إزاي نعرف نوع الأنيميا من قراءة تحليل صورة الدم ؟

أول ما نمسك التقرير نروح مباشرة على الهيموجلوبين وعدد RBCs لو لقينا حاجة من الاتنين منخفضة عن الطبيعي يبقى نقول ان في أنيميا . لأن الأنيميا هي انخفاض قيمة الهيموجلوبين أو عدد كرات الدم الحمراء.

طيب عرفنا إن في أنيميا، إزاي بقى نحدد نوعها ؟

نروم ح على MCV ونشوف هي طبيعية ولا أقل من الطبيعي ولا أكبر من الطبيعي ؟

أولا : لو MCV أقل من الطبيعي :

ـــــــــــــــــــــــــــــــــــــــــــــــــ

تبقى كرات الدم في الحالة دي microcytic وغالبا بتبقى microcytic hypochromic .

ودي هتبقى حاجة من اتنين ، يا إما Iron Deficiency Anaemia يا إما Thalassemia .

طيب نفرق بينهم ازاي ؟

نبص على RDW اللي هو اختصار Red Cell Distribution Width وده مقياس لمعدل الاختلاف بين حجم الخلايا الحمراء لنفس الحالة. بمعنى انه لما يزيد يبقى الاختلاف في شكل وحجم الخلايا كبير، ولما يقل يبقى الخلايا متشابهة.

في حالات الـ Thalassemia تكون الخلايا متشابهة جدا أي يقل فيها RDW لأنها نفس الحجم .

بينما في حالة أنيميا نقص الحديد بتكون فيها الخلايا غير متشابهة ومختلفة الشكل والحجم anisopoikilocytosis وبالتالي يرتفع فيها RDW .

يعني م الآخر ، لما تلاقي MCV قليل تبقى microcytic hypochromic . ودي هتبقى حاجة من اتنين ، يا إما Iron Deficiency Anaemia يا إما Thalassemia . تبص على RDW : لقيته قليل تبقى Thalassemia ، لقيته عالي تبقى نقص حديد .

ولو شكينا إنها Thalassemia يبقى نعمل hemoglobin electrophoresis للتأكيد .

ـــــــــــــــــــــ

ثانيا : لو MCV أعلى من الطبيعي :

ـــــــــــــــــــــــــــــــــــــــــــــــــــ

تبقى كرات الدم في الحالة دي macrocytic .

ودي تبقى حاجة من تلاتة hemorrhagic anemia أو Megaloblastic anaemia أو Hemolytic Anemia .

طيب نفرق بينهم ازاي ؟

لو hemorrhagic هيبقى في شكوى من النزف وهيبقى في أعراض النزيف . كمان الحديد يفقد خارج الجسم لأنه بيخرج في الخلايا ، وبالتالي يبقى الحديد قليل لو هنقيسه .

طيب كده لسه عندنا احتمالين : Megaloblastic anaemia أو Hemolytic Anemia .

نعمل ايه ؟

احنا عارفين إن Reticulocytes بتبقى طبيعية في حالة Megaloblastic ، وترتفع في حالة Hemolytic .

يبقى نعمل Reticulocytes ، لو طلعت طبيعية تبقى Megaloblastic .

ولو طلعت عالية يبقى Hemolytic .

ولو عايزين نعرف هي هيموليتيك acute or chronic يبقى نعمل الصفراء لو عالية تبقى acute ولو طبيعية تبقى chronic .

ــــــــــــــــــــ

ثالثا: لو MCV طبيعي مع وجود أنيميا ( الهيموجلوبين أو العد الأحمر منخفضين) :

ــــــــــــــــــــــــــــــــــــــــــــــــــــــــــــــــــــــــــــــــــــ

تبقى كرات الدم في الحالة دي normocytic .

ودي تبقى aplastic anemia أو Hemolytic Anemia أو تحديدا هيموليتيك بسبب Hypersplenism .

طيب هنحددها بالضبط ازاي ؟

هنشوف الخلايا البيضاء والصفائح :

لو طلعوا طبيعين تبقى حالة Hemolytic Anemia ، وهنتأكد كمان بإن الخلايا الشبكية تبقى عالية.

طيب لو الخلايا البيضاء والصفائح طلعوا منخفضين يعني المريض عنده panecytopenia يبقى ايه الوضع ؟

ما دام في panecytopenia يبقى سببها حاجة من اتنين : انخفاض في انتاج خلايا الدم يعني aplastic anemia أو تنتج طبيعي بس في زيادة في تكسير الخلايا بسبب الطحال يعني Hypersplenism .

طيب نفرقهم ازاي ؟

بالخلايا الشبكية :

لو aplastic anemia هيبقى مفيش خلايا شبكية خالص أو هتبقى قليلة جدا

لو Hypersplenism هتبقى الخلايا الشبكية عالية لأن دي أصلا نوع من الهيموليتيك أنيميا .

ـــــــــــــــــ

انتهى مختصرا قدر الإمكان

كتبه

د. محمود سعد

بحر

20 January 2019

ع

17:23

علم التحاليل المخبرية