إزاي نختار الجِبَن "الصحيّة" من السوبر ماركت؟؟
-الحقيقة ده موضوع في غاية الأهمية..ليه بقى؟
لأن الجِبَن بالذات من الأغذية الهامة و ده لاحتوائها على البروتين الحيواني و المعادن و الڤيتامينات الكتيرة
،بالإضافة إلى إن عادةً استهلاكنا للجبن بيكون عالي
و موجود في الفطار و العشاء و أحياناً الغداء "زي الموتزاريلا و الجبن الرومي اللي بنضيفها على طواجن المكرونة بشاميل و البطاطس بشاميل و البيتزا
و غيرها".
و بالتالي مهم إننا نهتم و "نركِّز" في اختيار الجبن اللي بنشتريه أياً كان نوعه سواء أبيض أو رومي أو موتزاريلا أو غيره.
و خدوا بالكوا..لو هتقدم لولادك جبن "غير صحيّة"
"بشكل دائم و مستمر" و أنت مُتَخيّل إن الفوائد اللي فيها هتغطي أو تعادل أضرارها، يبقى الأفضل بلاش تجيبها أساساً عشان ده مبدأ مش صحيح على الإطلاق
معيار الاختيار اللي هنتكلم عنه في البوست ده هو "مصدر الدهون في الجبن"..هل هو دهون اللبن طبيعية و لا زيوت نباتية:
-طيب ليه المصانع بتضيف الزيوت النباتية للجبن؟
الإجابة: عشان الزيوت النباتية بتعمل "ثُقل" في القوام و تجانس في الملمس
بتاع الجبن و بتكلفة "أقل بكتيييير" من اللبن الطبيعي١٠٠٪ و إنتاج كمية لا بأس بها من الجبن.
طيب أول حاجة هنعملها إننا هنقسّم الجِبَن المختلفة لمجموعتين أساسيتين:
*المجموعة الأولى: جِبَن غير صحيّة بكل أنواعها و ماركاتها التجارية "بلاش نشتريها "حتى لو كانت مستوردة"
*المجموعة التانية: جِبَن محتاجين "نركِّز" و إحنا بنشتريها عشان نختار الأفضل و نتجنب المُضر منها
-نبدأ بالمجموعة الأولى:
من فضلكم بلاش بلاش بلاش ندخّل الجبن المطبوخة بيوتنا أياً كان نوعها و ماركتها،
و الجبن المطبوخة تشمل الجبن الكوبايات "سبريد" و كمان الجبن المثلثات أو المربعات.
الجبن المطبوخة كلها زيوت نباتية و مُكسبات طعم
و مثبتات قوام و مستحلبات..و حتى لو من لبن طبيعي كامل برضه لها أضرار كتير يعني كل الموبقات فيها
-المجموعة التانية:
-تشمل الجبن البيضاء و الفيتا و الاسطنبولي و الملح خفيف و الدوبل كريم و البراميلي و الرومي و الشيدر و الجودة و الموتزاريلا و القريش و الجبن السورية.
-لازم نختارها بعناية "شديدة"، و هنا هنتكلم بصفة خاصة عن "إضافة الزيوت النباتية" للجبن.
*أولاً الجبن المُعلَّبة:
-هنقرأ كويس جداً مكوناتها و نتأكد إنها مصنوعة من حليب طبيعي و ليس من دهون أو زيوت نباتية.
-طيب لو لقيت في المكونات الاتنين موجودين "حليب طبيعي/زبدة و زيوت نباتية/دهن نباتي"..أشتريها و لا لأ؟🤔
الإجابة: لأ متشتريهاش يا فندم "إلّا لو حضرتك عارف أضرار الزيوت النباتية دي و موافق بها"، لأن وجود الحليب الطبيعي/الزبدة مش هيعادل و لا هيقلل "ضرر" الزيوت النباتية المُضافة.
-طيب أمّال الشركات بتكلّف نفسها ليه و تضيف حليب طبيعي/زبدة مع زيوت نباتية؟
الإجابة: عشان تحصل على جبن قوامه تقيل و كميته كبيرة باستخدعشان ت"أقل" من اللبن..
و ده بيوجّه عقلك الباطن إن الجبن النباتية الدهن زيّها زي الجبن التانية..فخلّيك ناصح
و فيه في الصور أمثلة لجبن طبيعية هتلاقوا مكتوب عليها "١٠٠٪طبيعي أو ما شابه ذلك" و أنواع تانية "نباتي الدهن أو ما شابه"، و لو فرضاً ملقيتوش مكتوب عليها إنها طبيعية ١٠٠٪ ، يبقى اقروا المكونات المكتوبة في الخلف "جيداً".
*ثانياً الجبن غير المُعلَّبة "اللي بنشتريها بالوزن":
-أهم حاجة يكون المصدر اللي بنشتري منه مضمون و نظيف و سمعته كويسة في التخزين و جودة الأغذية اللي بيبيعها عنده.
-خدوا بالكم إن الجبن البيضاء "نباتية الدهن" فيه منها "غير معلّب" في ثلاجات السوبر ماركت و هتلاقوها محطوطة في كيس مطبوع عليه الاسم "زي ......لاند" مثلاً،
و بالتالي متشتروهاش برضه.
-في الغالب الجبن غير المُعلَّبة بتكون حليب صافي بدون زيوت نباتية، و الأفضل نسأل البائع في السوبر ماركت عن اسم أو ماركة الجبن اللي عنده في الثلاجة، و إذا لقيتوها من الأنواع اللي اتفقنا إنها "مُضرَّة" يبقى برضه خدوا بالكم..
و حاجة كمان..فرق السعر بين الجبن نباتي الدهن و بين الجبن الطبيعي هو فرق كبير و واضح.
-و الكلام ينطبق برضه على الجبن الرومي و الشيدر و المواتزاريلا "السايبة اللي بالوزن" لو نوع مش معروف، شوفوا الغلاف الكبير بتاع قالب الجبنة الكبير و اتأكدوا من مكوناته إن مفيهاش "زيوت نباتية".
-الجبن القريش و الجبن السورية "لحد دلوقتي" آمنة
و طبيعية إن شاء الله، بس نشتريها من مكان موثوق منه و نظيف
*عايزة بقى أتكلم في شوية حاجات جانبية كده:
١-بعض الجبن الطبيعية اللي مفيهاش زيوت نباتية بتحتوي على "لبن فرز مجفف" يعني لبن بودر،
طبعاً هو مُضرّ لكن ده مش معناه إننا نشتري الجبن "نباتية الدهن" و نقول ما هو كله مُضِرّ.. كل شيء و له أضراره و الأضرار "لا تتساوى" و اتفقنا قبل كده إن لو قدامك نوعين من الأغذية، أحدهم مُضِرّ جداً و الآخر ضرره أقل، يبقى تختار اللي ضرره أقل
٢-الأصل في صناعة الأجبان إن حمض اللاكتيك الموجود فيها يُعتبر "مادة حافظة طبيعية" ضد الفساد و التعفُّن،
و بالتالي فالمفروض بالمنطق كده إن لو خط الإنتاج و العملية الإنتاجية "ككل" تماا ااام يبقى مالوش داعي نضيف مواد حافظة خارجية لكن الواقع إن بعض المصانع بتضيف مواد زي "سوربات البوتاسيوم" اللي اتكلمنا عنه قبل كده في بوست المواد الحافظة "حفاظاً منها على مدة صلاحية الجبن" و بالتالي فالأفضل بلاش أو اختار المنتجات الأقل في النِسَب المُضافة منه.
٣-البوست هدفه "الأساسي" التوعية بالابتعاد أو التقليل و عدم الاعتماد على الجبن "نباتية الدهن" المُضاف لها زيوت نباتية، أمَّا بالنسبة للبن البودر أو سوربات البوتاسيوم المُضافة فقلة وجودها أفضل،
لكن مش هي "معيار الاختيار" اللي بنتكلم عنه دلوقتي
و لو لقيتوا بدائل مفيهاش اللبن البودرة و سوربات البوتاسيوم يبقى أفضل طبعاً.
٤-أضرار الزيوت النباتية هنعمل لها بوست مُفصَّل يشرحها قريباً إن شاء الله
Comments
Post a Comment
اكتب تعليق حول الموضوع