الرحم الطفولى
الرحم الطفولى
الرحم أو زى ما بيسموه فى الريف ( بيت الولد ) 🏡
و زى أى بيت 🏠 لازم يكون مساحته متناسبة مع حجم سكانه علشان يقدروا يسكنوا فيه !!
يعنى مش منطقى إن راجل طبيعى , ينام فى سرير رضيع لسه مولود !!
يعنى حجم الرحم لازم يكون مناسب لحجم الجنين اللى هيسكنه
علشان ينفع أنه يحصل فيه الحمل 🤷🏻
الحجم الطبيعى المناسب للرحم 👈 اللى يسمح بحدوث الحمل بيكون ( 7.6 سم ) طول × ( 4.5 سم ) عرض و 3 سم سُمك .
طيب و لو كان حجم الرحم أصغر من الأبعاد دى يحصل إيه ؟🤔🤔
يحصل إن صاحبة الرحم ده متقدرش تحمل
يعنى ببساطة تصاب بالعقم
و الحالة دى 👈 أسمها #الرحم_الطفولى 👧🏻
الرحم الطفولى 👈 عادة صاحبته بتتولد بيه
يعنى عيب خلقى فى تكوين الجهاز التناسلى للمرأة ممكن يكون العيب قاصر على الرحم فقط
و ممكن يشمل بقية الأعضاء التناسلية كمان 🤦🏻
و ممكن يكون العيب الخلقى ده مجرد إن #الرحم حجمه أصغر من الطبيعى
و ممكن يكون كمان مشوه , يعنى شكله نفسه مش طبيعى !!
لكن مش كل #حالاتا_لرحم_الطفولى خلقية ده الشائع أو الغالب 🤷🏻
إنما فيه حالات بيكون فيها الرحم الطفولى نتيجة لمضاعفات مرض تانى أو مشكلة تانية تتسبب فى إن رحم الطفلة 👧🏻 ميكبرش معاها
أو إن الرحم اللى حجمه طبيعى يضمر و يتحول الى طفولى !!
المشكلات الصحية اللى ممكن تسبب الرحم الطفولى :
- بعض الأمراض العصبية و النفسية .
- مرض السكر .
- إضطرابات الطعام زى البوليميا إذا تسببت فى نحافة شديدة .
- النحافة الشديدة أيا كان سببها .
والنحافة هنا مقصودة بمفهومها الطبى مش العرفى
يعنى إن مؤشر كتلة الجسم يكون أقل من 18 📉
- مشكلات الغدة الدرقية .
- مضاعفات أمراض الطفولة زى الحصبة مثلا .
- التدخين 🚬 و الكحوليات
- إستئصال المبايض و لو إن هنا كده كده مبيحصلش حمل إنما قلت أقولكم برضه 🙋🏻 إن ازالة المبايض بتسبب الرحم الطفولى .
- العلاج الكيماوى و الأشعاعى .
طيب دلوقتى البنت اللى عندها #رحم_طفولى دى
هل فيه أعراض بتميزها عن غيرها
أو ممكن تشك منها إن عندها رحم طفولى ؟؟ 🤔🤔
أها فيه أعراض :
=> فى الطفلة قبل البلوغ 👧🏻 بيلاحظ أحيانا صغر فتحة المهبل و ممكن توصل الى عدم وجود فتحة مهبل أصلا
لكن ده مش فى كل الحالات ☝️
أحيانا بتكون صاحبة الرحم الطفولى بفتحة مهبل طبيعية تماما .
=> غياب الدورة الشهرية
يعنى البنت تكبر و توصل لمرحلة المراهقة و متجيلهاش دورة !!
=> ممكن يحصل ألم فى أسفل البطن .
لو الدورة بتيجى فتبقى مصحوبة بألم شديد جداااا !!
👈 بعد الزواج 👰🏻 بيكون العرض الرئيسى هو عدم حدوث الحمل ☝️🤰
طيب بيتشخص إزاااااى الرحم الطفولى ؟؟
فى الأطفال عادة مش بيتشخص لأن محدش بياخد باله أصلا إن فيه مشكلة
لكن مع دخول الطفلة الى مرحلة المراهقة 👧🏻 و غياب الحيض بيبتدوا أهل البنت يبحثوا عن سبب عدم نزول الحيض رغم إن بنتهم عدت 16 سنة ؟؟ 🙄🙄
ب يتم هنا التشخيص بفحص البطن بالسونار 🔬و فحص بأشعة الرنين المغناطيسى 📹 اللى بيتضح منهم إن الرحم طفولى , يعنى حجمه أصغر من الطبيعى .
طبعا هتسألونى هنا , هو الرحم الطفولى له علاج ؟؟ 🤔🤔
والله ده يتوقف على حجمه يعنى لو حجمه أقل من 3 سم طول
ف دى حالة للأسف ملهاش علاج
و أنا أقصد العبارة حرفيا 👌🙋🏻 يعنى لو طول الرحم 2.9 سم حتى
ف دى حالة ملهاش علاج 🤦🏻
أما إذا كان طول الرحم أكتر من 3 سم 💁🏻
ف ممكن العلاج الهرمونى يجيب نتيجة و يكبر حجم الرحم لكن العلاج هنا بيحتاج فترة طويلة بتوصل لسنوات
علشان كده مهم أنه الحالة تكتشف بدرى و العلاج يبتدى بدرى
لأنه من غرائب الأمور اللى بنشوفها
أنى الاقى ست عمرها مثلا 35 سنة 👩🏻
جاية تكشف علشان تأخر الحمل و يكتشف إن عندها رحم طفولى
ف لما نسألها يا ستى أنتى بتجيلك دورة ؟؟ فتقولك لأء ☝️
أنا عمرى ما جاتلى دورة !! 🤷🏻
طيب وليه مرحتيش لطبيب 👨🏼⚕ تقولك أصلى اتأخرت فى الزواج 👰🏻
و فى بلدنا عيب الآنسة تروح لطبيب نسا 👨🏼⚕❌
ولما إتأخرت فى الحمل بعد الزواج جيت علشان أكشف !!
هنا ف الحالة دى العلاج بيعتبر بلا جدوى 🤷🏻
لأنه أصلا نتيجته مش أكيدة , غير أنه على ما يجيب نتيجة ممكن تكون المرأة دى وصلت ل سن #إنقطاع_الحيض !!
بينما لو كانت أبتدت العلاج فى سن المراهقة , كان ممكن يبقى فيه أمل إنها تقدر تحمل !!
علشان كده بنقول أنه أى بنت توصل سن 16 سنة 👧🏻 بدون نزول دورة لازم تروح لطبيب النسا 👨🏼⚕
مفيش حاجة أسمها الآنسة متروحش لطبيب نسا
البنت بتتولد عندها #جهاز_تناسلى
و ممكن يمرض فى أى وقت زى أى جهاز تانى من أجهزة جسمها ويحتاج علاج
مش بيطلعلها فجأة يعنى جهاز تناسلى لما تتزوج
هى بتتولد بيه و بيفضل معاها لغاية وفاتها
إتجوزت بقى إتطلقت إترملت أو سنها مكملش سنة ولا حتى سنها 90 سنة _ متفرقش 🤷🏻
مش عيب ولا حرام إنها تروح لطبيب نسا 👨🏼⚕ فى أى سن و فى أى حالة إجتماعية هى فيها !!
Comments
Post a Comment
اكتب تعليق حول الموضوع