حاجتين من أخطر المواقف إللي بتأذي الطفل وتضر جهازه العصبي

حاجتين من أخطر المواقف إللي بتأذي الطفل وتضر جهازه العصبي،

لازم ومهم نركز في إننا نتجنبهم:

1- إني آخد الطفل على خوانه (أخضه) زي:

- إنه يكون بيعمل حاجة غلط ومندمج وميكونش حاسس أصلا إني معاه في الأوضة ومديني ضهره فاتسحب و فجأة أقوله بتعمل إييييه وأزعق، فيتخض جامد، خصوصًا الأطفال تحت 3 سنين قلبهم بيوجعهم من الحركة دي.

- يكون عمل حاجة غلط وخلاص اتكلمنا فيها ودخل أوضته، وفجأة أحس إني كان لازم أشد عليه أكتر فبدون أي مقدمات أخش عليه أضربه.

- وطبعًا الناس إللي بتلعب مع الأطفال بإنها تستخبي وتخضهم وتضحك لما يتنفضوا، مش قصدي على إننا نخبي وشنا ونقول بخ، أقصد الخضة المفاجأة!

2- إني أجبره يبطل عياط وأفضل أزعق وأبرق لحد ما صوت عياطه يبدأ يوطي ويتقطع، والحركة دي من الأسباب الأساسية إللي بتخلي الطفل يتأخر أو يتهته أو يقطع في الكلام.

- عموما الحاجتين دول بيوتروا الطفل بشكل مباشر وقوي لو بنعملهم كتير، التوتر ده ممكن يظهر بعد كده في إن الطفل يكون:

1- عصبي 

2- بيخاف 

3- بتجيله كوابيس

4- بيتخيل حاجات مش موجودة ويخاف 

5- تبول لا إرادي 

6- قرقضه أظافر ومص أصابع 

7- بيعييط على أي حاجة 

8- عنيد

- وغيرها حاجات كتير بتختلف من طفل للتاني،

طيب لو عملت كده أقعد ألوم نفسي و أعييط بليل؟ .. أكيد لأ

• عادي نغلط.. المهم نحل.. لو حصل ده مني أعمل الآتي فورًا:

- أعتذر للطفل بهدوء: أنا أسفه جدًا إني عملت كذا (من غير ما تقولي بس 

أنت السبب)

- أقر بمشاعره: أكيد فعلا دي حاجة تضايق

- ممكن أحكيله: أنا كمان حصلي كده مرة وكنت متضايقة جدًا (عشان يحس إنه مش غريب)

- اطلبي حضن: أنا محتاجة حضن، لو تَقبّل؛ أحضنيه.. لو لأ؛ خليه براحته.

بس كده.. وممكن وقت تاني لما يهدي خالص، تتناقشوا وتركزوا على الحلول.

• رفقا بقلوبهم الصغيرة، مش حمل خضة أو كبت!

* الطفل بيحس بصدقك لما تعتذر وبيسامح، و في الغالب كل ما هتجاهد نفسك تبعد عن الغلط ده لو بيحصله أي أعراض من إللي فوق هتبدأ تقل مع الوقت لإن السبب مبقاش موجود.