تخيلو فعلا الليمون زي ما انتو بتقولو بيفسد علاج الملاريا🤷
نحن ي داب عرفنا الاسطورة بتاعتكم دي جاية من وين..وبنحترمها جدا جدا"...
قبل اي حاجه عايزين نسألكم سؤال؟
لما نقول علاج الملاريا بنقصد شنو؟!
علاجات الملاريا كتيرة شديد...منها الكوارتم(لوميفانترين+ارتيميثر) ،منها الكينين..منها الارتيسونيت..منها البرايماكوين..منها الكلوروكوين وركزو لي على الاخير ده..
نجي لاكتر دواء شائع لعلاج الملاريا هو الكوارتم..بيجي بي شكل صيدلاني بيحتوي على 6 حبات وبيجي بي شكل صيدلاني بيحتوي على 24 حبة..كلهن في الفعالية سواء...
لما تجو تقولو الليمون بيفسد علاج الملاريا وتطلقوها بشكل عام كده..انتو هنا بتقصدو الكوارتم ده..واي زول سوداني لما تقول ليهو علاج ملاريا بيفهم كده...لانو ده اكتر نوع شائع في علاج الملاريا اللي سببها طفيل الفالسيبروم...وبيدخل ضمن خيارات تانية لعلاج حتى الملاريا اللي بتسموها الحبشيه...(Vivax).
نرجع للكلوروكوين اهلنا ناس الجزيرة بعرفوهو (زين )...اكتر دواء مستخدم في فترة من الفترات لعلاج الملاريا...حاليا فعاليتو تكاد تكون قليلة شديد مقارنه مع الكوارتم الفوق ده..والسبب شنو؟!
السبب ناس ملاريتي بعرفها...وهم اساسا ماعندهم ملاريا ولا شي....
ديل ادو طفيل الفالسيبروم فرصه انو يتعرف على العلاج ده للاسف وشوية شوية كده حنفقد كل علاجات الملاريا لو ما سمعتو الكلام وااهتميتو بثقافه الفحص...
نجي لموضوعنا الفوق:
تخيلو فعلا الليمون بيفسد(بقلل فعالية) علاج من علاجات الملاريا الا وهو الكلوروكوين ده في فترة من الفترات..لما كان شائع استخدامو؟!
مش الليمون بس..الليمون والعرديب والكركدي ديل كلهن بقللن فعالية الكلوروكوين...اذا انتو بتقصدو بيفسدنو كده يبقى فعلا كلامكم صح...
لكن التعميم مخل...
الكوراتم اللي هو اكتر دواء شائع لعلاج الملاريا اللي بيفسد مفعولو وبيؤدي لزيادة تركيز احد محتوياتو في الدم هو (القريب فروت) القرين فروت..القريب ..او اي مسمى بتعرفوهو بيهو...
القريب ده بيفسد اغلبية الادوية..بيفسد العلاقه بين القريب والبعيد
اما الليمون ماعندو علاقه بي علاج الملاريا (كوارتم)..الحاجه دي طوالي بنكتبها بي شكلها ده في بوستاتنا ونحن بننصح فيكم...
حاليا الكلوروكوين ده ما مستخدم كتير..لكن اكتر دواء شائع لعلاج الملاريا هو الكوراتم ومتوفر في الصيدليات..يلا ده ماعندو علاقه ب الليمون...
ف شنو..اشربو ليمونكم ساااااي...
الكلام ده كلام علمي مثبت لي ورقه علمية اتنشرت من باحث سوداني في الوقت اللي كان السودانيين اغلبيتهم بيستخدمو الكلوروكوين لعلاج الملاريا. ...ونحن بنرجح بشكل كبير انو ده سبب الاسطورة الحايمه دي...
الكوارتم بيجي بي 24 حبة،لو نقصناهن تلاته حبات حيبقى 21 اها نحن دايرنكم يوم 21 ده اكراما للشعب السوداني تقاسموهم المشروبات الاصيلة السودانية دي شاكلة العرديب والليمون والكركدي...
التلاته مشروبات ديل علاج لعطش المناضل السوداني في الشوارع وتعبير عن عادة كرم اصيلة كانت ولا زالت فينا للعدو قبل الحبيب...
والتلاته حبات مالا؟!
Comments
Post a Comment
اكتب تعليق حول الموضوع