من بريد الصفحة واش تنصحوني خوتاتي لي درتو مع زوجي يغضب ربي

 واش تنصحوني خوتاتي لي درتو مع زوجي يغضب ربي ولا لا لا راه جاي سيدنا رمضان خايف ميسمحليش ربي 

راجلي اشرى تلفون تاع البصمة و مامخلينيش نخرب فيه نعيا كيفاش ندير نفتحو و مانقدرش و هو قاري الآمان و حاطو قدامي و يغزل فيا عارف ومتأكد بلي مانقدرش نقرعج عليه انا تخمام قتلني بسكو كنت حاسة بلي راه داير علاقة وماعندي حتى دليل يأكدلي مع العلم راجلي ماعندو لا فايسبوك لا والو هو يخدم غير الفايبر برك و داير فيه رايو

وحد المرة قتلو اعطيني نحكي مع امي من عندك انا ماعنديش رصيد اعطاني عشرين الف و قالي روحي اشري bon وافليكسي قتلني بالبارد لبست قشي و هبطت فليكسيت و شريت بيس جديدة و جزت على الفارمسيان قتلو اعطي دواء قاوي تاع رڨاد وفعال اعطاني كاشيات طلعت للدار وجدتلو القهوة تاع العشية و حطيتلو فيها زوج حبات كاشي شرب قهوتو وانصرع 

كي تأكدت بلي راه متغاشي جبت تلفونو و فتحتو بصباعو ودخلت مالقيت عندو والو آپار كلمات الحب والغزل مع وحد الأفعى تم تم بعتثلو ميساج حبي وينك رديت عليها انا هاني عمري قاتلي راك فالدار؟ رديت قتلها وي حبي شوفي المرا راهي فاقت بيا و بدلت رقمي على جالك امحي هذا و هاكي نيميرو الجديد (اعطيتها نيميرو تاعي اللي شريتو جديد) قاتلي سيبون حبي بالسلامة دك نسيبريمي هذا و نآجوتيك بلاخر 

انا تاني سوبريميت رقمها و اجوتيت عندو نيميرو تاعي الجديد و كتبتو عند نفس الاسم اللي كاتبو (أحمد ميكانيسيان) و درتلو ميزاجور للفايبر و مسحت آثار الجريمة و رجعتلو تلفونو لبلاصتو و رقدت وانا قلبي خارج قلت ندير الكوراج ولازم مانبينلوش و نكبر قلبي

صباح ناض راجلي راسو يوجع فيه سور مالكاشي تاع رقاد شرب قهوتو و راح يخدم و بديت أنا دخلت لبلاصتي و نحكي معاه على اساس أحمد صاحبو و نحكي معاها هي تاني نحكو نحكو ومن بعد قتلها عمري حاب نصارحك و مانيش حاب تبعدي عليا و توقفي معايا قتلها راه فيا السيدا و راني قريب نبدا نعالج و كي نريح نخطبها بدات تتلكك و تقول علاه منين جاتك السيدا قتلها كنت مخلطها مع النسا و ماعرفتش شكون اللي عداتني قاتلي تفوووو ياوجه البخص و بلوكاتني  

اروحو درك نحكيلكم على المسود قاعدين نحكو و يتغزل فيا وجه المقلة و انا الغمة حاكمتني .جا للدار عادي و مع المغرب انا دخلت للكوزينة نوجد العشا بعثلي على اساس انا احمد صاحبو قالي عمري شاراكي ديري صورتلو الپلا فيه صلاد دو فروي و قتلو دك نقول للقرين تاعي يبعثولك ضحك و شوية خليتو دخل للتواليت و حطيتلو الطبسي فوق لاكوافيز و خرجت 

خرج هو من تواليت كي دخل للشومبرا شاف الطبسي اقفز سملهرحمانرحيم وانا نشوف فيه من بعيد جبد تلفونه يشوف فالفوطو و يشوف مع الطبسي نفسو السيد زراق وخضار و صفار يقول يالطيف يالطيف وانا دخلت موراه للبيت قالي ارفدي طبسي مناكلش وانا نقولو واش من طبسي وهو   لراه فوق لاكوافاز ههههه وانا   مكان حتى طبسي بركا من لعب هادا .  عييت نبعثلو فالفايبر عندو سيمانة مايردش كل يوم رافد المصحف و شاعل سورة البقرة فالدار 

باش يعرف بلي النسا كيدهن عظيم