إذا تم تشخيص الإكتئاب ايه هو العلاج؟؟

علاج الإكتئاب بيمشي في اتجاهين:

 أولا: العلاج النفسي السلوكي ومحاولة دمج المريض مع المجتمع وتنمية العلاقات الإجتماعية.

  ثانيا :العلاج الدوائي.

بشكل مبسط عايزين نقول أن السبب الرئيسي للإكتئاب غير واضح تماما.لكن حاليا كل الأدلة بتشير إلى حدوث اختلال في بعض النواقل العصبية الموجودة في الجهاز العصبي المركزي

زي السيريتونين – نورابينيفرين – دوبامين 

وعشان كدة كل ادوية الاكتئاب المتوفرة بتعمل على استعادة النواقل العصبية دي وزيادة تركيزها في المخ.

اهم النواقل دي هو السيروتونين ( (Serotonin واحيانا يسمى هرمون السعادة, السيروتونين مسؤول بشكل كبير عن الحالة المزاجية عند الإنسان ووجوده بيزود الشعور بالسعادة.

وعشان كدة حنتكلم شوية عن النوع ده من مضادات الإكتئاب Selective Serotonin Reuptake Inhibitors (SSRIs أو مثبطات استعادة السيروتونين الإنتقائية.

المجموعة دي بتتكون من 8 أعضاء هم 

Fluoxetine -Sertraline- Paroxetine- Fluvoxamine- Citalopram- Escitalopram- vilazodone- Vortioxetine

أعضاء المجموعة دي ليهم نفس الفاعلية ,لكن ممكن يكون في فروقات بسيطة في الأعراض الجانبية,وممكن المريض يستجيب لواحد منهم بشكل أفضل من الآخر.

و السبب الرئيسي للأعراض الجانبية في المجموعة دي هو أن زيادة نسبة السيروتونين بشكل عام بتؤدي إلى تنشيط مستقبلات السيروتونين الفرعية المنتشرة في الجسم.

ومن أهم الأعراض الجانبية للمجموعة :

الأرق- اضطراب الجهاز الهضمي - القلق والتوتر-الصداع - الضعف الجنسي .

وللتغلب على مشكلة الضعف الجنسي المصاحبة لمجموعة SSRI  عندنا أكتر من طريقة:

1-اضافة دواء ( bupropion) للعلاج.

2-نقلل الجرعة.

3-اضافة دواء زي السلدينافيل (فياجرا)

4-وممكن كمان نستبدل الدواء بآخر من مجموعة تانية.

وطبعا زي ما قلنا قبل كده بما أن المجموعة دي بتزود نسبة السيروتونين لازم نكون حذرين تماما مع بعض الأدوية الأخرى الي بتزود السيروتونين .وهنا لابد من استشارة الصيدلي منعا لحدوث ما يعرف بال  serotonin syndrome)

  وفي نهاية العلاج وتمام الشفاء (بحمد الله) لازم يتم سحب الدواء بالتدريج منعا لحدوث أعراض الانسحاب في مدة من 2-4 أسابيع.

 

موضوع الإكتئاب كبير ومتشعب وفي أكتر من مجموعة دوائية لعلاج الاكتئاب. 

لكن اهم حاجة لازم نعرفها أن مش كل شعور بالضيق والحزن من ضغوطات الحياة ممكن نعتبره اكتئاب. والحالات دي ممكن نتغلب عليها بمحاولة الاندماج في المجتمع  والبعد عن الافكار السلبية, وممارسة  الرياضة, وتناول بعض الأطعمة الي بتساعد على تحسين الحالة المزاجية مثل الشيكولاتة والاطعمة الغنية بالكاربوهيدرات والأسماك الغنية بالاوميجا 3.