FMF بين الحقيقة والخيال
بين الاخطاء من المرضي وغيرهم والتي قد تودي بحياتهم
ناس موقفه العلاج من دماغها
ناس بتاخد جرعات غلط
ناس بتاخد كولشسين منتهي الصلاحيه
ناس بتاخد انواع مش كويسه اوي حسب تصنيعها
ناس مش متابعه الكلي بتحاليل وبقالها سنين بتاخد وخلاص
٥. حالات بالعياده في اقل من شهور معدوده وللاسف ناس كبيره واطفال موقفين الكولشيسن وبياخدو وقت التعب بس
ودا الخطر للاسف دا كفيل يضيع الكليتين او المفاصل
وانا شفت حاله كانت بتغير مفصل عشان عدم الالتزام بالعلاج
ولذلك هنتكلم عنه باستفاضه للجميع
هو مرض چيني وراثي منتشر بين شعوب منطقة البحر الأبيض المتوسط ومنهم العرب والأتراك
بيحصل فيه نوبات من الألم في
البطن والمفاصل..غالبا
"وغالباً "بيكون مصحوب بارتفاع بالحراره
المهم ،، طبيعة المرض دا
بيحصل طفرة في جين معين فبتحصل الإلتهابات في الجسم، واللي بدورها بتسبب ألم في مناطق من الجسم وارتفاع في درجة الحرارة ،، والإلتهابات بتزود في الجسم بروتين اسمه "أميلويد A” واللي بيترسب في الكُلي مما قد يَودي الي مشاكل كبيره جدا
قبل ما نتكلم في التفاصيل
لازم نعرف ان معظم أعراض حمي البحر المتوسط بتكون متكرره علي شكل نوبات وبتاخد وقت معين من يوم لكذا بوم
يعني تعب يومين اَو ٣
في فتره معينه من الشهر او كل اسبوعين
تعالوا بقا نتكلم في أعراضها !!
١- ارتفاع درجة الحرارة
٢- ألم البطن. مغص رهيييييب بمعني الكلمه
مش بيتحسن الا مع الكولشسين
٣- ألم بالصدر
نسبة من المرضي بيحصل معاهم ودا بيكون سببه بنسبة كبيرة التهاب في الغشاء البلوري للرئة ،،
٤- ألم في المفاصل
المرضي دول بيحصل معاهم وبيكون غالباً في مفصل الورك أو الركبة أو الكعب أو اليد أوالكتف
٥- ألم في العضلات
أهم الأعراض وأخطرها ومالانتمناه:
Amyloidosis
ودا بيحصل إذا لم يتم التشخيص غير متأخر او عدم الالتزام بالعلاج،، واللي بيحصل ان البروتين "أميلويد A” بيعلي وبيترسب في الكليتين ويسبب الفشل الكلوي
نروح للتشخيص :
فيه نقطتين مهمين:
من اقوي اسباب ارتفاع الاميلويد A بيكون حمي البحر الابيض المتوسط
طب والتحليل الچيني molecular test !؟
يأكد الإصابة ولا ينفيها..
ودا لانه بيغطي ١٢ طفرة فقط وعدد الطفرات المسئولة عن المرض حوالي ٣٠٠ طفرة
بمعني اصح وبدون لخبطه .. طالما فيه أعراض اذن فالشخص مصاب ويبدأ في العلاج ،، ولو مفيش أعراض فهو حامل للمرض او ناقل
نيجي بقا للعلاج :
الكولشيسين
وهو عباره عن مركب دوائي مستخلص من زهور نبات اللحلاح ... نبات أهوه يعني لا نخاف منه ولا نوقفه في حمل ولا رضاعه واعراضه الجانبية بسيطه من غثيان ومغص واسهال ودا مش بيحصل غير مع الجرعات العاليه وبمجرد ما نقللها الاعراض بتختفي
الجرعه. يحددها الطبيب حسب الوزن والعمر.
جرعته للاطفال
غالبا نبدأ من ٠.٥ ل ١ مجم وبعد كدا نظبط الجرعه علي حسب الاستجابة (( نوبات أقل ومتباعدة في الفترة الزمنية))
جرعته للكبار
من ٢-٣ مجم يومياً علي حسب الاستجابة (( نوبات أقل ومتباعدة في الفترة الزمنية))
وبنقسم الجرعة لو اعلي من ١مجم في اليوم علي مرتين علشان ميحصلش اسهال
الكولشيسين
بيحمي الكليتين وعلشان كدا بيستمر عليه المريض مدي الحياة ودا بيكون في مصلحته أكيد.. وبعدين دا مستحضر نباتي ياجماعه نعتبره ڤيتامين بيقوينا ويحمينا .. بلاش نوقفه لأي سبباً كان .. حامي الكُلي
بنلجيء أثناء النوبة لمسكنات غير استروديه زي بروفين ، واحياناً بنلجيء للكورتيزون في بعض الحالات .
الكولشيسين فيه منه انواع تجارية كتير ،، مصري - فرنسي-
سعودي. كويتي.
انا شخصيا بفضل المستورد وناخد بالنا من تاريخ الصلاحيه
خد اللي يريحك بس خد بالك من تركيزه كام لانه بيختلف من نوع للتاني .. فيه 0.5 وفيه 0.6 وفيه 1mg
المتابعة بتكون مع طبيبك من خلال تحاليل دورية زي تحليل البول ونسبة الأميلويد A ووظائف الكلي
اذا لم يتم الاستجابه للكولشيسين بجرعاته القصوي ،، يتم تحويل المريض علي علاجات اخري
Comments
Post a Comment
اكتب تعليق حول الموضوع