الكحة .. 

▪︎ أكثر مشاكل الأطفال و من الحاجات المتكررة و من أكثر المشاكل اللي تخلي الأهل ماشيين جايين على الدكتور .. 

▪︎ الكحة و شن أسبابها  !!

▪︎ أسباب عديدة لكن مش كلها خطيرة و تخوف منها : 

- كحه بسبب رشح أو مخاط بالأنف ومش لازم تشوفه بعينك نازل من الأنف لهذا ممكن ينزل من خلف الأنف وإلا يتجمع في الصدر  ويسبب كحة ، و هادي ديما نقول إنها زي الشيشمة تصب من الأنف و تتجمع في الصدر معناها نسكروا الشيشمة من فوق بيش مايتعباش الصدر .

- كحة بسبب بلع شيء صغير مثال لعبة صغيرة ، حبة مكسرات ، ككاوية ، بطارية صغيرة أو أي شيء من الأشياء هادي تخش  تسكر جزء من الشعب الهوائية و يسبب كحة مستمرة و متكررة .. وكان سكرت القصبة الهوائية كلها الكفل لونه يصبح أزرق ويقطع النفس وهادي طبعاً تعتبر حالة طواااارئ ،  ومرات الشيء اللي سكر الشعب الهوائية ، تسبب التهاب كان ماخطرتش في البال . 

-كحة بسبب إرتجاع في المرئ ، و هذا يصير مع الرضع و المواليد اللي عندهم إرتجاع الحليب يرجع في المرئ و قبل ما يوصل للفم ينزل تاني في المرئ فالرضيع يشرق هلبة و هو راقد و يصير حتى مع الأطفال الأكبر شوية مش الرضع بس ، و يجي الطفل يشكي من وجع في نص الصدر و يقولك إنه يكح في الليل بس ..علاش !! 

*لأنه يرقد على ظهره ويزيد الارتجاع . 

-كحة بسبب حساسية الصدر و هادي نعرفوها بتكرار نوبات الكحة ، تصفير الصدر ، بلغم شفاف هلبة و مايتحسنش بسهولة و لازم ياخد جلسات بخار و بخاخات .. 

*طبعا الحساسية هادي درجات وانواع : 

ممكن في الشتاء بس .

ممكن كل شهر .

ممكن مع المجهود و الرياضة .

-كحة مرات تولي عادة لطفل .. كيف !!

يعني كان يكح فعلاً في الأول و بعدين تحسن تمام و قعد يكح حتى بعد ما صدره تحسن لكن تلقي إن كحته تختفي بمجرد ماهو ينشغل بحاجة تانية و إلا يرقد . 

-كحة بسبب إلتهاب الشعب الهوائية و هذا أثر في الأطفال اللي عمرهم شهور نتيجة برد و زكمة أو شوية رشح ينزلوا علي صدره و الشعب الهوائية ضيقة و صغيرة تجمع بلغم و يسكر صدره و مايقدرش يرضع ويدهش و غالباً بياخد جلسات و ممكن يحتاج دخول المشفى .

-كحة بسبب إلتهاب رئوي و هذا معاها حرارة عالية 

و صعوبة في التنفس و دهشة و تحتاج دخول المشفى . 

-الكحة الحنجرية و يكون ليها صوت مميز  زي النباح 

و تصير عادة فجأة و تزيد في الليل و مع الفجر و يكون علاجها عادة جلسات الإستنشاق . 

▪︎ و بعد ما عرفنا أغلب أنواع الكحة وعرفنا إنها هلبة أنواع و كل نوع بروحه وكل نوع ليه علاج بروحه لازم من كشف الدكتور و يسمع بالسماعة صدر المريض 

معناها مانكلمش دكتور بالهاتف وهو يوصفلي دواء هذا صراحة يضحك عليك للأسف .. 

 الكحة مافيش حد يعالجها ويشخصها بالهاتف 

 و لا دواء من النت و لا من صيدلي .. 

*لازززززم كشف لاااااازم كشف لااااااازم .. 

الحاجة الوحيدة ممكن تديرها هي إنك تعطي سوائل لين توصل لدكتور و هذا طبعاً مش للأطفال اللي عمرهم أقل من خمسة ستة شهور وطبعاً الأطفال من ستة شهور نكتبلهم في علاج وقائي يفيد فيهم هلبة ويقوي مناعتهم وتقل نوبات البرد والكحة عندهم.