الابرة الثلاثية ابرة الإنفلونزا
الابرة الثلاثية
ابرة الإنفلونزا
فولتارين .. ديكساميثازون .. مضاد حيوي
حرام في حق الانسانية وحق الأجيال القادمة لما يجيك واحد على الصيدلية معاه شوية برد وتروح تعطيه الخلطة العجيبة عشان يقول عنك دكتور صيدلي شاطر وفهمان.... 😳
انسألنا كثير عن هاي الخلطة... فولتارين وديكسا ومضاد حيوي.... ديكلوفين وديكسا ومضاد حيوي.... اختلفت المسميات والمصيبة واحدة...!
يا جماعة الخير البرد اللي بيصيب الناس (عادة) عدوى فيروسيه.. يعني فايروس وبياخذ وقته وبيروح ممكن من 3 ايام لـ7 ايام... طيب ليه بنعطي مضاد حيوي والمريض مو بحاجته؟؟؟ احنا لا نلجأ للمضاد الحيوي الا اذا الفايروس كان سبب في حصول عدوى بكتيريه ثانويه واللي ممكن تظهر على حالة حرارة شديدة جداً وإلتهاب شديد في الحلق.
ورداً على الناس اللي بتحكي احنا بنعطي المضاد الحيوي كـإجراء وقائي من الاصابه بعدوى بكتيريه ثانويه ما في اي معلومة بالدنيا بتقول انه المضاد الحيوي بيتاخذ كوقاية بهيك حالات... في الدول المتقدمة بيحاولوا وبيجربوا كل الطرق الممكنة قبل ما يعطوا المضاد الحيوي وبيحفزوا جهاز المناعة للمريض بحيث انه هو يتغلب على المرض ويقوم بدوره والمضاد الحيوي اخر خيار..
لا ويا ريت بيعطي كورس كامل ابر مضاد حيوي ابرة واحدة والسلااام...
البكتيريا ممكن تقاوم المضاد الحيوي بعدة طرق مختلفة فلما تعطي ابرة مضاد حيوي وحدة انت بتسمح للبكتيريا انها تكتشف طريقة للمقاومة و بعد فترة المضاد يبطل يفيد المريض (مقاومه)
ابرة الفولتارين كمسكن للألم وخافض للحرارة فعالة لفترة تتراوح تقريبا لمدة 24 ساعة فقط كحد اعلى وتجنب اعطائها لمرضى الضغط وممن يعانون من الفشل الكلوي
ابرة الديكسا في حالة الـعدوى الفيروسيه تهبط من المناعة اللي احنا بحاجتها اصلا لمقاومة الفايروس وبالتالي يصبح الجسم سهل الاصابه بالعدوى الثانويه او يزيد الحاله الي موجوده بالمريض اصلا
اذاً يكفي علاج الأعراض اللي بتصاحب البردية كالحرارة او الرشحة والصداع ونحكي للمريض يكثر سوائل دافية
وأخيراً لو اضطريت لإعطاء ابرة المضاد الحيوي اعطي كورس كامل وفهم المريض حاجته لذلك عشان ما نضطر نرجع لعصر ما قبل المضادت الحيوية و وقتها علاج شوية التهاب بكتيري راح يكون اصعب من علاج السرطان...
Comments
Post a Comment
اكتب تعليق حول الموضوع