أكثر حاجة بتسأل عنها وعن أعراضها وعلاجها هى القولون العصبي وهل فيه علاج فعال للقولون العصبي ده ؟؟
قبل ما نتكلم عن أعراض تلقولون العصبي خلينا الأول نعرف ايه هو القولون ونعرف معنى القولون العصبي
القولون ده جزء من الجهاز الهضمي أو القناة الهضمية بيبدأ بعد نهاية الأمعاء الدقيقة و بنقول عليه الأمعاء الغليظة
إنما القولون العصبي ده مرض وظيفى نتيجه اضطراب حركة القولون لما بيحصل فيه تقلصات أو مغص وغالبا بتكون مصحوبة بوجود غازات أو انتفاخ في البطن والأعراض دي بتزيد وبتكون أصعب في حالة التعصب أو التعرض لضغوط نفسية وعصبية .. وبيسبب عدم الراحة والإجهاد لكنه لا يسبب ضرراً دائما بالأمعاء أو أي أمراض خطيرة زى الأورام
طيب ايه الأعراض بتاع القولون العصبي ؟؟
فيه ٦ أعراض مشهورين بيبينوا إن الحالة بتعاني من القولون العصبي
ألم ومغص وتقلصات في البطن بتروح لما بنعمل حمام
البطن بتطلع أصوات(تحس إنه مستودع أنابيب بوتاجاز)
انتفاخ و غازات.
امساك في الغالب او إسهال بعد الطعام.
القلق و الاكتئاب و التوتر.
الشعور بعدم استكمال الاخراج بعد الذهاب للحمام
لو عندك اى حاجة من الأعراض دي يبقى لازم تروح لدكتور باطني عشان يوصفلك حاجة مناسبة ليك ولحالتك
فيه شوية نصائح لو مشينا عليهم هنسيطر على أعراض القولون العصبي وهى كالتالى
تجنب التوتر والقلق وعدم الخوض في المشاكل اليومية خاصة أثناء تناول الوجبات ..
الابتعاد عن مهيجات القولون والأكلات صعبة الهضم أو المثيرة للقولون زى الدسم والأكل الحراق وبعض الخضروات زى الخس والفجل والجرجير والثوم والبصل والبقوليات والخبز الأبيض والكرنب والقرنبيط والألبان الدسمة .. ونقلل من المنبهات زى الشاي والقهوة والمثلجات والمياه الغازية .. و الامتناع تماما عن التدخين بكل أنواعه
ممارسة الرياضة ودى بتقلل التوتر العصبي ومنع الاكتئاب النفسي وتضبط إيقاع القولون (المشي لمدة نصف ساعة أو عمل تمارين للبطن والظهر مما يساعد على إخراج الغازات من جسمك)
الوصية الذهبية اوعى تكتم - أو تكتمي الحمام في أي وقت مهما كانت الظروف ... ولو فيه طفيليات أو ديدان أو بلهارسيا لازم تتعالج فورا
مينفعش ندبها جامد ... ونأكل وجبات كتير بكميات قليلة ونكتر من الاكلات الغنية بالألياف الطبيعية زى الخضروات والفواكه والخبز اللى فيه ردة ونمضغ الاكل كويس ومحدش بيجرى وراك والشرب بيكون العكس يعنى نشرب مياه كتير
في حالة ظهور دم فى البراز -نقص الوزن- الم شديد فى البطن- انيميا يبقى على الدكتور فوراااااااا .. وبلاش الملينات كتير لأنها بتصيب جدار القولون بالإلتهاب المزمن وكمان بتفقد فاعليتها بالتدرج
فيه اعشاب ومشروبات طبيعيه بتحسن من اعراض القولون العصبى زى الزنجبيل .الزعتر.الينسون .الشمر.البابونج
هل فيه أدوية فعالة للقولون العصبي؟؟
فيه أدوية بتتوصف لحالات القولون العصبي وهي فعالة جدا في المغص والتقلصات وحالات الانتفاخ والغازات كمان زي
- كولوفيرين أو كولوفيرين D
- دوسباتالين
- كولوفاتيل
- كولونا
- كولوسبازمين فورت
- ليبراكس (خلى بالك لأنه فى تحليل المخدرات بيعطي نتيجة إيجابية)
- سبازكولون أو سبازموديجستين أو سبازموامريز أو سبازموبيرالجين
- بترو
- اوكاربون اقراص الفحم
الادوية دي بتهدي المغص والتقلصات وكمان بتعالج الانتفاخ والغازات ومنها اللي بيحسن عملية الهضم كمان ...
بس خلى بالك-
قبل ما نستخدم أي دواء منها نرجع للطبيب عشان ينصحك بأنسب حاجة لحالتك
Comments
Post a Comment
اكتب تعليق حول الموضوع