معلومات تغذوية بيطرية:

   

الناس اللي بتربي فراخ في البيوت مفترض يقدموا أعلاف متزنة لضمان أفضل إنتاجية .. لكن بعضهم بيحاول يأكل بواقي أكل البيت وخاصة مع السلالات المحلية وده بيعرضهم لمشاكل صحية كتير .. فمهم إننا نتعامل مع الأمر على إنه واقع مع مراعاة الآتي :

1- مش معني إنها فراخ أو بط إنها تاكل أي أكل .. لأ لازم ياكلوا أكل نضيف وصحي وخصوصا إننا هناكل الفراخ ومنتجاتها فيما بعد .. و أكبر مشكلة مرتبطة بالأكل هي السموم الفطرية .. ومعظم السموم الفطرية بتفضل في اللحم والدهون وبتنزل في صفار البيض وأحيانا في بياضه .. وأكترها بيأخر النمو وبيقلل الانتاجية .. فهي تدمر صحة الطائر والمستهلك. 

2- مسموح ياكلوا بقايا الخضار والفاكهة الطازجة وليست الفاسدة. 

3- قشور الخضروات والفواكه غلط تتعطى للدواجن ﻷنها بتعمل اضطرابات معوية وأغلبها بيحتوي علي ألياف صعبة الهضم وتعوق أيضا هضم المغذيات الأخرى. 

4- الأغذية الفاسدة أضرارها كتير وبعضها سام .. زي البطاطس الفاسدة و التفاح المعطن (بينتج كحوليات بتعمل دهون ضارة على الكبد).. والبصل الأخضر سام للدواجن حتى لو طازج.

5- الأرز البايت طبعا ممنوع إلا إذا اتحفظ في الفريزر .. وفيه إشاعة بإن الأرز المطبوخ يتغسل علشان يروح الزيت من عليه مع ان الماء لا يذيب الزيوت .. وده كمان بيهيأ فرصة مثالية لنمو الفطريات وسمومها الفطرية ﻷنها بتجمع المية مع الزيت مع النشويات. 

6- لو الفراخ اللي بنربيها منتجة للبيض فيراعي انها تاكل اعلاف متزنة وماتاكلش نشويات كتير لأن الأكل الكتير بيتعارض مع إنتاج البيض. 

7- الأعلاف المتزنة الجاهزة تحافظ علي انتاجية الطائر .. ويراعي أيضا انها تكون منتجة حديثا ومحفوظة في ظروف تخزين منسبة من تهوية جيدة .. وحرارة ورطوبة منخفضتين .. فالمعدة بيت الداء.

  مش لازم نرميلهم الفضلات اعتبروهم ولاد ناس أومال