بناء على طلب الجماهير حنتكلم النهاردة ان شاء الله عن موضوع مهم جدا يمكن ميكونش موجود بكثافة كبيرة في مجتمعاتنا الشرقية المصرية اللي بتلاقي نفسها وسعادتها في الأكل واللمة حوالين الأكل ولما اتغيرنا وبقينا رايحين ناحية الغرب مخدناش منه الا برضو الوجبات السريعة والقعدة قدام التلفزيون واللاب توب...

بس يادكتورة حنان... كفاية نصايح ودروس ماتمسكيلناش العصاية...

حااااااضر... مش حاعمل كده أبدا أبدا وعشان اثبت لكوا ده حاتكلم على النحافة مش على السمنة..

صحيح النحافة مش منتشرة انتشار السمنة لكنها موجودة وبتبقى مشكلة كبيرة جدا لصحابها خصوصا المراهقين والمراهقات والستات... لأنها بتشتغل على حاجتين .. على ثقة صاحبها بنفسه مابيبقاش حاسس انه ملو هدومه ( مع انه اكيد كده معنويا حتى) والنقطة التانية بتتعبه فعلا .. مبيبقاش عنده طاقة ومناعته احيانا بتتأثر وفي بقى تعبير أجنبي باموت فيه تلاقيه دلوقتي في كل الأبحاث العلمية اللي بتتكلم عن الصحة والتغذية اسمه الـ (Quality of life) أو نوعية الخياة.. أسلوبها... عايش زي البني آدمين اللي حواليك واللا مشكلتك الصحية منغصة عليك عيشتك ومش مخلياك حاسس انك زيك زي غيرك...؟

الحقيقة ان جزء كبير م الناس اللي بتعاني م النحافة نوعيات حياتها بتبقى مش ظريفة قوي.. فإنك كشاب ميبقاش فيك نفس تحري عشر دقايق على بعض وانك كبنت شابة تبقى مش قادرة تنزلي تشتري حاجتك او توضبي اوضتك ولو عملتي كده تبقى مجهدة وترقدي تلات سنين عشان مفيش روح فدي مشكلة... طيب ده ممكن يكون أسبابه  ايه؟

بصوا.. في الطب مفيش غالبا سبب وحيد كده لحالة.. لكن في سبب رئيس.. مسيطر.. جه وجاب أسباب صغيرة معاه...منها ان يكون طبيعة جسم ااولد او البنت اصلا كده جينات عيلته عاملة كده فعشان كده مهم انك وانت بتشتكي تبص للناس اللي حواليك.. شبهك واللا انت بس اللي كده؟

لو شبهك يبقى انت اصلا جاي بكتالوجك.. بس استنى ثانية.. انت ممكن ان شاء الله تغير ده وتعدله لما تعرف تعمل ايه ىتتحرك ازاي وحاجات كتير..

ثانيا: انت مبتاكلش يابني... انتى مبتاكليش يابنتي

فكروا انتوا الموضوع ده جديد واللا انت طول عمرك كده والموضوع زاد مع نمو البلوغ وبقى أوضح؟

ثالثا: ممكن يكون عندك مرض مزمن وراثي او غير وراثي وبتاخد ادوية وبتدخل مستشفيات وتروح لدكاترة كتير

رابعا ممكن يكون عندك اسهال مزمن اوترجيع ( زي المرضى بتوع البوليميا اللي بيرجعوا عن عمد من كتر رعبهم من التخن.. او ناس عندها حاجة تشبه الوسواس كده انها تخينة .. وتبقى رفع البوصة وتبص في المراية نشوف نفسها فيل فماتاكلش وتلعب رياضه عنيفة جدا عشان تفضل تخس..

خامسا ممكن يكون الحرق عندك عاااالي جدا بسبب او بدون سبب.. سبب زي ايه يعني؟ .. زي في ناس عندها الغدة الدرقية بتفرز هرمون كتير وهرمونها ده بيزود الشغل في الجسم كله زي ضربات القلب والعصبية والارتعاش الخفيف المستمر.. فكل ده يستهلك طاقة فيعلي الحرق..

طيب نعمل ايه..

نروح للدكتور..

عشان غالبا الدكتور حيعمل لنا شوية حاجات حلوة كده مع الكشف زي تحليل هرمونات الغدة الدرقية وصورة دم كاملة وتخليل براز كامل وحيطلب تحليل البكتيريا الحلزونية .. وممكن كمان وظليف كبد وكلى ساعات.. ولو شك في امراض مناعية حيكمل في السكة دي..

ونبتدي ناكل بطريقة صحية... يعني ياناس ياهو.. مش حدف كميات كبيرة م الأكل بطريقة مفاجئة كده هو الحل..لانه كل سنة وانتوا طيبين فالبا مش حينفع والولد او البنت حيقوفوا اكتر م الاكل...لكن المفروض برضو يبقى في خطة غذائية فيها كل انواع الغذاء وخنهتم فيها بالنشويات المعقدة زي العيش والتوست اكتر.. وحنختار فيها الدهون الافيد ونبديها على غيرها مش نلغي غيرها..حنتعلم يبقى اكل الشخص اللي لسه جاي يتعالج عبارة عن وجبات صغيرة كتير.. ممكن نوصل لعشر وجبات او اكتر.. ومش حنغصبه ع الاكل.. لا.. احنا حندور ع اللي هو بيحبه ونوزعه على مدى اليوم..ومش لازم ياخد مرة واحدة كل السعرات اللي مفروض ياخدها.. يعني  ممكن جدا نبدأ بالتدريج.. يعني لو هو او هي بتاكل ٨٠٠ سعر... ايواااا ماتتخضوش.. في ناس دي طاقتهم... حافرح قوي لو وصلت بيه اول عشرة او خمستاشر يوم ل ١٢٠٠.. وبعدين ابتدي اضيف له وجبات  او زي مابتقولوا كده سناكس اضافية لطيفة وتتحب ... ممكن يعمل كوب لبن كامل الدسم ويحط عليه موز وعسل ويزوده معلقة او اتنين لبن بودرة ويضربهم في بعض ويخطهم في الفريزر شوية وياكلها.. ممكن طبق صغير مهلبية.. أو كشك ( نشويات وبروتينات ولبن)ياكله بالمعلقة .. ممكن سلطة فواكه بزبادي محلى بعسل.. يبقى برضو بين الوجبات.. ممكن سلطة بنجر.. أو آيس كريم.. ممكن طبق صغير فول مضروب في الخللط أو بصارة.. بس للناس اللي معندهاش مشاكل قولونية.. لازم يتعلم ياكل وجباته ازاي.. يعني ماتبتديش بالمية ولا بالسلطة.. ولا تكون واخد السناك بتاعتك قبل  الوجبة اللي وراه على طول.. قلل م الكافيين لانه بيزود الحرق.. ابعد عن المشاكل النفسية او القلق.. مفيش مانع تزور طبيب نفسي..

طيب ممكن ايه كمان؟

لما بنلاقي انه الدنيا برضو مش حلوة قوي او لاي سبب مش قادر البنت او الولد يحضروا الوجبات الصغيرة دي وبيكسلوادساعات بنلجأ للمكملات الغذائية ودي في منها أنواع بتناسب الشخص العادي واللي عنده انراض مزمنة وبتبقى ساعات كمان بنكهات مختلفة..

ممكن ندي فيتامينات كمان لانه غالبا بيبقى في نقص فيتامينات او املاح.. ونتابع.. 

طيب في فواتح شهية

معظمها ان لم يكن كلها بيبقى من مضادات الحساسية اللي لها ساعات تأثير ع الجهاز العصبي فإذا اديناها بنديها بحرص شديد ومتابعة

في حاجات طبيعية زي حبوب الحلبة مثلا ومايشبه.. بس طبعا مفعولها مش أكيد لان الدراسات العلمية الموسعة عليها مبتبقاش كافية وبتعتمد ع ااخبرات اكتر.. ونضيف لكده انه للاسف ال FDA غالبا مبتبقاش لها سيطرة كبيرة على المكملات الغذائية فبالتالي منقدرش نحلف على مكوناتها.. ونخلي بالنا من قصة علاجات الاعشاب لان العشب في الاخر ماهو الا دواء له آثار جانبية ممكن تحوله لسموم.. فعلى ايه... خلينا نحاول في المضمون الاول وبعدين وبنا يسهل

ماننساش نقول انه لو ثبت ان في اي مشكلة مصاحبة للنحافة زي الغدة الدرقية مثلا او البوليميا  ووسواس عدم الاكل بتاع ال anorexia nervosa ودول حيشرحهم لك دكتور التغذية بتاعك يبقى لازم يشترك في العلاج دكتور مختص بالغدة او دكتور نفسية وعصبية ويبقى على تواصل مع دكتور التغذية بتاعك عشان يتففوا عليك... ويوصلوك للي تحبه بإذن الله..