المرض النفسي
س\ هل كون المرض "نفسي" مش "عضوي" يعني إنه مالهوش سبب مادي في الجسم؟
ج\ خطأ، المرض النفسي تتسبب فيه أو تصاحبه تغيرات دقيقة جداً في المخ، تعبر هذه التغيرات عن نفسها في أفكار الشخص، و إدراكه لبيئته الداخلية و الخارجية، و مشاعره، و سلوكه.
س\ هل فيه تحاليل معملية بسيطة مرتبطة ارتباط مباشر بالمرض النفسي؟
ج\ عادة لأ. لأن زي ما قلنا التغيرات المادية المرتبطة بالمرض النفسي بتبقى دقيقة جداً. التحاليل اللي بتتطلب بيبقى ليها أهداف تانية زي استثناء أمراض أخرى أو متابعة تأثير الدواء.
س\ طب طالما مافيش تحليل أعمله يقول أنا عندي فصام ولا تحليل يقول أنا عندي وسواس قهري و هكذا، منين بتقول إن المرض النفسي شيء مادي و ملموس؟
ج\ لأن فيه طرق تانية للفحص بتتعمل لأغراض بحثية و بتمويل ضخم شافت و أثبتت و فسرت العديد من التغيرات البيولوجية المصاحبة للأمراض النفسية.
س\ أنا مابقيتش فاهم .. مش انتوا إسمكوا دكاترة نفسيين؟ مش النفس دي حاجة غير مادية؟
ج\ لا يا سيد الناس، النفس اللي نقصدها و بنشتغل عليها مادية جداً، و المخ هو موطنها. الشخصية و السلوك و التفكير و الوعي و الإدراك و معظم ما يعني النفس في مفهومك له دوائر عصبية معقدة في المخ و مُركّبات كيميائية تقوم بوظائف دقيقة. هذا لا يعني أننا ننفي الشق الغيبي، بل يعني أنه مش مجال شغلنا. و احنا كدكاترة ممكن يكون لكل منا إيمانه الغيبي، لكن ده لا يتدخل في شغلنا.
س\ بتعالجوا بقى الأمراض دي إزاي يا دكتور؟
ج\ الشقين الرئيسيين للعلاج هما الأدوية و العلاج النفسي. و الاتنين ليهم تأثير "مادي" على الدوائر العصبية و النواقل الكيميائية في المخ، و بيظهر في شكل تغير في الأفكار و المشاعر و السلوك. طبعاً مش كل الناس بتحتاج أدوية، و مش كل الناس بيتمارس عليهم نفس العلاج النفسي. الحاجات دي ممنهجة و متخصصة حسب الاحتياج، مش فضفضة و طبطبة و بس.
س\ بس دي رفاهية بصراحة إن واحد يروح يتعالج نفسياً، مش كده ولا إيه؟
ج\ ده لأنك مش عارف إيه هي الأمراض النفسية، و فاكرها شوية خنقة و ضيقة و فراغ أو أيا كانت رؤيتك. تعبير "الأمراض النفسية" ينطبق على ناس كتير جداً حواليك انت فاكرهم مش تبعنا. زي مثلا جارك اللي انت بتقول عليه "معوق" و هو في الحقيقة عنده فصام و ممكن يتحسن جامد بالأدوية. و زي إبن صاحبك اللي بتقول عليه برضه معوق و هو عنده توحد. و زي ابن أخوك اللي بتقول عليه مش متربي و هو عنده فرط حركة. و زي صاحبك اللي بتقول إن لابسه جن سفلي و هو عنده اضطراب ثنائي القطبين. و زي صاحبك اللي بتقول عليه ضعيف الإيمان عشان حاول الانتحار و هو مريض اكتئاب. و زي زميلتك اللي بتقول عليها مش محترمة و مدمنة علاقات جنسية و هي شخصية حدية. و غيرهم كتير جداً، الأمراض النفسية كتيرة جداً.
س\ ياااه .. و على كده بقى الحاجات دي بتتحسن؟
ج\ آه بتتحسن. و كل ما يكون التدخل العلاجي أسرع كل ما يكون أفضل من إهمال الشخص مدة طويلة لحد ما مرضه يتفاقم و تحصل مضاعفات.
س\ يعني هي الأدوية مالهاش مضاعفات يا دكتور؟
ج\ مساويء الدواء لا تقارن بمساويء المرض.
Comments
Post a Comment
اكتب تعليق حول الموضوع