الفراخ والهرمونات
أجنحة الدجاج والرقبة والكبد هم مركز السموم في الجسم
جارتي قالت لي انها بتروح لبتاع الفراخ تقول له ارمي لي الرقبة والأجنحة والكبدة لان فيهم الضرر كله
انقعوا الفراخ في ماء به خل الروزماري المعروف باكليل الغار او خل التفاح للتخلص من هرمونات الدواجن
شوفوا بقى كلمتين أبرك من مية
اولاً الحقن بيتم في الفرخة تحت جلد الرقبة وفي الاجنحة وده غالبا بيكون التحصين ضد بعض الامراض وفي الشائع الجدري... وبيتم ايضا في عضلة الصدر وعضلة الورك
ثانياً : الفراخ مش بتتحقن هرمونات ولا بتاخد هرمونات من الاساس ، انما تصل لتلك الاوان في خلال 40 يوم نتيجة انها من جدود منتخبة وراثياً لها معدل تمثيل غذائي عالي ، ونتيجة التطور في العلائق واضافات الاعلام المقدمة لها والتي تعطي معدل تحويل عالي يصل بالدجاجة الى هذا الوزن.
ثالثاً : لا الكبد ولا الرقبة ولا الاجنحة هي مركز او مخزن السموم في الجسم ... متبقيات الادوية لها فترة انسحاب من الجسم... والكبد عضو كل وظيفته تكسير بعض المركبات الضارة وتحويلها الى مركبات اقل سمية واقل ضررا على الجسم انما مش بيخزن سموم ولا هو مخزن لتلك السموم
رابعاً : الفراخ بتاخد مضادات حيوية ودي الي ممكن يكون لها متبقيات في جسمها وبالتأكيد لها تأثير على جسم الانسان لو لم تكن تلك المتبقيات تم التخلص منها في جسم الفرخة
طب الناس هتقول لي نعرف مين ان مفيش متبقيات مضادات حيوية في جسم الفرخة ؟
حضراتكم مش هتعرفوا لان ده شغل الطبيب البيطري في المزرعة وده الي بنطالب بيه وزارة الزراعة تفعيل دور الطبيب البيطري في المزارع لذلك لو بتشتروا فراخ من حد موثوق منه اختاروا الفراخ الي بقى لها كذا يوم عنده ، مش اقل من عشر ايام ويفضل اكثر ، مش الي لسه جاية له جديد وده لان الفراخ ساعتها بتكون كأنها تم وضعها في مرحلة نقاهة من الادوية وادينا فرصة لجسمها من التخلص من متبقيات المضادات الحيوية الي فيه ...
أبتدي ألاحظ لفراخ قبل شراءها... هل بها حيوية ، نشيطة ، سريعة الحركة عند محاولة الاسماك بها ، عيونها لامعة غير مغلقة ، لا تتميز بالكسل والرقود في القفص ، ساعتها قلبي يطمئن ان دي علامات تدل على صحة الفرخة وأشتري وأتوكل على الله
غير كده مفيش اي حاجة تانية تضمن لكم خلوها تماما من اي متبقيات
نقطة أخيرة للتوعية. :
احب أضيف ان الفراخ لابد من غسلها جيدا بالماء والخل قبل تفريزها او حفظها بالثلاجة لقتل اي ميكروبات او بكتيريا بها خاصة السالمونيلا ... الفراخ لابد من غسلها قبل حفظها او تركها في الثلاجة. ثم يتم تطهير مكان غسلها ببخاخ به خل مركز لتضمن ربة المنزل عدم انتقال ااسالمونيلا لأي غذاء اخر وعدم تلويث مطبخها..
Comments
Post a Comment
اكتب تعليق حول الموضوع