التعامل مع حديث الولادة بين العلم والتقاليد ..

اوراق مهمة تحتاجيها دائما ... دفتر اللقاحات و مخططات النمو والوصفات الطبية .

ركزي بوزن طفلج اول يوم الولادة لان بعدين هواي يسالوج الاطباء علي .. احفظيه، بعدها يزيد بالمعدل تقريبا ٧٥٠ غم أول شهر.

انطي ابنج حليبج من اول ساعة ومعليج باللي يكلج حليبج ما يكفي وما يشبع ... قطرات من حليب اللبأ ( الصمغة ) الي ينزل اول ايام ماكو شي يعوضها .

تجنبي الهز الشديد للطفل لان ممكن يسبب نزيف بالدماغ ...

فيتامين دي من اول يوم.

اليرقان الولادي( ابو صفار ) يصير ب٦٠٪؜من الاطفال حديثي الولادة .. يعني طبيعي مو بس ابنج صار عنده .

اليرقان يحتاج رضاعة و متابعة أو علاج ضوئي بالمستشفى .... يعني مو نيون بالبيت ولا ثوم ولا خرزة صفرة ولا مي وشكر ولا كلوكوز ولا دبس وعسل .

المولود إنسان ..يحس بالجو مثلنا ..يعني لا تدثري وتسمطي بالحر وتخلي يفطس .

الخنفرة و العطسة ظواهر طبيعية تقل مع الوقت.

ظواهر مقلقة تحتاج نروح طبيب : الطفل ما يقبل الرضاعة أو ما يگدر يرضع ، لونه يزرگ ، نفسه يون وسريع ، خامل وما يكعد ونايم طول الوقت .

اهتمي بنفسج و صحتج حتى تكدرين تهتمين بابنج..

اكلي أكل صحي و متوازن ،

ممنوع أدوية ما الها داعي،

اشربي حليب هواي.

و ممنوع اكل حار أو يسوي انتفاخات .

حديث الولادة ينام هواي بس متقطع..نومج راح يتخربط .

حديث الولادة يسمع من هو جنين باخر شهور الحمل... لهذا اذا ما يفز ويفزع من الصوت العالي لازم نقلق.

لازم الطفل يسوي خروج خلال أول ٤٨ ساعة . وإلا نستشير الطبيب .

أنماط الخروج مختلفة عند حديثي الولادة.. اكًو طفل بعد كل رضعة يصير خروج و طفل خروجه كل كم يوم ..

النوم على البطن ممنوع ..إلا بعد الرضاعة و انتي گباله وما تغفلين عنه ولا لحظة . والأفضل ينام على ظهره ..لان ممكن يختنك وإنتي ما منتبهه .

غيري الحفاض من ٣_٤ مرات يوميا ومباشرة بس الخروج و نشفي المنطقة زين . و ادهني زنك او اي كريم يحتوي زنك..تحميه من التسلخات.

طفلج يبجي هًواي .... شتسوين !!!

إذا جوعان رضعيه ..

شبعان و منفوخ تريعي ..

عنده مغص دلكيه ..

يريدج تشيلي شيلي لا تخلي يبجي والله شنو خاف يتعود على الشيل.. هو إنسان و يريد اهتمام و الاهتمام ما ينطلب .

الحرارة و الكحة بحديثي الولادة مو طبيعية و مو حميدة ..لازم فحص دكتور .

بنهاية الشهر الثاني والثالث الطفل يبدي يبتسم اذا تضحكي .. ويهدأ من يبجي و تحترمي وتحجين وياه ..

تعاملي وياه على إنه إنسان محتاج غذاء و حب و عناية .

نظمي الرضاعة كل ساعتين اول أسبوعين وبعدها على قابليته وحاجته .. وخلي يتريع زين بعد الرضاعة وإذا عنده خنفره استعملي محلول ملحي قبل الرضاعة وقبل النوم.

السرة لا تدخليها داخل الحفاظة لان ممكن تتلوث ...

منو استفاد من البوست وتعلم منه ..؟؟

سوي منشن وشير من البيج وفيدوا الآخرين ..