الورم الليفي أو كيم نسميوه احنا الفيبروم

  

المرة الي فاتت حكينا على الرحم مرة هادي نحكيو على مرض شائع لدى النساء يصيب الرحم بالتحديد و هو  الورم الليفي أو كيم نسميوه احنا  الفيبروم 

  اولا واش هو الفيبروم ؟ 

الفيبروم هو ورم حميد يصيب عظلة الرحم 

كيم لازم تعرفوا  جدار الرحم يتكون من ثلاث طبقات 

*بطانية الرحم الي تتجدد في كل دورة شهرية 

*عضلة الرحم الي تتمدد و تتوسع باه تهز الجنين و هي نفسها مسؤولة عن الآلام  لحظة الولادة كيم تتقلص باه يخرج المولود  

*و طبقة أخرى خارجية

....خلايا عظلة الرحم في شروط معينة يولييو يتكاثرو بطريقة غير منتظمة و يشكلو فيبروم

......السؤال الثاني الي يجي في  بالنا علاه يدير لفيبروم واش هي الأسباب ؟ 

لحد الان ماعرفوش واش هي الأسباب الحقيقة بصح لقاو بلي النساء الي عندهم ارتفاع ف نسبة استروجين   و انفخاض ف نسبة البروجسترون هوما أكثر عرضة انو يتكون عندهم فيبروم .

.و السؤال الأهم  واش هوما الأعراض الي ممكن يسببهم الفيروم و يخلي المرأة لازم تروح لطبيب للتشخيص ؟ 

الحاجة إلي تفرح انو الفيروم في معظم الحالات يكون ماعندوش اعراض يعني المرأة يكون عندها فيبروم ك تروح تتقلب لسبب آخر تكتشف انو عندها و في الحالة هادي مالازمش تقلق لانو ما يشكل حتى خطورة و ما يتطلبش علاج . 

.نروحو درك للاعراض الي ممكن يسببها :.

1_ اختلالات في الدورة الشهرية ممكن تزيد المدة تاعها فوق ثمانية أيام أو  ممكن تزيد فكمية و ممكن يسيل دم خارج ايام الدورة 

و هذا راجع ل ارتفاع نسبة الاوستروجين مش لانو الفيبروم  هو الي ينزف 

2_ آلام في منطقة الحوض 

3_ارتفاع وتيرة التبول أو صعوبة ف تبول  لانو الرحم جاي قدام المثانة فيمارس عليها ضغط 

4_فقر الدم بسبب الدم الي تفقدو المرأة 

..... السؤال الي يتررد على معظم النساء المصابات هو: 

هل الفيبروم فعلا يكون سبب ف عقم ؟؟

الاجابة هي ..لا الفيبروم ما يسببش العقم غير في حالات قليلة الي يستدعي فيها ازلته بعملية جراحية و يصرا الحمل عادي 

...الفيبروم في حالات معيبة فقط  يقدر يمنع تعشش البويضة الملقحة ف الرحم

.السؤال الأهم هل هناك علاج للفيبروم ؟ و هل بالعلاج سيختفي تماما ؟ 

الجواب هو العلاج الجراحي هو الي يعالج لفيبروم من جذوره ب إزالته 

أما الادوية الطبية ف تقوم بتقليل النزيف فقط و لا تؤثر على حجم الفيبروم 

يتلخص العلاج في إعطاء المريضة هرمونات البروجسترون