فين بالظبط بناء على كلام قريته على النت ممكن مصدره مش مضمون لأنها ممكن تضرك عشان زيادة أي حاجة عن حدها مضرة .. و ممكن كمان تعمل أزمة نقص للأدوية دي لحد محتاجها فعلا .. و لأن كل العناصر الغذائية ممكن تلاقيها بسهولة في الأكل الطبيعي