أمراض القلب والشرايين التاجية مش بس قسطرة ودعامات.

.. في علاجات وأبحاث حديثة مهمة جدا قد تكون السبب في الحفاظ علي قلبك  

خليني احكيلك عن استاذ صلاح " بعد ما أستأذنته في النشر" جة العيادة يعاني من ألام متكررة بالصدر نتيجة قصور بالشرايين التاجية رغم انه عمل قسطرة ودعاماتين من 4 سنين ... 

عملت له قسطرة جديدة وظهر ضيق في دعامة منهم و ضيق في شريان تاجي اخر !!.. ركبت له دعامتين دوائيتين بنجاح بالشرايين الضيقة الحمد لله ولكن موضوعي اليوم

  لية حصل كدة" ؟!!!

ناس كتير بتركب دعامات وتكون احسن نوع وعاملينها مع أفضل دكاترة .. وبعدين يحصل عنده سدد  بالدعامات او بالشرايين تاني !!

ازاي احافظ علي الدعامات والشرايين التاجية بعد القسطرة العلاجية؟!!

العوامل اللي بتسبب تكرار ضيق الشرايين كتير اهمها التدخين والسكر والضغط وارتفاع الكولسترول بالدم..

 ايوووووة اقفش بقي ارتفاع الكوليسترول بالدم دة علشان هنركز عليه المرة دي لانه حاجة كدة مش متشافة زي فيرس كورونا والناس مابتخدش بالها منه غير بعد فوات الأوان  

في حين ان الاهتمام بعلاج الكولسترول والوقاية منه يساوي حالة صحية جيدة للقلب والشرايين التاجية بما فيها الدعامات الدوائية...

1. أخر الأبحاث العلمية بتقول ان الكولسترول الضار بالجسم LDL لازم يكون "بالنسبة للمريض اللي عنده قصور بالشرايين التاجية"  اقل من 55 !!!.. في صورة التحليل بتاع استاذ صلاح " منزلها مع البوست" الكولسترول الضار LDL اكتر من ضعف الهدف المطلوب 117  .. عالي جدا بالنسبة لمريض قلب!!!.. فبالتالي تكرار ضيق الدعامات والشرايين حدث متوقع بعد فترة إلا لو تابعنا بالعلاج لغاية لما يقل للرقم المطلوب ان شاء الله ...

2. طيب بس هو ماشي علي العلاج بتاع الكولسترول وباكبر جرعة له كمان يادكتور  ورغم كدة الرقم عالي؟؟؟!!!.. علشان كدة اخترعوا حديثا علاج للكولسترول الضار LDL عن طريق حقنة تحت الجلد غالية شوية بتتاخد كل شهر او اسبوعين للحالات دي ومتوقع بعد شهرين من العلاج تقل جدا درجة الكولسترول الضار بالدم للمعدل المطلوب (هبقي اصور لكم  نتيجة التحليل القادم ان شاء الله لما استاذ صلاح ينتظم علي الحقنة )  

3. اللي قالك تاخد علاج للكولسترول لغاية لما يقل وبعدين نوقفه لما يتظبط مش صحيح.. لان ارتفاع الكوليسترول بالدم دة مرض مزمن زي السكر والضغط يحتاج لعلاج ومتابعة مستمرة.. ولو وقفت العلاج هيرجع يعلي تاني وتبقي معرض لحدوث امراض القلب وانت فاكر نفسك باشا ومتعالج  

4.اللي قالك في الاعلانات ان زيت الدرة صحي ومفيد للقلب..  هو الحقيقة صحي ومفيد "لدكاترة" القلب لانك هتبقي زبون دائم عندنا.. الزيوت النباتية كلها  " درة وعباد شمس" بتحتوي علي تركيز عالي جدا من الاوميجا 6 ودة بيساعد علي حدوث التهابات بالشرايين وتراكم الكولسترول وبالتالي امراض القلب.. ولا ينصح بها لمرضى القلب غير في الإعلانات  

5. اللي قالك ان البيض واللبن والسمنة البلدي والزبدة الفلاحي مضرة للقلب.. ماقرأش الأبحاث العلمية الحديثة اللي اثبتت ان تناول كميات قليلة يوميا بتحسن الكولسترول النافع بالجسم وتقلل الضار.. بس للاسف مافيش حد يعملهم اعلانات بملايين..  اصل مش هعملك اعلان اقولك كل بيض واشرب لبن يعني   .. لكن الشركة تأبجني قرشين حلوين اطلع اقولك خد معلقتين سمنة صناعي علي الريق وتحدي واقلي بطاطس بالذيت وماتخافش علي قلبك ياحبيب قلبي  

6.لو انت مريض قلب خليك مع دكتور شاطر وتابع معه كل 6 شهور وماتستخسرش.. علشان معالجة الامور في بدايتها بتكون سهلة ومش مكلفة.. في حين التأخير في التشخيص بيصعب الحالة.. نصيحة بلاش تمشي بدماغك في الطب وسلم القضية للي بيفهمها.