ج: وعليكم السلام ورحمة الله وبركاته. خيراً.
س: بص يا دكتور انا لفيت على 5 دكاترة جهاز هضمي ومفيش فايدة.
ج:طيب خير ايه المشكلة؟
س: بطني تعباني جداً ومش مستريح في اي اكل حتى الميه بتتعبني.
ج: وايه تاني؟
س: حاسس دايماً بانتفاخ وشعور بالامتلاء وفم المعدة بيوجعني والم في الجنب الشمال وخاصة بعد الاكل. وامساك كمان.
ج: طيب الاعراض دي بتزيد بايه بالظبط؟ هل الاكل ولا النرفزه؟ ولا موجوده من غير اي حاجة؟
س: ممكن كل ده لدرجة حتى لو جعان برضو مش مستريح.
ج: ايه اللي بيخفف الاعراض دي؟
س: احيانا لما اعمل حمام تقيل او اكون جعان.
ج: طيب وزنك بيخس ولا حاجة؟
س: لا خالص.
ج: في دم من فتحة الشرج او سخونية؟
س: لا خالص.
ج: بتاخد اي ادوية مسكنة؟
س: احياناً.
ج: بتاكل اكل خارج البيت.
س: طبعاً.
ج: حالتك النفسية وظروفك الاجتماعية اخبارهم ايه؟
س: والله الحمد لله على كل حال. بس يعني فيه شوية مشاكل في الشغل والبيت يعني ظروف الحياة بقى.
ج: بتاكل وتنام على طول؟
س: ممكن برجع من الشغل اكل وانام فعلا.
ج: اطمن دي في الاغلب اعراض متلازمة القولون العصبي.
س: طيب ما كل الاطباء بيقولوا كده وايه الجديد يعني؟!
ج: اقولك انا ايه الجديد. بص يا سيدي. القولون العصبي ده مرض يصيب حوالي 3/4 سكان العالم. ولكن هو مرض وظيفي وليس عضوي. بمعنى. انه عبارة عن خلل وظيفي في حركية الجهاز الهضمي واعصابه. مرتبط بطبيعة الاكل والحالة النفسية عند المريض. فيسبب اضطراب في حركة القولون اما بالزيادة فيعمل اسهال او بالنقص فيعمل امساك. ويعمل عسر هضم والم بالبطن وشعور بعدم الراحة بعد الاكل. بس اطمن هو مش مرض عضوي. طالما مفيش نزيف او دم من فتحة الشرج او نقصان وزن ملحوظ. وهتلاقي كل التحاليل والاشعات بتعتك كويسه.
س: طيب ايه الحل انا تعبت؟
ج: اولا لازم تعرف ان لازم تغير من نمط و اُسلوب أكلك مع الالتزام بالأدوية.
س: يعني اعمل ايه؟
ج: أولا: لازم حاجتين يظبطوا الحالة النفسية وطبيعة الاكل. بمعنى تغيير نمط الحياة. تبعد عن اي طغوط نفسية وعصبية. وتسلم الامر لله وتعلم ان كل شئ بقدر. وليس كل ما يتمناه المرء يدركه. والعجلة هتدور بيك او من غيرك المهم تستمتع بالموجود. ولا تفكر في المفقود فتفقد الموجود.
ثانياً: تعايش مع الموضوع. ومتفكرش فيه. لأن الشيطان مش هيسيبك وهدفه احزانك وتفكر انك عندك حاجة وحشة والدكاترة مش عارفينها.
ثالثا: القولون العصبي ملوش دوا معين كلها ادوية بتحاول تحور في حركية الجهاز الهضمي وتريح القولون.
اهم من العلاج تعديل العادات الغذائية من الابتعاد تماما عن الأكلات الدسمة و كثيرة الدهون و الحراق.
الإكثار من الأكل المسلوق و المشوي.
الإكثار من الفاكهة.
عدم الاكل حتي الشبع و الامتلاء.
الاكل في طريقة آكلات صغيرة متتالية.
عدم الاكل و النوم.
Comments
Post a Comment
اكتب تعليق حول الموضوع