حمى البحر الابيض المتوسط Familial Mediterranean Fever المرض الحاضر الغائب فى الطب

الحاضر في وجوده و الغائب في تشخيصه لأنه مرض مش نادر بالعكس بنسميه عندنا في الطب FMF is not an uncommon disease يعنى بالعربي كده هو مش مرض نادر على الاطلاق و برضه مش مرض شائع هتشوفه كل يوم وللاسف لأن مفيش دراسات عندنا في مصر مفيش احصائية مؤكدة لنسبة حدوثه عند الاطفال بس الاكيد انه اكتر مما نتخيل لان حالات كتير من غير تشخيص

هو مرض وراثي يحصل نتيجة خلل او طفرة في جين معين MEFV والمرض ده من الأمراض الوراثية الالتهابية المنتشرة في منطقة حوض البحر الأبيض المتوسط وتحديداً عند العرب والإيطاليين والأتراك.

اعراضه نوبات متكررة او بنسميها هجمات Attacks من ارتفاع بدرجة الحرارة والام بالبطن والصدر وارهاق عام وانسداد بالشهية وقيء الم والتهاب بالمفاصل و احيانا طفح جلدي و الهجمة بتاخد من 1 ل 4 ايام و بتروح لوحدها سواء بعلاج او من غير علاج

فى دراسة اتعملت عن Triggers of the attack يعنى عوامل بتزود حدوث الهجمات او بتكون هي شرارة الانطلاق للهجمة اهمها التعرض للبرد و الضغط النفسى و العصبى و التعب و الارهاق الشديد و الوقوف لفترات طويلة و السفر لفترات طويلة و الطمث عند النساء

الاعراض دى مش لازم تكون كلها موجودة يعنى ممكن مريض تكون الحرارة فقط هى العرض الواضح وممكن مريض تانى ييجى بالم متكرر فى البطن بدون حرارة (شوف قلة الادب رغم ان اسمها حمى البحر الابيض المتوسط) وبتختلف شدة الاعراض وتكرارها من طفرة للتانية ومن شخص للتانى والمريض بيكون سليم تماما ما بين الهجمات ومن هنا صعوبة تشخيص المرض لان الاعراض دى ليها اسباب تانية كتير وحمى البحر المتوسط مش بتكون على رأس اولويات الطبيب لما بيشوف حالة زى كده

مش محتاج اقول ان الحالات دى بتلف كتير على الدكاترة فى كذا تخصص و بتتشخص - لو اتشخصت - بعد فترة بتصل لسنوات بعد معاناة

طبعا من ضمن قواعد التشخيص تكرار النوبات 4 مرات على الاقل فمستحيل دكتور هيشخص الحالة فى اول هجمة الا فى بعض الحالات لو الاعراض واضحة و فى تاريخ مرضى واضح فى العيلة الاب و الاخوات مثلا عندهم المرض و متشخصين قبل كده

بنسبة 65% الهجمات بتبتدى قبل سن 10 سنوات وبنسبة 90 % قبل سن 20 سنة بس عموما بتتشخص في أي سن

طبعا مننساش ان الم البطن فى الحالات دى بيكون شديد لدرجة ان كتير من العيانين بيتشخصوا على انهم التهاب بالزايدة الدودية وبيعملوا العملية